Lukas 2

Eng ketou i Yesus

(Mat. 1:18-25)

1Ra'ipé' uré eng ketou i Yohanes, si Kaisar Agustus méé esa perénta rumu'du' pakasa sé touna ang kakolanoan i Romawi en dumaftar i ngaran éra. 2Si anioo en sensus kataré-taré niéma' an tutuw i Kirenius mamuali gubernur an Siria. 3Ampa'paano in itu pakasa sé tou mangé dumaftar i ngaran éra ang kota si niento'an é apo-apo' éra.

4Taniitu ka'i si Yusuf, sia a Nazaret owo ang Galilea, mangé ang kota Daud makangaran im Betlehem an Yudea. Sia musti maréng angé am bitu ampa'paan sia itu taranak i Daud. 5Si Yusuf mangé am bitu ang karapi i Maria si tinantunao ing kawéngen wosama' e ngaran éra ro'na daftar am bitu. An tutuw itu si Maria maowa-owako.

6An tutuw éra am Betlehem, an témponao si Maria makéré toyaang. 7Wo sia makéré esa toyaang tuama, toyaangna luluna. Wo si toyaang itu saputenna ing kaéng, itekelna am pawa'uban é binatang ampa'paan séra ra'ica imakéré walé in loséran.

En andumoro' ing ketou i Yesus aicua a sé gembala

8Asi wengi itu awéan sé gembala maento' an sangkum in tana' rerukutan matéir sé domba.

9Tumarépé'anke' mapaturu'o mai ai séra si esa malaékat i Amang Kasuruan. Wo en sendot i Amang Kasuruan tumélang iséra, akar séra uli-ulit maindé'. 10Taan icua i malaékat itu ai séra, “Tioo maindé'! Ampa'paan aku mai kumua in abar kaaruien wangko' ai camu. En abar anio' méma' oka pakasa in tou masalé-salé'. 11En abar itu tana'i: Asi endo anio' ang kota Daud makangaran im Betlehem itumouo si Lumolowir iow, Siao si Kristus, si Kasuruan. 12Si anioo en tuusna ai camu wosama' katuusan iow si toyaang teké' itu: Kaséréan iow oka esa toyaang teké', pakasaputen ing kaéng wo ipakatekel am pawa'uban é binatang.”

13Kumawusai si malaékat itu maroma', mapaturu'o mai kekelian malaékat an sorga owo mewali-wali wo si malaékat itu. Wo séra im baya mewali-wali rumayo si Amang Kasuruan. Icua éra,

14“Irayoo wo siriino mangé si Amang Kasuruan an tampa rumangka-rangka'!

Wo am bawo ing kayo'baan wéan-Na mai ing kaeluran

a sé tou sé mengaarui in até-Na.”

15Kekawus é malaékat maréng angé an sorga, sé gembala itu kumua a si esa wo si esa, “Mayoo kita maangé am Betlehem, en suméré sapa e mamuali a mangé mbitu, meputé si aicua i Casuruan ai cita.”

16Wo séra mario-rior angé am Betlehem. Wo peta'up éra si Maria wo si Yusuf ang karapi i Toyaang itu si ipakatekel am pawa'uban é binatang.

17Keséré é gembala si Toyaang itu, ipakua-kua éra a sé tou am bitu sapa en aicua i malaékat i Amang Kasuruan ai séra andumoro' i Toyaang itu.

18Wo pakasa sé tou iluminga in aicua é gembala itu mangaya-ngaya'ka'. 19Taan andumoro' im pakasa sé aicua é gembala itu pakaéma'ke' i Maria an aténa wo pemero-merotenna. 20Kumawus in itu, sé gembala maréng angé sumawel an tampa éra. Ang karoro'an éra imawaréng, séra marayo-rayo wo masiri-siri' si Amang Kasuruan ampa'paan pakasa sé lininga wo sé sinéré éra itu, meputé ulit wo si aicua i malaékat i Casuruan ai séra.

Si Yesus aisarakan é matu'a-Na a si Amang Kasuruan

21 # Im. 12:3; Luk. 1:31 An tutuw imalekepo walu ngando eng ketou i Toyaang itu wo Sia musti sunaten wo ngaranan éra Yesus si ngaran aicua i malaékat a si Maria an tutuwna ra'ipé' maowa-owak.

