Markus 15
15
Si Yesus an dior i Pilatus
(Mat. 27:1-2, 11-14; Luk. 23:1-5; Yoh. 18:28-38)
1Mamoondopé' keli, sé kikiiten é imam, sé anggota Mahkamah Agama wo sé makailek wutul in Torat wo sé matu'a é tou Yahudi mali'us mepaar e maté si Yesus. Kekawus in itu mangé wa'kesen éra Sia wo iwali éra mangé en isarakan a si Pilatus. 2Icateka' mangé a si Pilatus, wo wuéienna a si Yesus, “Wutul réén Ko Kolano é tou Yahudi?”
Isowat i Yesus, “Si amango in esa en cumua in itu.”
3Wo sé kikiiten é imam méé kelian tuduan a si Yesus. 4Wo wuéien ka'i sumawel i Pilatus a si Yesus, “Kelio sé aipatudu éra andumoro' Ico! Ra'ica réén sowaten-Mu?” 5Taan si Yesus ra'ica sumowat in sapa-sapa, akar si Pilatus mangaya-ngaya'ka'.
Si Yesus makéré in ukuman patén
(Mat. 27:15-26; Luk. 23:13-25; Yoh. 18:39–19:16)
6Susur in endo wangko' Paska si Pilatus manaram mengawekar esa tou si pakabuin kumiit im pinangilek é tou Yahudi. 7Wo asi témpo itu, awéan si esa tou, makangaran Barabas. Sia ayuntep am bui mewali-wali wo sé tou walina, ampa'paan séra imaté tou an tutuw éra isumundur sé pemerénta Romawi. 8Wo sé tou keli mangé a si Pilatus, pangileken éra ai sia wosama' iwekarna esa tou si pakabuin, tanu ing kanaramen.
9Wo wuéien i Pilatus ai séra, “Icasalé' réén iow iwekarku si Colano é tou Yahudi anio'?” 10Si Pilatus mamuéi in taniitu, ampa'paan kailekanna sa sé kikiiten é imam mangana-nganat a si Yesus.
11Taan sé kikiiten é imam memaso-maso' sé tou keli e mangilek a si Pilatus wosama' iwekarna si Barabas torona éra.
12Wo makasapé' ka'i si Pilatus mamuéi ai séra, “Sa taniitu, sapa réén e musti émaanku a si Tou si pengatuulen iow kolano é tou Yahudi anio'?”
13Séra ka'i mangko', “Isalipo Sia!”
14Wo wuéien ka'i i Pilatus ai séra, “Sapa réén eng kaléwo-léwo'an niéma'-Na?”
Taan makarepetke' taré séra maangko', “Isalipo Sia!” 15Eng kasiwakana, ampa'paan si Pilatus masalé' marui in até é tou keli, iwekarna si Barabas torona éra. Wo peréntanna sé pengawal sumambok si Yesus, wo isarakanna e mangé isalip.
Si Yesus paséro-séro'
(Mat. 27:27-31; Yoh. 19:2-3)
16Kumawus in itu, iwali mangé é suraro si Yesus ang kintal in istana paento'an i gubernur. Wo towan éra pakasa sé kara-karapi éra suraro e mai mali'us am bitu. 17Wukaan éra eng karai-Na wo karaian éra in juba pares.#15:17 Juba pares: tumuru' ing kanaramen pengakaraien é kolano. Wo émaan éra esa mahkota am panga-pangana rintek tutunéan wo ipaké éra an do'kos-Na. 18Malekep ako in itu tumo'tolo séra masiri' Sia, icua éra, “Siri' a si colano é tou Yahudi!” 19Séra mensan-sawelan mapangkur in do'kos i Yesus mapaké im papangkur wo paruraan éra ka'i wo makundu maapo' kéndoon ai Sia. 20aKekawus ako séra menéro-néro' Sia, wukaan éra en juba pares pekakaraien-Na wo karaian éra sumawel ing karai-Na.
Si Yesus aisalip
(Mat. 27:32-44; Luk. 23:26-43; Yoh. 19:17-27)
20bWo iwali éra mangé Sia kumesot ang kota Yerusalem e mangé isalip. 21#Rm. 16:13 An tutuw itu, séra meta'up wo si esa tou makangaran Simon. Sia tou Kirene, amang i Aleksander wo si Rufus. Sia meunte-untepé' mangé ing kota Yerusalem wo leséén é suraro sia muléng in salip i Yesus. 22Wali éra si Yesus an esa tampa makangaran Golgota, eng kaangéanna ‘Tampa Ru'i in Do'kos.’ 23Wo iwéé é suraro a si Yesus en anggor si kinemuan i mur, taan ra'ica kiim-Na i melep. 24#Mzm. 22:19 Kekawus éra sumalip Sia, wéténgen éra eng karai-Na ang kerapi in lumotréi en tumantu si séi e makéré.
25Asi jam sembilan imamoondo, isalip éra si Yesus. 26Wo an dangka' in do'kos-Na, awéan esa papang pinatican in tana'i, “Si anioo si Colano é tou Yahudi.” En aipatic ituo e imangémai kéitu Sia aisalip.
