Yòhánà 14
14
Yèésù ní òŋu ní dzɛ́ ɔ̀nà yèé lɔ ńɖi-Ɔ̀ɖáyé Boba#á
1Tsí Yèésù nyí, tsí wà wí fú àŋa kpó ní: Ɛ̀ɖɔ̃̀ kó máa ɖá ŋa. Ká karalé si ńǹtá-Ɔ̀ɖáyé, tsí ká karalé si ńǹtá-òŋu gbo. 2Kpáfɛ-Boba-òŋu tsédzú, tsí ilé kpíkpɔ̀ wà ńnɛ̀. Bí kò wà bɛ́ɛ̀#ɛ́, òŋu kàkó wà wíi fú ŋa. Ó ɖi, òŋu làkóò, tsí òŋu kó káà tɔ́tse ìɖì ńbí à nákó wáa gbé#ɛ́ si fú ŋa. 3Tsí bí òŋu lɔ káà tɔ́tse ìɖì#ɛ́ si fú ŋa tã́, òŋu nákó sɛ̃̀ wá, tsí òŋu nákó gbɛ̃́ ŋa lɔ ńɖɔ-ara-òŋu. Ńbɛ̀ɛ́, ńbí òŋu nákó gbé#ɛ́, àŋa gbo, à nákó gbé ńbɛ̀. 4Ó ɖi, à ma ɔ̀nà yèé lɔ ńbí òŋu làkóò#ɛ́.
5Ńbɛ̀ɛ́, Tòmá wà wí fúu ní: Ɔlá-wa, àŋa kò ma ńbí ó làkóò#ɛ́ nɛ́! Bí àŋa nákó nyáa tse fáà, tsí ma ɔ̀nà yèé lɔ bɛ̀#ɛ́?
6Tsí Yèésù wà wí fúu ní: Ɔ̀nà#á, òŋu ká-òŋu gìɖì ni. Tsí òŋu dzɛ́ olí-òtítɔ́, tsí dzɛ́ olí-àyɛ̀ gbo. Ó ɖi, ɔ̀nyà-kã̀ kpókpó, bí kò gbà ńǹtá-òŋu tã́ná, kàkó nyáa lɔ ńɖi-Boba-òŋu. 7Tsí kíbí à ma òŋu#ɛ́, à nákó ma Boba-òŋu gbo. Ó ɖi, ti báàyí gìɖì#ɛ́, à màá, tsí à ríi gbo.
8Ńbɛ̀ɛ́, Fìlíkpò wà wí fúu ní: Ɔlá-wa, ó ɖi, kó ɖíre Ɔ̀ɖáyé Boba#á fú àŋa. Bí ó ɖíreé fú àŋa gé ná, ó ti tó.
9Tsí Yèésù ní: Fìlíkpò! Òŋu wà bá ŋa si báàyí, ó dzɛ̃̀, tsí kò ma òŋu wònáà? Bí ɔ̀nyà-kã̀ rí òŋu, ó rí Ɔ̀ɖáyé Boba gbo ńnɛ̀ɛ́. Bɛ́ fáà, tsí ó wà fɔ̀ ní òŋu kó ɖíre Ɔ̀ɖáyé Boba fú àŋa? 10Kò nɛ́ àkaralé ní òŋu tse ɔ̀kã̀ntso bá Ɔ̀ɖáyé Boba, tsí Ɔ̀ɖáyé Boba gbo tse ɔ̀kã̀ntso bá òŋuù?
Tsí ó nyí, tsí wà wí fú ŋa ní: Afɔ̀ yèé ŋa òŋu wà wí fú ŋa#á, kò ti ńǹsérè tòŋu ká-òŋu. Ɔ̀ɖáyé Boba ní tse ɔ̀kã̀ntso bá òŋu, tsí wà tsitsɛ́‐ɛ̀ ŋa gbà ńǹtá-òŋu#ɛ́. 11Kíbí òŋu wà fɔ̀ fú ŋa ní òŋu tse ɔ̀kã̀ntso bá Ɔ̀ɖáyé Boba, tsí Ɔ̀ɖáyé Boba gbo tse ɔ̀kã̀ntso bá òŋu#ɛ́, ká gbàá gbɔ́. Ó ɖi, bí à kàkó gba afɔ̀-òŋu gbɔ́ gìɖì#ɛ́, ká gba òŋu gbɔ́, àtsùgbé-itsɛ́ yèé Boba-òŋu wà tse gbà ńǹtá-òŋu#ɛ́. 12Ó ɖi, òŋu wà wí òtítɔ́ fú ŋa ní fee, bí ɔ̀nyà-kã̀ gba òŋu gbɔ́, nákó tse iŋɛ́-àwùsì ŋa kíbí òŋu gbo, òŋu náa tse gbà#á. Nákó tse láre òŋu gìɖì ró. Iŋɛ́ yèé tse#ɛ́, òŋu làkóò ńɖi-Boba-òŋu. 13Tsí bí à kpe ɛ́kɔ-òŋu, tsí bere iŋɛ́ ɔ̀kã̀lɔ́ɔ̀kã̀ kpó, òŋu nákó tseé fú ŋa. Òŋu nákó tseé fú ŋa bɛ́ɛ̀, àtsùgbée ɔ̀nyà ŋa kó rí lílákṹ-Ɔ̀ɖáyé Boba gbà ńǹtá-òŋu yèé dzɛ́ ɔma‐ɛ̀#ɛ́. 14Bí à kpe ɛ́kɔ-òŋu, tsí bere òŋu ńŋɛ́-kã̀, òŋu nákó tseé fú ŋa.
