Yòhánà 16
16
1Òŋu wí afɔ̀ yèé ŋa fú ŋa, àtsùgbée ara kó máa kú ŋa, tsí kó dzɛ́ ní à kò nɛ́ àkaralé si ńǹtá-òŋu ró. 2À nákó wáa lé ŋa ńlé-ìkpàɖé-ɔma-Ìyúɖà ŋa†. Ká fɔ̀ gìɖì#ɛ́, ìwèrè-kã̀ bàa, tsí à nákó kpa ŋá nóòkú. Tsí ɛnɛ yèé ŋa nákó kpa ŋá#á, nákó ɖédzú bí àŋa wà kpa ŋá bɛ́ɛ̀, ni àŋa wà sɛ̃ Ɔ̀ɖáyé ńnɛ̀ɛ́. 3À nákó tse bɛ́ɛ̀, iŋɛ́ yèé tse#ɛ́, à kò ma Ɔ̀ɖáyé Boba, tsí à kò ma òŋu ká-òŋu gbo. 4Ó ɖi, òŋu wà wíi fú ŋa, àtsùgbée bí ìwèrè#ɛ́ wáa tó, tsí iŋɛ́ ŋa#á lɔ bɛ́ɛ̀, ni ká tédzú ní òŋu wíi fú ŋa wáa lɔ.
Yèésù wà wíìnyɛ̀ fú ɔmatsɛ́‐ɛ̀ ŋa, tsí wà ɖíre kíbí lègbè#ɛ́ nákó mɔ́wɔ́ gbè fú ŋa gbà#á
Tsí Yèésù wà fɔ̀ fú ŋa ró ní: Ńǹkpìnkpìlɛ̀ yèé òŋu wà tsɛ̀kɔ́ fú ŋa#á, òŋu kò wíi fú ŋa, iŋɛ́ yèé tse#ɛ́, òŋu wà ńɖi-ŋa si ńǹwèrè nyɛ̀ŋɛ̀.
5Ó ɖi, òŋu làkóò ńɖi-ɛnɛ yèé bɛ òŋu wá#á. Tsí ɔ̀nyà-kã̀ kpókpó náàŋírĩ-ŋa kò wà bere òŋu ní: Ńbisí ò làkóò? 6Òŋu wí afɔ̀ nyɛ̀ŋɛ̀ ŋa fú ŋa gé, tsí inɔ́-ara-ŋa tédzú wà nyɔ́ ŋa. 7Báàyí#ɛ́, òŋu wà wí òtítɔ́ fú ŋa ní, bí òŋu lɔ, nákó sã̀ fú ŋa lárè. Bí òŋu kò lɔ#ɛ́, lègbè#ɛ́ kàkó wá ró. Ó ɖi, bí òŋu lɔ#ɛ́, òŋu nákó bɛ̀ɛ́ wá fú ŋa. 8Tsí bí ó wá#á, nákó nyà ɖíre fú ɔ̀nyà-ìtalɛ̀ bí ŋa ní ìsérè-ŋa kò má ti nára-àbi dzídzɛ, tsí ìsérè-ŋa gbo kò má ti nára-òtítɔ́-Ɔ̀ɖáyé tsítse òŋu ti nára-kíbí Ɔ̀ɖáyé nákó kpɛdzɔ́ fúnɛ gbà#á. 9Nákó fɔ̀ ní ìsérè-ŋa kò má ti nára-àbi dzídzɛ, iŋɛ́ yèé tse#ɛ́, à kɔ̀ ní àŋa kàkó nɛ́ àkaralé si ńǹtá-òŋu. 10Ìsérè-ŋa kò má ti nára-òtítɔ́-Ɔ̀ɖáyé tsítse, iŋɛ́ yèé tse#ɛ́, òŋu làkóò ńɖi-Ɔ̀ɖáyé Boba, tsí à kàkó rí òŋu ró. 11Ìsérè-ŋa kò má ti nára-ɛdzɔ́ kpíkpè, iŋɛ́ yèé tse#ɛ́, Ɔ̀ɖáyé ti kpɛdzɔ́ mú Ètsù†, ólú-ìtalɛ̀ bí#ɛ́ ná.
