Yòhánà 15
15
Yèésù wà wí fú ɔmatsɛ́‐ɛ̀ ŋa ní ká tamá-òŋu, tsí ká nyáa so rere
1Tsí Yèésù tɔ́ wà wíìnyɛ̀ làkóò ró, tsí ó ní: Òŋu ní dzɛ́ egi-ɔtí†-òtítɔ́#ɛ́, ɔ̀kã̀ kò wà ró. Tsí Boba-òŋu ní dzɛ́ olóko-egi-ɔtí#ɛ́. 2Bí akpá-kã̀ tamá-òŋu, tsí kò wà so, Boba-òŋu náa rɛ́ɛ ǹɖe. Tsí bí akpá kã̀ŋa wà, tsí àŋa òŋu, à wà so#ɛ́, náa tsɛ́ wàwá yèé wà nára-ŋa#á ǹɖe, àtsùgbée ká so máa rere. 3Ó ɖi, àŋa òŋu, ɛ̀kɔ́ yèé òŋu tse fú ŋa#á, ó ti nya wàwá-ŋa ǹɖe nára-ŋa, tsí sɔ ŋá ɖi mímá. 4Ó ɖi, kíbí òŋu gbo, òŋu tse ɔ̀kã̀ntso bá ŋa si#ɛ́, àŋa gbo ká tse ɔ̀kã̀ntso bá òŋu si bɛ́ɛ̀. Akpá-egi òŋu níìkã̀, bí kò tamá-egi#ɛ́ òŋu ká‐ɛ̀#ɛ́, kàkó nyáa so fú ara‐ɛ̀. Bɛ́ɛ̀ ké ní àŋa gbo, bí à kò tse ɔ̀kã̀ntso bá òŋu#ɛ́, à kàkó nyáa so#ɛ́.
5Òŋu ká-òŋu ní dzɛ́ egi-ɔtí#ɛ́, tsí àŋa òŋu, à dzɛ́ akpá‐ɛ̀ ŋa. Bí ɔ̀nyà-kã̀ tse ɔ̀kã̀ntso bá òŋu, tsí òŋu gbo, òŋu tse ɔ̀kã̀ntso báa, ɛnɛ nyɛ̀ŋɛ̀ náa so rere. Ó ɖi, bí òŋu kò wà náànyì-ŋa, à kàkó nyáa tse iŋɛ́-kã̀ kpókpó. 6Bí ɔ̀nyà-kã̀ wà, tsí kò tse ɔ̀kã̀ntso bá òŋu, à nákó kɛ́ɛ sɔ taánù lɔ kíbí akpá-egi yèé à rɛ́, tsí ó gbɛ̃#ɛ́. Akpá-egi yèé ŋa à rɛ́, tsí à gbɛ̃ ŋa#á, à náa se ŋá ɖà ńná, tsí à náa dzoná ni. 7Ó ɖi, bí à tse ɔ̀kã̀ntso bá òŋu, tsí afɔ̀-òŋu ŋa kí ńǹsérè si fú ŋa si, ká bere Ɔ̀ɖáyé Boba ńŋɛ́ ɔ̀kã̀lɔ́ɔ̀kã̀ yèé à wà wò#ɛ́ gé, nákó tseé fú ŋa. 8Bí à so rere, tsí à nyà ɖíre ní àŋa dzɛ́ ɔmatsɛ́-òŋu ŋa ìɖéǹɖè, à wà nya lílákṹ-Boba-òŋu, tsí wà ń ɖíre fú ɔ̀nyà ŋa ńnɛ̀ɛ́. 9Òŋu nɛ́ àmúɖɔ̃̀ fú ŋa kíbí Boba-òŋu gbo nɛ́ àmúɖɔ̃̀ fú òŋu gbà#á. Ká gbé ńnɔ́-àmúɖɔ̃̀-òŋu. 10Bí à wà tse iŋɛ́ yèé òŋu wà fɔ̀ fú ŋa ní ká tse#ɛ́, à nákó gbé ńnɔ́-àmúɖɔ̃̀-òŋu. Ó ɖi, bɛ́ɛ̀ ké ní òŋu gbo, òŋu wà tse iŋɛ́ yèé Boba-òŋu wà fɔ̀ fú òŋu#ɛ́, tsí òŋu wà ńnɔ́-àmúɖɔ̃̀‐ɛ̀ si#ɛ́. 11Òŋu wà wí afɔ̀ yèé ŋa fú ŋa, àtsùgbée ayè títɛ́ yèé wà fú òŋu#ɛ́ kó gbé bá àŋa gbo, tsí ayè kó tɛ́ ŋa dzálɛ̀ ni.
