Exodo 29
29
A' xi b'a k'ab' Dyos ja pagre jumasa
1Ja Moisesi, alji yab' yuj ja Dyos ja sb'ej ja oj stsa' ja pagre jumasa, ti alji yab'a:
—Le'a jan jun yal chin wakax, sok chab' chej b'a mey syajb'el. 2I'aj jan t'un arina b'a jel lek xa wila, wots'o lek sok aceite, k'u'lan sok waj, b'a pimik mok wa ochyi levadura, kechan tsijun yi aceite. 3Ja waji ti xwa och b'a jun mo'och, ti'xa wi'aj och b'a snajtsil tsomjel, jach'ni ja wakax sok ja cheji.
4—Tsa'an ti'xa wi'aj och ja Aaron sok ja yuntikil b'a ti' ja na'its b'a wax ajyi ja tsomjeli, ala yabye a noxjuke lek. 5-6A' slap ja sk'u' ja Aaron it kal a wab' oj ja tojb'es yi'i, a' ochyi ja yal lechan tak'ini, b'a ti' oj chiknajuk jel niwan ja ya'tel ja ye'ni. 7Pek'ayi aceite tsa'ub'al ja s'olomi, b'a oj na'xuk mi tukuk ja ya'teli.
8-9Yajni xch'ak a chap ja Aaroni, ti xcho a paya ja yuntikili, pek'a yi' aceite ja s'olome'i yuj ja oj ochuke pagre'ili. A' slap ja sk'u'e it k'u'lub'al yi'e'i; tojb'es lek ja syujch'ile sok ja sgorra'e'i, jach' ja jastal tojb'el sb'a Aaroni. Man ya'n wax ochye pagre'il sok ja yuntikili, ja a'tel iti sb'a spetsanil k'ak'u ja janek' oj ayuk sak'anile'i, mey jastal oj ya'we kan ja a'tel iti.
10—I'aj och b'a na'its ja yal wakaxi, ala yab' ja Aaron sok ja yuntikil a ya'we kajan ja sk'ab'e b'a s'olom ja yal wakaxi. 11Jaxa we'n, ti'xa mila b'a wax ajyi ochel och b'a yoj snajtsil b'a wax ajyi ja tsomjel b'a mojan b'a sti' kaltar. 12Mulu chik' ja wa yal k'ab'i, ti'xa jaxa yi b'a sxulub' ja kaltari, jaxa janek' oj kanuki ti'xa pek'a b'a mojan sti' kaltar. 13A' eluk ja skojlelal b'a schaktopi, b'a schok'oli, sok b'a srinyoni, ti'xa tsika b'a sat kaltar. 14Ja wakax it milxi b'a oj ch'ay ja mulal jumasa, ja'yuj, ja sb'ak'teli, ja sts'ujmil sok ja sk'oyi, ti'xa tsika b'a jwera, mok a ts'ik ja b'ay ja kristyano jumasa.
15—Cho i'aj junuk ja chab' cheji, a ya'we kajan ja sk'ab'e ja Aaron sok ja yuntikil b'a s'olomi. 16Ti'xa mila'a, jaxa schik'eli tsijun yi b'a sts'e'el jumasa ja kaltari. 17Chok'b'es spetsanil ja sb'ak'teli, sak'a lek ja schaktop sok ja yok sk'ab'i, ch'akan a sta' sb'aj sok ja it a chok'b'esta. 18Ch'akan tsika spetsanil b'a sat kaltar, jun jmajtan b'ax ajb'ani xta yik'il oj kab' ja b'ak'et jawi, yujni ke'n waxa wa'wexki yuj ja wa xch'aya ja wa mulexi.
19—Cho i'aj ja pilan cheji, a ya'we kajan ja sk'ab'e ja Aaron sok ja yuntikili, 20ti'xa mila'a, jaxa schik'eli jaxa yi' b'a yib'el stojol schikine ja Aaron sok ja yuntikili, b'a stolanil stojol yal sk'ab'e, sok b'a stolanil stojol yal yoke, jaxa janek' oj kanuki, ti'xa tsijun yi b'a sts'e'el jumasa ja kaltari. 21Jaxa chik' oj sta kan ja kaltari, tsijun yi ja sk'u'e ja Aaron sok ja yuntikili, a' ochyi t'un aceite, b'a jach' ti oj na'xuk mi tuk winikuke ja ye'nle'i, cho jach'ni ja sk'u' wa slapawe'i.
22—Ja chej makuni b'a tsa'xi ja pagre jumasa, a' pilan ja skojlelal sneji, b'a schaktopi, b'a schok'oli, b'a stojol yechmali, b'a schab'il ja srinyoni.