12Iŋɛ́ kpíkpɔ̀ wà, tsí òŋu kó tɔ́ fɔ̀ fú ŋa ró. Ó ɖi, bí òŋu fɔ̀ɔ́ fú ŋa, à kàkó nyáa tóòsũ̀‐ɛ̀ wòná. 13Ó ɖi, bí Mímí-Ɔ̀ɖáyé†, olí-òtítɔ́#ɛ́ wá, nákó gbɛ̃́ ŋa títí à nákó ma òtítɔ́-Ɔ̀ɖáyé kpó. Kàkó wíìnyɛ̀ fú ŋa òŋu ìsérè tòŋu ká‐ɛ̀. Afɔ̀ kpó yèé nákó gbɔ́ ńɖi-Ɔ̀ɖáyé#ɛ́, ní nákó wí fú ŋa#á. Tsí nákó wí iŋɛ́ yèé nákó wáa wá náànyìwà#á gbo fú ŋa. 14Nákó dzíkɔ̀-afɔ̀-òŋu ŋa gbo fú ŋa. Ńbɛ̀ɛ́, nákó tse tsí ɔ̀nyà ŋa nákó rí iyì-òŋu. 15Ó ɖi, iŋɛ́ ɔ̀kã̀lɔ́ɔ̀kã̀ kpó yèé dzɛ́ ti Ɔ̀ɖáyé Boba#á, ó dzɛ́ tòŋu gbo. Ńnɛ̀ ní òŋu fɔ̀ ní Mímí-Ɔ̀ɖáyé nákó gba afɔ̀-òŋu fɔ̀ fú ŋa#á.
Yèésù yaá fú ɔmatsɛ́‐ɛ̀ ŋa gãgã ní òŋu sɛ̃̀ làkóò ńɖi-Boba-òŋu
16Tsí Yèésù wà fɔ̀ fú ŋa ró ní: Ó bɔ oɖé ńǹsɛ̃̀ɛ̃́, tsí à kàkó rí òŋu ró. Tsí bí ó bɔ oɖé ró#ɛ́, à nákó sɛ̃̀ rí òŋu.
17Kíbí ó wí bɛ́ɛ̀#ɛ́, ɔmatsɛ́‐ɛ̀ kã̀ŋa wà bere ara-ŋa ní: Ó wà wí fú àŋa ní: Ó bɔ oɖé ńǹsɛ̃̀ɛ̃́, tsí à kàkó rí òŋu, tsí bí ó bɔ oɖé ró#ɛ́, à nákó sɛ̃̀ rí òŋu. Tsí ó tɔ́ wí fú àŋa ró ní: Iŋɛ́ yèé tse#ɛ́, òŋu làkóò ńɖi-Ɔ̀ɖáyé Boba. Afɔ̀ mɛ̀ɛ́ àŋa mà ní ó wà wí fú àŋa báàyí?
18Tsí à sɛ̃̀, tsí wà bere ara-ŋa ní: Kí dzɛ́ “ó bɔ oɖé” yèé ó wà wí fú àŋa#á ná? Àŋa kò gbɔ́ òkpì-afɔ̀ yèé ó wà fɔ̀#ɛ́.
19Ńbɛ̀ɛ́, Yèésù mà ní à wà wo ká bere òŋu nóòkpì-afɔ̀#ɛ́, tsí ó wà wí fú ŋa ní: Òŋu wí fú ŋa ní: Ó bɔ oɖé ńǹsɛ̃̀ɛ̃́, tsí à kàkó rí òŋu, tsí bí ó bɔ oɖé ró#ɛ́, à nákó sɛ̃̀ rí òŋu. Ó ɖi, òkpì-afɔ̀ nyɛ̀ŋɛ̀ ní à wà bere ara-ŋa#áà? 20Ó ɖi, òŋu wà wí fú ŋa ní fee, à nákó wà sɔkṹ hɛ̃̀hɛ̃̀hɛ̃̀. Ńǹwèrè nyɛ̀ŋɛ̀#ɛ́, ɔ̀nyà-ayé yèé ŋa nákó wà náyè títɛ́ si. Tsí àŋa òŋu, ara nákó kú ŋa si. Ó ɖi, ara kúkú-ŋa nákó wáa ɖi ayè títɛ́ fú ŋa. 21Bí ɔnɔbɛ̃̀ɛ̃ bòkó bíma#á, ara náa kúu si, iŋɛ́ yèé tse#ɛ́, ó mà ní òŋu bòkó réré. Ó ɖi, bí ó bíma#á tã́#á, náa gbàgbé ìwèrè yèé ara kúu#ɛ́, iŋɛ́ yèé tse#ɛ́, ayè náa wà tɛ́ɛ ní òŋu gbo, òŋu bíma si ńǹtalɛ̀#ɛ́. 22Bɛ́ɛ̀ ké ní àŋa gbo, ara kú ŋa si báàyí#ɛ́. Ó ɖi, òŋu nákó sɛ̃̀ wáa rí ŋa ró, tsí ayè nákó tɛ́ ŋa rere. Ɔ̀nyà-kã̀ kpókpó kò wà, tsí kó nyáa kũ ayè títɛ́ nyɛ̀ŋɛ̀ si nára fú ŋa. 23Bí ɔdzɔ́#ɛ́ tó, à kàkó bere òkpì-iŋɛ́-kã̀ kpókpó ńɖɔ̀-òŋu ró. Òŋu wà wí òtítɔ́ fú ŋa ní fee, bí à kpe ɛ́kɔ-òŋu, tsí bere Ɔ̀ɖáyé Boba ńŋɛ́ ɔ̀kã̀lɔ́ɔ̀kã̀ kpó, nákó fú ŋa ńnɛ̀. 24Títí wáa fú báàyí#ɛ́, à kò kpe ɛ́kɔ-òŋu, tsí bèrèé ńŋɛ́-kã̀ kpókpó wòná. Ó ɖi, ká bèrèé. Nákó fú ŋa, tsí ayè kó tɛ́ ŋa dzálɛ̀.