27Aisalip éra ka'i sé rua tou léwo', si esa ang kakan i Yesus wo si esa ang ka'biri-Na.[28Wo in taniitu, linekepo e nats aipatic ang Kitap Le'nas: “Sia aicarékén an esaan angé asé tou léwo'.”]
29 #
Mzm. 22:8, 109:25; Mrk. 14:58; Yoh. 2:19 Sé tou malangkoi am bitu maojat Sia wo menguré-ngurésé in do'kos. Icua éra ai Sia, “Éi! Icua-Mu kiné Ko ro'na tumongkar im Balé Le'nas wo wangunen-Mu sumawel asi telu ngandoke', 30tumumpao mai asi salip itu wo lowireno mangé en owak-Mu in esa!” 31Taniitu ka'i sé kikiiten é imam wo sé makailek wutul in Torat maséro' Sia. Séra wo i séra mengkuanan, “Sé tou walina ro'na lowiren-Na, taan en owak-Na in esa ra'ica kalowiran-Na! 32Sa wutul Ko Mesias, kolano é tou Israel, tumumpao mai asi salip itu, wosama' ro'na sérén wo percayan ami.” Sé rua tou aisalip mewali-wali wo Sia maséro' ka'i Sia.
Si Yesus maté
(Mat. 27:45-56; Luk. 23:44-49; Yoh. 19:28-30)
33Asi jam duabelas, pakasa in sangkum in tampa itu mariréimbeng akar asi jam tiga im bawaando. 34#Mzm. 22:2 Wo asi jam tiga im bawaando, si Yesus kumua in taangko' a nunuwu' é Aram, “Eloi, Eloi lama sabakhtani?” eng kaangéanna, “Kasuruan-Ku, Kasuruan-Ku, kéitu réén aitela'u-Mu Aku?”
35Kelinga in itu, piraan asé tou makatulung am bitu kumua, “Lingan angé, Sia matowa si nabi Elia.” 36#Mzm. 69:22 Wo awéan esa tou mario-rior mindo im bungang karang si bungang meputé wo ing kapés, ramesenna in anggor esem wo itopokna an tempok i rondora in saraw wo iwééna mangé am ba'ba' i Yesus en se'sepen-Na. Wo si tou itu kumua, “Mandéo kita mento' wo suméré, séi si makailek si Elia maai en tumumpa Sia.”
37Wo si Yesus mangko' repet, kekawus in itu Sia maté. 38#Kel. 26:31-33 An tutuw itu eng kaéng pengakawu' am Balé Le'nas, mawirang maperua tumo'tol an dangka' akar an darem.
39Si kikiiten é suraro makatulung an dior in salip i Yesus. Keséréna si Yesus imaté tanu siitu, wo icuana, “Si tou anio', uli-ulit Toyaang i Amang Kasuruan!”
40 #
Luk. 8:2-3 Asi témpo itu ka'i awéan piraan wéwéné sé makaséré an tayang an tutuw i Yesus aisalip. Séra itu si Maria tou Magdala, si Maria inang i Yakobus wo'bas wo si Yoses, wo ka'i si Salome. 41Iséra itu sé icumiit wo maselewir si Yesus an tutuw-Na ang Galileapé'. Am bitu ka'i kelian wéwéné walina sé imai an Yerusalem mewali-wali mai wo si Yesus.
E mayat i Yesus aicubur
(Mat. 27:57-61; Luk. 23:50-56; Yoh. 19:38-42)
42An tutuw i matawio im bengi, sé tou tumu'tul ing kanen Paska wo muntepo in endo Sabat. 43Ampa'paan in ituo si Yusuf tou Arimatea ra'ica maindé' mangé meta'up si Pilatus e mangilek i mayat i Yesus e mangéna icubur. Si Yusuf itu anggota Mahkamah Agama wo pasiri-siriin é tou keli wo ang karoro'an i mengento-ngento' in témpona si Amang Kasuruan mai kumawasa tanu Kolano. 44An tutuw lingan i Pilatus sapaoka si Yesus imatéo, sia mangaya'ka'. Ampa'paan in ituo towanna si kikiiten é suraro wo mamuéi, wutul kiné réén si Yesus imatéo?
45Wo isowat i kikiiten é suraro, “Wutul é tuang, si Yesus imatéo.” Kelinga in itu, si Pilatus méé kaloasan a si Yusuf e mangé mindo i mayat i Yesus. 46Wo si Yusuf mangé tumeles kaéng lénen ipengasaput sé tou imaté, wo mangéna tumpa e mayat i Yesus an salip. Wo saputenna ing kaéng lénen itu e mayat i Yesus, wo mangéna icubur an esa wo'bok si aica'il an esa kuntung watu. Kekawus ako in itu, iwiléina esa watu wangker em pénet im bo'bok itu. 47Ang karoro'an in itu, winéano rékén i Maria Magdalena wo si Maria inang i Yoses en tampa kinuburan si Yesus.
Đang chọn:
Markus 15: TNT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
En Taar Weru a nunuwu' é Tontemboan @ LAI 2018