23—Ja smo'ochil waj it mey yi'oj levadura ja it ti kajan b'a sat kaltari, a' el jun waj b'a ay yi'oj aceite sok jun gayeta. 24Spetsanil ch'akan a'yi b'a sk'ab' ja Aaron sok ja yuntikili, ye'n oj snik e ki' b'a stij sati, jun majtanal mi tukuk. 25Tsa'an we'n oj cho ya' b'a a k'ab' ja waj sok ja b'ak'eti, ti'xa tsikaki b'a sti' kaltar, ja majtanal iti x'ajb'ani'xta yik'il oj kab'i.
26—Yajnixa tsa'a ja Aaron b'a oj och pagre'ili, i'aj ja sni sk'ujol ja cheji, a' ki' kajan b'a sat kaltar ja jastalni k'ajyela, ja wa'el jawi we'n a b'aj, 27-28Jaxa Aaron sok ja yuntikili, ye'n sb'aje ja sni' sk'ujol sok ja sb'ak'tel yechmal ja chej it makuni yujile'i, ja'yuj man ya'n ja israelenio jumasa, oj k'a ya'weki jun chej sb'a jmajtan yujni oj ch'ayi'e ja smule'a, jaxa Aaron sok ja yuntikili, sb'aj ni ye'nle ja sni' sk'ujol sok ja sb'ak'tel yechmal ja chante jumasa jawi. Ja iti jun ab'al b'a mi oj ch'ay sk'ujole.
29—Jaxa spal k'u' ja Aaroni, oj b'ob' ya'yi ja yintil jumasa, ja yajni stsa'ji ye' b'a oj ochuke pagre'ili. 30Jaxa ma oj och b'a yoj na'its ja jastal ja pagre jumasa, t'ilan oj slap juke k'ak'u ja k'u'al wa slapa ja pagre jumasa.
31—Ja sb'ak'tel ja chej it makuni yujile ja Aaron sok ja yuntikili, tsa'a b'a oj ja ts'ana, ja b'a oj tsa'i, yujni ja'ita oj scholuka. 32-33B'a wax ajyi ocheli ja na'itsi, ti oj sk'ux'e' tiw ja b'ak'et ja Aaron sok ja yuntikili, jach'ni ja waj it tey b'a mo'ochi, ti oj ch'ak swe'e tiwi, sok ja wa'el it makuni yujile b'a oj ochuke pagre'ili, cho ja'ni yuj ja wa'el jaw ja jch'aya yi ja smule'i. 34Ta ay k'a kan t'usan ja wa'el sok ja waji ja b'a pilan k'a'uji, ojxa b'ob' tsikxuk, mok xa ma yab'i yuj ja mi tuk wa'eluki.
35—Ja k'in oj ajyuk ja yajni oj yi' ya'tele' ja Aaron sok ja yuntikili, oj alb'uk juke k'ak'u, jach' oj k'u'laxuk spetsanil ja jastal kala wab'i. 36-37Ja b'a k'in jawi, oj ja mil'ex ki jun yal wakax b'a jujune' k'ak'u ja janek' oj alb'uk ja k'ini, b'a jach' oj ch'ay a wi'ex ja wa mulexi, jaxa kaltari a' ajyuk chapan b'a oj makunuk kuj. Pek'ayi aceite b'a kechan ja oj makunuk b'a jtoyjeli, chikan jas oj a'xuk kajan ja tiwi, yujni jb'aj xa ke'na'a.
Ja smajtan ja Dyos b'a jujune' k'ak'u
38—B'a jujune' k'ak'u oj ja mil ki chab' chej b'a sat kaltari, b'a jun jab'il yi'oj. 39Mila june b'a sakb'eli sok june b'a och k'ak'u. 40Ja it oj ja mil b'a sakb'eli, a ochyi chab' kilo lekil arina, soko sok jun nalan ye'tal aceite olivo. Cho pek'a yi jun ye'tal ya'al ts'usub' ja kaltari, jach'ni jastal jun jmajtan. 41Cho jach'ni oj ja k'u'l sok ja jun chej, oj ja mil b'a och k'ak'u.
—Ja chej jumasa, ja arina, ja ya'al ts'usub'i, oj ni ch'ak tsikxuka, x'ajb'anixta yik'il oj kab'i. 42-43Jach' oj cho sk'u'luke'i ja israelenio sok ja yintile jumasa, ti oj stsik e' b'a mojan wax ajyi ochel ja b'a na'itsi. Ti' oj jta jb'aj soke tiw ja ye'nle'i, jachuk ja we'n ti oj cho jk'umuk jb'ajtik tiwi. Ja tiwi tsa'ub'alni'a. 44Jach'ni ja na'itsi, ja altari, ja Aaron sok ja yuntikili, tsa'ub'alni'a, yuj kechani ke'n oj makunuke kuja. 45Ja ke'n ti oj ajyukon b'a snalane ja israelenio jumasa, ke'nani Dyos yujilone'a. 46Jach' oj jak sk'ujole b'ay ja Dyos yujile'i, yuj ke'nani ka' eluke b'a sk'ab ja b'a Egipto'a.
ที่ได้เลือกล่าสุด:
Exodo 29: YABD
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© Sociedad Bíblica de México 2021