12Iŋɛ́ yèé òŋu wà fɔ̀ fú ŋa#á ní dzɛ́ ní: Náàŋírĩ-ara-ŋa#á, ɛnɛ kṹnukṹ kó nɛ́ àmúɖɔ̃̀ fú enìkéèdzì‐ɛ̀ kíbí òŋu gbo, òŋu nɛ́ àmúɖɔ̃̀ fú ŋa gbà#á. 13Àmúɖɔ̃̀-kã̀ kpókpó kò wà, tsí láre ɛnɛ yèé dzɛ́ ní òŋu kó mú ikú-ara-òŋu tà náàtsùgbé-ídza-òŋu ŋa#á. 14Tsí àŋa òŋu, bí ó dzɛ́ ní à wà tse iŋɛ́ yèé òŋu wà fɔ̀ fú ŋa ní ká tse#ɛ́, à dzɛ́ ídza-òŋu ŋa. 15Òŋu kàkó kpè ŋá ní ɔmatsɛ́-òŋu ŋa ró, iŋɛ́ yèé tse#ɛ́, ɔmatsɛ́ kà ma ìsérè yèé wà fú ɔ̀gá‐ɛ̀ tútútú#ɛ́. Òŋu wà kpè ŋá ní ídza-òŋu ŋa, iŋɛ́ yèé tse#ɛ́, iŋɛ́ ɔ̀kã̀lɔ́ɔ̀kã̀ kpó yèé Boba-òŋu wí fú òŋu#ɛ́, òŋu nyàá ɖíre fú ŋa.
16Kò tsi àŋa ní tsã òŋu#ɛ́. Òŋu ká-òŋu ní tsã̀ ŋá#á. Òŋu tsã̀ ŋá, tsí wà ɖátsɛ́ fú ŋa ní: Ká lɔ, tsí ká so rere, tsí èso-ŋa kó gbé títí lɔ. Ńbɛ̀ɛ́, bí à kpe ɛ́kɔ-òŋu, tsí bere Ɔ̀ɖáyé Boba ńŋɛ́-kã̀#á, nákó fú ŋa ńnɛ̀. 17Ó ɖi, iŋɛ́ yèé òŋu wà fɔ̀ fú ŋa ní ká tse#ɛ́ ní dzɛ́ ní: Náàŋírĩ-ara-ŋa#á, ká nɛ́ àmúɖɔ̃̀ fú ara-ŋà ŋa.