Yèésù wà tàlé fú ɔmatsɛ́‐ɛ̀ ŋa ní òŋu nákó bɛ lègbè-kã̀ wá fú ŋa
15Tsí Yèésù wà fɔ̀ ró ní: Bí à nɛ́ àmúɖɔ̃̀ fú òŋu, à nákó wà tse si ńǹtá-iŋɛ́ yèé òŋu wà fɔ̀ fú ŋa ní ká tse#ɛ́. 16Tsí òŋu nákó wí fú Ɔ̀ɖáyé Boba, tsí nákó fú ŋa ńlègbè òmírɛ̃̀-kã̀, tsí lègbè#ɛ́ nákó wà náànyì-ŋa si títí lɔ. 17Lègbè#ɛ́, Mímí-Ɔ̀ɖáyé† ni. Òŋu ké ní dzɛ́ olí-òtítɔ́#ɛ́. Ɔ̀nyà-ayé yèé ŋa kàkó nyáa gbàá, tsí kó wà náànyì-ŋa si. Iŋɛ́ yèé tse#ɛ́, à kò ríi, tsí à kò màá gbo. Ó ɖi àŋa òŋu, à màá. Nákó wà náànyì-ŋa si, tsí nákó wà ńǹtá-ŋa gbo si títí lɔ. 18Báàyí#ɛ́, òŋu kàkó kɔ̀ ŋá dzɔ̀ɔ́ kíbí ɔma-òkú ŋa bɛ́. Òŋu nákó sɛ̃̀ wá ńɖi-ŋa. 19Ó ɖi, ó bɔ oɖé, tsí ɔ̀nyà-ayé yèé ŋa kàkó rí òŋu ró. Àŋa òŋu, à nákó rí òŋu. Òŋu, òŋu ní dzɛ́ olí-àyɛ̀#ɛ́. Tsí ti nára-bɛ́ɛ̀#ɛ́, àŋa gbo, à nákó rí àyɛ̀.
20Tsí ó ní: Bí ɔdzɔ́#ɛ́ wáa tó#ɛ́, à nákó mà ní òŋu tse ɔ̀kã̀ntso bá Ɔ̀ɖáyé Boba. Tsí à nákó mà gbo ní àŋa gbo, à tse ɔ̀kã̀ntso bá òŋu, tsí òŋu gbo, òŋu tse ɔ̀kã̀ntso bá ŋa. 21Ó ɖi, bí ɔ̀nyà-kã̀ mú iŋɛ́ yèé òŋu wà fɔ̀ fú ŋa ní ká tse#ɛ́, tsí ń si néwo si, tsí wà ń tsitsɛ́ tse, ɛnɛ nyɛ̀ŋɛ̀ ní nɛ́ àmúɖɔ̃̀ fú òŋu#ɛ́. Tsí bí ɔ̀nyà-kã̀ nɛ́ àmúɖɔ̃̀ fú òŋu#ɛ́, Boba-òŋu gbo nákó nɛ́ àmúɖɔ̃̀ fú ɛnɛ nyɛ̀ŋɛ̀. Tsí òŋu ká-òŋu gbo, òŋu nákó nɛ́ àmúɖɔ̃̀ fúu, tsí òŋu nákó ɖíre ara-òŋu fúu.