25Òŋu kpòwe kpíkpɔ̀, tsí ń wíìnyɛ̀ yèé ŋa fú ŋa. Ó ɖi, àsòkò-kã̀ bàa, tsí òŋu kàkó kpòwe, tsí ń wíìnyɛ̀ fú ŋa ró. Òŋu nákó wà wíìnyɛ̀ ti nára-Ɔ̀ɖáyé Boba fú ŋa gãgã ni. 26Nɔ́dzɔ́-ɔdzɔ́ nyɛ̀ŋɛ̀#ɛ́, à nákó kpe ɛ́kɔ-òŋu, tsí bere Ɔ̀ɖáyé Boba ńŋɛ́ yèé à wà wò#ɛ́. Tsí kò bèrè ní òŋu kó tsìkálɛ̀ fúu si nárũ-ŋa. 27Òŋu ká‐ɛ̀ ti nɛ́ àmúɖɔ̃̀ fú ŋa. Ó nɛ́ àmúɖɔ̃̀ fú ŋa bɛ́ɛ̀, iŋɛ́ yèé tse#ɛ́, àŋa gbo, à nɛ́ àmúɖɔ̃̀ fú òŋu, tsí à nɛ́ àkaralé ní ńɖɔ̀‐ɛ̀ ní òŋu ti#ɛ́. 28Ìɖéǹɖè#ɛ́, ńɖi-Ɔ̀ɖáyé Boba ní òŋu ti#ɛ́, tsí òŋu wá ńǹtalɛ̀ bí. Báàyí#ɛ́, òŋu bòkó ǹɖe ńǹtalɛ̀ bí, tsí òŋu kó sɛ̃̀ lɔ ńɖɔ̀‐ɛ̀.
29Kíbí ó wí afɔ̀ nyɛ̀ŋɛ̀#ɛ́, ɔmatsɛ́‐ɛ̀ ŋa wà wí fúu ní: Ɛ̀hɛ̃́ɛ̃̀ɛ̃̀, ó wíìnyɛ̀ gãgã fú àŋa báàyí ńǹkɛ̀ɛ́. Kò wà kpòwe ŋa ró. 30Báàyí#ɛ́, àŋa mà ní ó ma iŋɛ́ ɔ̀kã̀lɔ́ɔ̀kã̀ kpó. Tsí kò bèrè ní ká bèrèé náfɔ̀-kã̀ tã́ná òŋu ká‐ɛ̀ kó ma iŋɛ́ yèé à wà wò#ɛ́. Ńnɛ̀ ní àŋa nɛ́ àkaralé ní ó ti ńɖi-Ɔ̀ɖáyé#ɛ́.
31Tsí ó wà bèrè ŋá ní: À nɛ́ àkaralé ńǹkɛ̀ɛ́ɛ̀? 32Ó sã̀! Ó ɖi, ìwèrè-kã̀ bàa, tsí ó ti tó gìɖì ná, tsí àŋa kpó, à nákó túùnkã́ wérí, tsí ɛnɛ kṹnukṹ nákó lɔ ńbí ó mà#á, tsí à nákó kɔ òŋu níìkã̀ntso dzɔ̀ɔ́. Ó ɖi, òŋu kà kí òŋu níìkã̀ntso láyé. Ɔ̀ɖáyé Boba náa wà náànyì-òŋu si. 33Òŋu wà wí afɔ̀ yèé ŋa fú ŋa, àtsùgbée ká tse ɔ̀kã̀ntso bá òŋu, tsí ká gbé ńtútùúrɔ̀ si ni. À nákó réré ńǹtalɛ̀ bí. Ó ɖi, ká gbódzú. Òŋu, òŋu ti dzàdzàbɔ́-ikpá yèé wà ńǹtalɛ̀ bí#ɛ́ ná.
Đang chọn:
Yòhánà 16: ngl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© (Active), Wycliffe Bible Translators, Inc. All rights reserved.