22 # Im. 12:6-8 Imayo en témpona si Maria meresi in owak tanu ing kanaramen kumiit in ukum Torat. Ampa'paano in itu si Maria wo si Yusuf mangé an Yerusalem e méma' in atoran itu. Iwali éra ka'i si Toyaang teké'pé' itu en isarakan a si Amang Kasuruan. 23#Kel. 13:2, 12 Ampa'paan an ukum i Casuruan aipatic in tana'i, “Pakasa sé toyaang tuama luluna musti isarakan a si Amang Kasuruan e mamuali anu-Na.” 24Wo séra maawo-awo iméé raragés rua ku'kur kuma'pa rua mombo peranggang, tanu tuus meresi in owak i Maria kiit in atoran i Casuruan an untep in ukum Torat.

Si Simeon rumayo si Amang Kasuruan

25Asi témpo itu an Yerusalem awéan esa tou makangaran Simeon. Sia itu maéma' im butul an dior i Amang Kasuruan wo le'tek ai Sia. Wo sia ang karoro'an mengento-ngento' in oras i Amang Kasuruan lumowir sé tou Israel wo e Roh Le'nas mewali-wali wo isia. 26Wo aicuao i Roh Le'nas ai sia sapaoka sia ra'ipé' maté sa ra'ipé' isuméré si Kristus, si Kolano ayutus i Amang Kasuruan e mai lumowir sé tou-Na.

27Wo ka'i pakakawasan i Roh Le'nas si Simeon mangé muntep am Balé Le'nas. An tutuw i Simeon an untepé', muntep ka'i mai am bitu si Yusuf wo si Maria makake'kep si Yesus Toyaang teké'pé' itu en isarakan a si Amang Kasuruan, tanu ing kanaramen kumiit in atoran i Casuruan an untep in ukum Torat. 28An tutuw sérén i Simeon séra, kala'usenna mangé ing kume'kep si Yesus teké'pé' itu wo sia marayo-rayo si Amang Kasuruan. Icuana,

29“O Kasuruan,

indior si Amang Kasuruan ijumanjio a yaku

wo intarépé' en janji itu linekepo i Amang Kasuruan.

Anaé, iwayao mai si ata-Mu anio' maté ang kaeluran.

30Ampa'paan sinérékuo in esa

si Lumolowir ayutusai i Amang Kasuruan.

31Si Lumolowir itu aitu'tulo i Amang Kasuruan torona im pakasa é tou.

32 # Yes. 42:6, 49:6, 52:10 Wo Sia tanu in sendot si aiwéé i Amang Kasuruan

en tumélang in até é tou walina

wosama' séra ro'na mai a si Amang Kasuruan,

wo ka'i en sendot itu e méma' sé tou-Mu Israel ro'na irayo é tou walina.”

33Kelinga i Yusuf wo si Maria sapa en aicua i Simeon andumoro' i Toyaang itu, séra mangaya-ngaya'ka'. 34Wo si Simeon sumombayang mangilek a si Amang Kasuruan wosama' méé mai ing kamang ai séra. Wo icuana a si Maria inang i Toyaang itu, “Maria, si Toyaang anio' aitantuo i Amang Kasuruan e mai mukum sé kelian tou Israel sé ra'ica maéman a si Casuruan wo mai lumowir kelian tou Israel sé maéman ai Sia. Wo si Toyaang anio' mamuali oka tuus tanu popokéi i Amang Kasuruan a sé tou iméma' ing kamesé-meséaan. Taan Sia icélong oka é tou keli. 35Wo in taniitu sapa em pawero-weroten é tou keli makawuka-wuka' oka. Wo ico é Maria, ico uli-ulit mendam oka ing kawenduan ampa'paano si Toyaang itu. Eng kawenduan pendamenmu itu tanu ing kame'nget in até an tutuw patopoken im pagi' telew.”

Si Hana rumayo si Amang Kasuruan ampa'paan ing ketou i Yesus

36Awéan ka'i am bitu esa nabi wéwéné matu'ao, e ngaranna Hana, toyaang i Fanuel an suku Asyer owo. Makakawéng ako, sia menonou mewali-wali wo si penanaanna pitu ngata'un eng kauré, 37wo si penanaanna matéo anaé sia balu oka. Wo intarépé' en umurna walu ngapulu' epat ngata'uno. Sia ra'ica kawisa tumela'u im Balé Le'nas. Endo wo em bengi sia maapo' a si Amang Kasuruan ang karapi mapuasa wo masombayang.