22Kíbí ó wí bɛ́ɛ̀#ɛ́, Yúɖà wà bèrèé ní: Ɔlá-wa, kí tse tsí àŋa sɔ̃́ŋú gé ní nákó mú ara‐ɛ̀ ɖíre fú#ɛ́, tsí kàkó mú ara‐ɛ̀ ɖíre fú ɔ̀nyà-ayé yèé ŋa? (Yúɖà#á, kò tsi Yúɖà Sìkàrìyɔ́tì ni.)
23Tsí Yèésù wá wí fúu ní: Bí ɔ̀nyà-kã̀ nɛ́ àmúɖɔ̃̀ fú òŋu#ɛ́, náa tse si ńǹtá-afɔ̀-òŋu ŋa. Ńbɛ̀ɛ́, Boba-òŋu nákó nɛ́ àmúɖɔ̃̀ fúu, tsí òŋu‐ɛ̀ méèdzì, àŋa nákó wá ńɖɔ̀‐ɛ̀, tsí kí ńɖɔ̀‐ɛ̀. 24Ó ɖi, ɛnɛ yèé kò nɛ́ àmúɖɔ̃̀ fú òŋu#ɛ́, ɛnɛ nyɛ̀ŋɛ̀ kà tse si ńǹtá-afɔ̀-òŋu ŋa gbo. Tsí afɔ̀ yèé òŋu náa wà wí fú ŋa#á, à kà ti ńǹsérè tòŋu ká-òŋu. À náa ti ńɖi-Ɔ̀ɖáyé Boba, ɛnɛ yèé bɛ òŋu wá#á ni. 25Afɔ̀ yèé ŋa#á, òŋu wà wíi fú ŋa kíbí òŋu wà ńɖi-ŋa si báàyí#ɛ́ ni. 26Ó ɖi, bí òŋu kò wáa wà ńɖi-ŋa ró#ɛ́, Ɔ̀ɖáyé nákó bɛ lègbè#ɛ́ wá fú ŋa. Lègbè#ɛ́, Mímí-Ɔ̀ɖáyé ni. Nákó wá òŋu ɛ̀tsɛ-òŋu, tsí nákó kɔ́ ŋa ńŋɛ́ ɔ̀kã̀lɔ́ɔ̀kã̀ kpó, tsí nákó tédzú ŋa ńŋɛ́ yèé ŋa kpó òŋu wí fú ŋa wáa lɔ#ɛ́.
27Báàyí#ɛ́, ká gbé ńtútùúrɔ̀ fòò. Tútùúrɔ̀ yèé wà fú òŋu#ɛ́ ní òŋu wà ń fú ŋa#á. Òŋu kò wà fú ŋa ńnɛ̀ kíbí ɔ̀nyà-ayé yèé ŋa náa fúu gbà#á. Ó ɖi, ɛ̀ɖɔ̃̀ kó máa ɖá ŋa, tsí ká máa wà tsodzo gbo. 28À gbɔ́ kíbí òŋu fɔ̀ ní òŋu làkóò, tsí òŋu nákó sɛ̃̀ wá ńɖi-ŋa ró#ɛ́ nɔ̀! Kíbí à gbɔ́ ní òŋu làkóò ńɖi-Ɔ̀ɖáyé Boba#á, ó má tsi à nɛ́ àmúɖɔ̃̀ fú òŋu#ɛ́, ayè títɛ́ lákṹ-kã̀ ní ó má dzɛ́ fú ŋa#á. Ó ɖi, Ɔ̀ɖáyé Boba lákṹ láre òŋu. 29Òŋu wà wí afɔ̀ yèé ŋa fú ŋa tsúwádzú tã́ná kó wáa tsɛ bɛ́ɛ̀, àtsùgbée ńǹwèrè yèé nákó wáa tsɛ#ɛ́, ni ká nɛ́ àkaralé si ńǹtá-òŋu ni. 30Òŋu kàkó nyáa wíìnyɛ̀ kpíkpɔ̀ bá ŋa ró, iŋɛ́ yèé tse#ɛ́, Ètsù†, ólú-ìtalɛ̀ bí bàa. Kò nɛ́kpá-kã̀ si ńǹtá-òŋu. 31Ó ɖi, òŋu wà tse iŋɛ́ yèé Ɔ̀ɖáyé Boba wí fú òŋu ní òŋu kó tse#ɛ́ ni, àtsùgbée ɔ̀nyà-ayé yèé ŋa ká mà ní òŋu nɛ́ àmúɖɔ̃̀ fúu. Báàyí#ɛ́, àŋa kó ǹɖe, tsí àŋa kó lɔ.
Đang chọn:
Yòhánà 14: ngl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© (Active), Wycliffe Bible Translators, Inc. All rights reserved.
