Números 27
27
Zelofehadpa warmi churinkuna allpata mañakusqankumanta
1Joseypa churinmi karqa Manasés, Manasespañataq Maquir, Maquirpañataq Galaad, Galaadpañataq Hefer, Heferpañataq Zelofehad. Zelofehadpam karqa pichqa warmi churinkuna: Maala, Noa, Hogla, Milca hinaspa Tirsa. 2Paykunam Diosman asuykuna carpapa punkunman rirqaku, Moiseswan, sacerdote Eleazarwan hinaspa ayllukunapa kamachiqninkunawan rimanankupaq; hinaspam nirqaku:
3Taytayku Zelofehadmi chunniqpi wañukurqa. Payqa manam wañukurqa Tayta Diospa contranpi hoqarikuq Coreypa umachasqankunawan kuskachu, aswanqa kikinpa huchanmantam wañukurqa, manam qari churin karqachu. 4Chaynaqa, ¿imanasqataq taytaykupa sutin ayllunkunamanta chinkachisqa kanqa? ¿Mana qari churiyuq kasqanraykuchu sutin chinkachisqa kanqa? Chaynaqa, ruegakuykikum ñoqaykumanpas taytaykupa wawqenkunaman qosqaykichik allpatawan kuskata qoykuwanaykikupaq, nispanku.
5Hinaptinmi Moisés chay warmikunapa nisqanta Tayta Diosman willarqa. 6Tayta Diosñataqmi nirqa:
7 #
Nm 36.2. Zelofehadpa warmi churinkunaqa allintam nichkanku, imaynam tionkuman herencia allpa qosqaykichikta hinayá wañukuq taytankumanpas tupaqnin allpata qoychik, chaynapi taytankuman tupaqnin allpa warmi churinkunapaqña kananpaq. 8Hinaspam Israelpa mirayninkunata kaynata ninki: “Qamkuna ukupi mana qari churiyuq pipas wañukuptinqa warmi churinkunamanñam chay allpata qonkichik. 9Sichum warmi churinpas mana kaptinqa, chay allpatam wañukuqpa wawqenkunamanña qonkichik. 10Chay wañukuqpa wawqenkunapas mana kaptinqa, wañukuqpa taytanpa wawqenkunamanñam qonkichik. 11Sichum chay wañukuqpa taytanpa wawqenkunapas manaña kaptinqa, chay wañukuqpa hichpa ayllunmanñam qonkichik”, nispa. Kay kamachikuymi Israelpa mirayninkunapaq kanqa imaynam qanman kamachisqayman hina.
Moisespa rantinpi Josué akllasqa kasqanmanta
(Dt 31.1-18)
12Moisestam Tayta Dios kaynata nirqa:
Abarim orqoman riy, chay orqomantam Israelpa mirayninkunaman qosqay allpata qawarinki. 13Chay allpata qawaykuspaykiñam wañukunki, hinaspam wawqeki Aaronpa hinaspa ñawpaq taytaykikunapa kasqanman rinki. 14#Dt 3.23-27; 32.48-52.Zin chunniqpi llapa runakuna contraypi hatarispanku yakuta mañakuptinkum mana kasuwaspaykichik chuya kayniyta mana qawachirqankichikchu. Chaymi lloqsiq yakuta Meriba nispa suticharqaku, chayqa Cades lawpi Zin chunniqpim kachkan.
15Chaymi Tayta Diosta Moisés nirqa:
16Llapallan runakuna kawsachiq Dios Taytalláy, qamyá hukkaqninta akllay llaqtaykita kamachinanpaq, 17llaqtaykita mayman risqankupi puntaman pusananpaq, chaynapi runaykikuna mana michiqniyuq ovejakuna hina mana kanankupaq, nispa.
18 #
Ex 24.13. Tayta Diosñataqmi nirqa:
Nunpa churin Josueymi espiritupa huntasqan kachkan, payta akllaspam umanman makikita churanki. 19Hinaspam sacerdote Eleazarpa qayllanpi chaynataq llapallan runakunapa qayllanpi sayachinki. Paykuna qawachkaptinkum imam ruwananta ninki. 20Paymanmi atiynikita qonki Israelpa mirayninkuna paytaña kasunankupaq. 21#Ex 28.30; 1 S 28.6.Sacerdote Eleazarpa ñawpaqninpi Josué sayaykuptinmi paypaq Urim rumintakama Eleazar tapuwanqa. Josueymi Israelpa llapallan mirayninkunaman tukuy ima ruwanankuta kamachinqa, nispa.
22Tayta Diospa kamachisqanman hina Moisés ruwaspanmi Josueyta sacerdote Eleazarpa hinaspa huñunasqa runakunapa ñawpaqninpi sayachirqa. 23#Dt 31.23.Paypa umanman Moisés makinkunata churaspanmi imam ruwanankunata nirqa imaynam Tayta Diospa kamachisqanman hina.
ที่ได้เลือกล่าสุด:
Números 27: RCHQ2
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chuya Qellqa Revisión @ Sociedad Bíblica Peruana, 2012