Números 28
28
Sapa punchaw ofrendakuna qonankumanta
(Ex 29.38-46)
1-2Israelpa mirayninkunaman ninanpaqmi Moisesta Tayta Dios kaynata nirqa:
Tantamanta ofrendaytawan kañapuwanaykichik ofrendaytapas imam nisqay punchawpim ofrecemuwankichik, chaykunam ñoqapaq miskillaña asnariq ofrenda kanqa. 3Ñoqa Tayta Diospaq kañapuwananku ofrendakunamantapas kaynatam ninki: Watayuq iskay sano carnerokunatam lliw kañana sacrificiota mana tipiyta sapa punchaw ofrecewankichik. 4Huknin carnerotam tutapayta ofrecewankichik, huknintañataqmi inti seqaykuyta. 5Chaykunataqa aceitunasmanta hurqosqa huk litro aceitewan chapusqa iskay kilo fino harinayuqtam ofrecewanki. 6Sinaí orqopi kamachisqayman hinam chaykunataqa lliw kañana sacrificiota sapa punchaw ofrecewankichik, chaykunam ñoqa Tayta Diospaq miskillaña asnariq ofrenda kanqa. 7Sapa carnerotam huk litro vinoyuqta ofrecewankichik. Chay vinotam ñoqa Tayta Diospaq santuarioypi tallinkichik. 8Inti seqaykuytapas imaynam tutapayta ofrecewasqaykita hinam ofrecewanki, chapusqa harinayuqta hinaspa vinoyuqta. Chaykunam ñoqa Tayta Diospaq miskillaña asnariq ofrenda kanqa.
Samana punchawpi ofrendamanta
9Samana punchawpim watayuq iskay sano carnerotawan aceitewan chapusqa tawa kilo fino harinata tallinapaq vinoyuqta ofrecemuwankichik. 10#Mt 12.5.Sapa punchaw lliw kañana sacrificiota ofrecemuwachkaspaykichikpas, sapa samana punchawpim chaykunata vinoyuqta ofrecemuwankichik.
Musoq killapi ofrenda qonankumanta
11Sapa killapa qallariyninpim ñoqa Tayta Diosman iskay malta torokunata, huk carnerota hinaspa watayuq qanchis sano carnerokunata ofrecemuwankichik. 12Sapa malta toromanmi aceitewan chapusqa soqta kilo fino harinata yapankichik, sapa carneromanñataqmi aceitewan chapusqa tawa kilo harinata. 13Watayuq carneropaqñataqmi sapakamapaq aceitewan chapusqa iskay kilo fino harina kanqa. Chayqa ñoqa Tayta Diospaq lliw kañana miskillaña asnariq ofrendam kanqa. 14Huk malta toromanmi iskay litro vinota tallinkichik, huk carneromanñataqmi litro parten vinota, sapa huk watayuq carneropaqmi kanqa huk litro vino. Sapa killa qallariytam chaykunata lliw kañana animalta ofrecewankichik. 15Sapa punchaw lliw kañana ofrendamantapas, hucha pampachana ofrendapaqmi ñoqa Tayta Diosman huk chivatota tallinapaq vinoyuqta ofrecemuwankichik.
Pascua Fiestapi ofrendakunamanta
(Lv 23.5-8)
16 #
Ex 12.1-13; Dt 16.1-2. Punta kaq killapa chunka tawayuq punchawninpim ñoqa Tayta Diospaq Pascua fiestata ruwankichik. 17#Ex 12.14-20; 23.15; 34.18; Dt 16.3-8.Chunka pichqayuq kaq punchawpiñataqmi hatun fiesta kanqa; qanchis punchawmi mana levadurayuq tantata mikunkichik. 18Chay fiestapa qallarisqan punchawpim hatun huñunakuyta ruwankichik. Chay punchawqa amam pipas llamkanqachu. 19Ñoqa Tayta Diosmanmi lliw kañana sacrificiota iskay malta torota, huk carnerota chaynataq watayuq qanchis carnerokunata ofrecemuwankichik. Chay animalkunaqa sanokamam kanqa. 20Sapa toromanmi aceitewan chapusqa soqta kilo fino harinata yapankichik, huk carneromanñataqmi tawa kilo harinata, 21watayuq qanchis carneromanñataqmi sapakamaman iskay kilo harinata yapankichik. 22Huk chivatotam hucha pampachasqa kananpaq ofrecemuwankichik. 23Sapa tutapayta lliw kañana sacrificiota ofrecewasqaykichikmantapas tukuy chaykunatam ofrecewankichik. 24Qanchisnintin punchawmi chaynallata ruwankichik, chaykunam ñoqa Tayta Diospaq miskillaña asnariq ofrenda kanqa. Sapa punchaw lliw kañana sacrificiota ofrecewasqaykichikmantapas chaykunatam vinoyuqta ofrecemuwankichik. 25Chay fiestapa qanchis kaq punchawninpim hatun huñunakuyta ruwankichik. Chay punchawqa amam pipas llamkanqachu.
Kawsaykunapa punta kaq rurun ofrendamanta
(Lv 23.9-22)
26 #
Ex 23.16; 34.22; Dt 16.9-12. Semanakuna fiestapi otaq kawsaykunapa punta kaq rurunta Tayta Diosman apamuna fiestapim hatun huñunakuyta ruwankichik, chay punchawqa amam pipas llamkanqachu. 27Ñoqa Tayta Diosmanmi iskay malta torokunata, huk carnerota hinaspa huk watayuq qanchis carnerokunata lliw kañana miskillaña asnarichkaq ofrendata hina ofrecemuwankichik. 28Sapa toromanmi aceitewan chapusqa soqta kilo fino harinata yapankichik, huk carneromanñataqmi tawa kilo harinata, 29watayuq qanchis carnerokunamanmi sapakamaman iskay kilo harinata yapankichik. 30Huk chivatotañataqmi huchaykichik pampachasqa kananpaq ofrecemuwankichik. 31Sapa punchaw lliw kañana sacrificiota ofrecewachkaspapas, tukuy chaykunatam kawsaykunamanta ofrendayuqta hinaspa tallinapaq vinoyuqta ofrecemuwankichik. Chay animalkunaqa sanokamam kanqa, nispa.
ที่ได้เลือกล่าสุด:
Números 28: RCHQ2
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chuya Qellqa Revisión @ Sociedad Bíblica Peruana, 2012