Yèésù ní ɔ̀nyà-ayé yèé ŋa nákó nya ɔmatsɛ́-òŋu ŋa kãdzú
18Tsí kíbí ɔ̀nyà-ayé yèé ŋa wà nyà ŋá kãdzú#ɛ́, kó yé ŋa ní à ti nya òŋu kãdzú tsúwádzú-ŋa. 19Ó ɖi, ó má tsi à dzɛ́ ti ìtalɛ̀ bí, ɔ̀nyà-ayé yèé ŋa má nɛ́ àmúɖɔ̃̀ fú ŋa kíbí à nɛ́ fú tiŋà ŋa#á. Ó ɖi, òŋu tsã̀ ŋá, tsí à wà níìkã̀ fú ɔ̀nyà-ayé yèé ŋa, tsí à kò dzɛ́ ti ìtalɛ̀ bí ró. Ńnɛ̀ ní à wà nyà ŋá kãdzú#ɛ́. 20Ká tédzú afɔ̀ yèé òŋu wí fú ŋa wáa lɔ#ɛ́. Òŋu fɔ̀ fú ŋa ní fee, ɔmatsɛ́-kã̀ kà láre ɔ̀gá‐ɛ̀. Kíbí ɔ̀nyà-ayé yèé ŋa tsoró bá òŋu gbà#á, à nákó tsoró bá àŋa gbo bɛ́ɛ̀. Kíbí à kò mú afɔ̀-òŋu tsitsɛ́ tse#ɛ́, à kàkó mú afɔ̀ tiŋa gbo tsitsɛ́ tse. 21À nákó tse àtsùgbé-òŋu, tsí tse bá ŋa bɛ́ɛ̀, iŋɛ́ yèé tse#ɛ́, à kò ma ɛnɛ yèé bɛ òŋu wá#á.
22Ó ɖi, ó má tsi òŋu kò wá, tsí wáa wíìnyɛ̀ fú ɔ̀nyà-ayé yèé ŋa tã́ná à kò gbàá gbɔ́#ɛ́, afɔ̀-àbi-kã̀ kàá tsɛdzɔ́-ŋa. Báàyí#ɛ́, à kàkó nyáa fɔ̀ ní àŋa kò ma iŋɛ́ yèé dzɛ́ àbi#ɛ́ ró. 23Bí ɔ̀nyà-kã̀ nya òŋu kãdzú, ó nya Boba-òŋu gbo kãdzú ńnɛ̀ɛ́. 24Ó má tsi òŋu kò tse iŋɛ́-àwùsì ŋa nódzú-ŋa, iŋɛ́-àwùsì yèé ɔ̀nyà-kã̀ kpókpó kò tse wòrí#ɛ́, afɔ̀-àbi-kã̀ kàá tsɛdzɔ́-ŋa. Báàyí#ɛ́, à rí iŋɛ́ yèé òŋu tse ŋa#á, tsí à nya òŋu kãdzú, tsí nya Boba-òŋu gbo kãdzú. 25Ó wà ní ká nya òŋu kãdzú bɛ́ɛ̀, àtsùgbée afɔ̀ yèé à kɔ si ńǸwé-Ɔ̀ɖáyé†#ɛ́ kó tsɛ ìɖéǹɖè. Ó ɖi, à kɔ si ńǸwé-Ɔ̀ɖáyé ní: “À nyà mí kãdzú rá gé ni.”#15:25 Ìwé-Orĩ ŋa 35:19, 69:5 (Psaumes 35:19, 69:5)
26Ó ɖi, òŋu nákó bɛ lègbè-kã̀ wá fú ŋa. Nákó ti ńɖi-Boba-òŋu, tsí wá ńɖi-ŋa. Lègbè#ɛ́, Mímí-Ɔ̀ɖáyé† ni. Òŋu ní dzɛ́ olí-òtítɔ́#ɛ́. Òŋu nákó bɛ̀ɛ́ ti ńɖi-Ɔ̀ɖáyé wá fú ŋa, tsí nákó wáa wíìnyɛ̀ ti nára-òŋu fú ŋa. 27Tsí kíbí ó dzɛ́ ní ti ńǹkpìnkpìlɛ̀-itsɛ́-òŋu ŋa ní à wà tɛ̀ náànyì-òŋu#ɛ́, àŋa gbo, à nákó wà wíìnyɛ̀ ti nára-òŋu fú ɔ̀nyà ŋa.
Đang chọn:
Yòhánà 15: ngl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© (Active), Wycliffe Bible Translators, Inc. All rights reserved.