38An tutuw i Simeon mapaar ang karapi i Yusuf wo si Maria, si Hana ka'i mai am bitu. Sia kumua makapulu'sama' a si Amang Kasuruan wo ipakua-kuana in andumoro' i Toyaang teké' makangaran Yesus itu a sé im pakasa é tou am bitu sé mengento-ngento' in endo an tutuw i Amang Kasuruan maai mekar sé tou Israel.

Si Yusuf wo sé pamaléna maréng angé sumawel a Nazaret

39 # Mat. 2:23 Pakaémaanai i Yusuf wo si Maria pakasa eng kanaramen kumiit in ukum Torat wo séra maréngo mangé sumawel ang kota paento'an éra si a Nazaret ang Galilea. 40Wo si Yesus makawangkoo wo makaketero ka'i. Sia wuta ing kapinteran asi Amang Kasuruan wo icaupus-Na keli.

Si Yesus am Balé Le'nas

41Susur in ta'un, sé matu'a i Yesus mengaangé an Yerusalem eng kumiit méma' in endo wangko' Paska.#2:41 En endo wangko' Paska an Taar Uré, endo pata'néian an tutuw si Amang Kasuruan imekar sé apo-apo' é tou Israel an tana' Mesir. An tutuw a Mesir, airu'du'-Na sé tou Israel kumisu in enda' i domba an dangka' im papalen im balé wosama' si malaékat im papaté asaloke' lumangkoi im balé éra (sérén ang Keluaran 12:1-27). Kumawusai in itu séra makala'us kumesot an tana' Mesir wo iru'du'-Na séra méma' endo pata'néian en tuma'néi ing kamamualian itu. 42Wo an tutuw i Yesus imalekepo sangapulu' rua ngata'un, séra mangé an Yerusalem, kumiit méma' in endo wangko' itu. 43En endo wangko' itu niéma' pira ngando. Kekawus éra iméma' in endo wangko' itu, séra maréngo sumawel taan si Yesus imento'ke' an Yerusalem ra'ica kailekan é matu'a-Na. 44Pawasan éra si Yesus an uner é tou mawaya' mewali-wali wo iséra. Sangandoo séra mawaya', pangérén érao Sia an uner é poo-poow éra wo a sé tou katuusan éra. 45Ampa'paan Sia ra'ica kinéréan éra wo waréngen éra mangé sumawel mangéré Sia an Yerusalem.

46Telu ngandoo Sia paéré-érén wo ipeta'up éra Sia am Balé Le'nas. Sia makalukut an uner é guru agama Yahudi makalinga wo memuéi-muéi ai séra. 47Wo pakasa in tou mangaya-ngaya'ka' makalinga im pakanuwu'-Na wo eng kapandéi-Na masowat im buwuéien éra. 48Wo an tutuw é matu'a-Na suméré Sia, séra mangaya'ka' wo icua i inang-Na ai Sia, “Toyaangku, kéitu réén-Ko iméma' tanu siitu ai cami? Si amang-Mu wo yaku ra'io makaaté in sama' maéré-éré Ico.”

49Taan aisowat-Na ai séra in tana'i, “Kéitu réén si amang wo si inang maéré-éré Yaku? Ra'ica réén kailekan i amang wo si inang sapaoka Aku musti am balé i Amang-Ku?” 50Taan ra'ica kailekan i inang wo si amang-Na sapa eng kaangéanna en aicua i Yesus ai séra.

51Wo si Yesus maréng a Nazaret mewali-wali wo sé matu'a-Na wo Sia menonou le'tek a sé matu'a-Na. Pakasa sé imamuali itu pakaéma'ke' i Maria an untep in aténa. 52#1Sam. 2:26; Ams. 3:4 Wo si Yesus makawangkoo wo makaaweso ka'i eng kapinteran-Na. Sia icaupus i Amang Kasuruan wo icasalé' ka'i é tou.

Đang chọn:

Lukas 2: TNT

Tô màu

Sao chép

So sánh

Chia sẻ