Exodo 30
30
Ja altar sb'a pomi
1-2—Wa xcho jk'ana oj ja k'u'l jun altar sok te' sb'i'il acasia ja b'a oj tsikxuk ja pomi. Ja altar jawi, jun xta b'isol oj kanuk, a'yi chab' ch'ile sok ox k'ab'e b'a jujune' sts'e'el ja scha'anili, a'yi chan ch'ile sok snalan. B'a jujune' schikin a och sgancho'il jastal sxulub', ja altar jawi june ita oj kanuk, 3Spetsanil oj potsxuk sok k'anal tak'in sjoyanal, oj och jun yal stak'inil b'a k'anal tak'in. 4Jach'ni ja yal stak'inil b'a yib'eli, a och yargoya'il b'a jujune' schikin, a och ste'il, b'a jach' oj b'ob' likxuk ek' ja altari. 5Ja ste'il oj wa' och b'a yib'eli a ochyi te' sb'i'il acasia potso sok k'anal tak'in. 6Ja altari ti'xa wa'a b'a sts'e'el ja niwan k'u'uts b'a lugar tsa'ub'ali, ja it b'ay ja skajonil ja trato. Cho ti oj ta' jb'ajtik tiwi.
7—Spetsanil ja sakb'el jumasa yajni oj jak schap ja ijlab'anub' jumasa ja Aaroni, t'ilan oj cho stsik pom ja b'a sat kaltar yuj ja oj stoy'oni. 8Jach'ni oj cho sk'u'luk ja b'a och k'ak'u jumasa yajni oj jak ya ajluk ja k'ak'i. Man ya'n sok jach'ni oj k'u'laxuk spetsanil k'ak'u.
9-10—Ja b'a altar jawi, tsa'ub'alni'a. Mi oj b'ob' tsikxuk chante, mini sat tek'ul, mini oj b'ob' pek'xuk ya'lel ts'usub'; kechan oj b'ob' tsikxuk ja pom it jex ajb'ani yik'ili. Jun majke b'a jujune' jab'il, oj b'ob' stsik ja chante ja pagre b'a oj jch'ay ja mulal jumasa, jaxa schik'el ja chante jawi, ti oj spek' b'a schab'il sxulub' ja yaltaril ja pomi.
Ja ab'al sb'a ochel ju'uni
11Ja Dyosi, sk'uman ja Moisesi, ti yala yab'a:
12—Na'a lek kechan ke'n oj b'ob' ka och ju'un spetsanil ja sb'i'il ja israelenio jumasa. Kechan ta yuj k'a we'n oj k'a'a k'u'luk, oj ja k'an yi'e' jun limosna ja israelenio jumasa, b'a jach' mi oj ch'ay sna'jele, cho mini oj jek yi'e chamel b'a mi oj sta'e yajnal.
13-15—B'a oj b'ob' jkolta spetsanil ja israelenio, ma ek'el xa ja jun tajb'e jab'ili a ya'weki jo'e sakal tak'in, yujni ja snalan ja janek' oj ya'e ja tuk jumasa'a, yuj ja ti'ni oj makunuk b'a na'itsa, mini ja ma jel yi'oj oj ya mas, sok mini ja ma jel ajula sb'aj oj ya' ko'el.
16—Spetsanil ja tak'in oj ya'we a wi' ja israelenio jumasa, a ek yi ja pagre jumasa, b'a jach' oj sta'e jastal oj schap'e lek ja kulto jumasa b'a na'itsi. B'a jach' oj na' ja israelenio stupuweta'a, b'a mixa oj ch'ay sna'jele'a.
Ja ye'tal b'a bronce
17Ja Dyosi, sk'uman ja Moisesi, ti yala yab'a:
18—Wax k'ana oj ja k'u'l jun ye'tal b'a bronce, ja yok jumasa bronce. B'ut'u ya'lel ti'xa wa'a b'a snalan ja na'its ja b'ay ja altari, 19-21jujune' majke oj ochuk ja Aaron sok ja yuntikili, ti oj sak' e' tiw ja sk'ab'e sok ja yoke'i. Oj cho makunuk b'a oj sak' e' ja sk'ab'e sok ja yoke ja yajni oj stsik e' jmajtan b'a kaltari. Ja iti jun ab'al b'a jel t'ilan oj sk'u'uke ja Aaron sok ja yuntikili. Ta sk'u'anek'a mini oj chamuke'a, —xchi ja Dyosi.
Ja aceite b'a tsa'ub'ali
22Ja Dyosi, sk'uman ja Moisesi, ti yala yab'a:
23-25—Ja aceite it tsa'ub'ali, kechan ja oj pekxukyi ja jastik jumasa b'a kechan ke'n oj makunuk kuji. Jach' oj ja tojb'es jastal wax tojb'i ja lekil perjume.
—Yajni oj ja tojb'esi, ja oj wa ochyi ja it jumasa: Oxe prasko sok snalan aceite olivo, sokan lek sok tuktukil yal k'ul b'ax ajb'ani lek yik'il. Ja janek' oj ochuki b'isub'al sok likub'al, ja chikan jastal ja sb'isol it tey b'a na'itsi.
26—Ja aceite iti, ja oj ja pek'yi ja na'itsi, sok ja skajonil ja trato, 27-28sok ja mesa, sok ja kandelerio, sok ja yaltaril ja pomi, sok ja altar b'a wa xtsikxi ja smajtan ja Dyosi, sok ja ye'tal b'a bronce, sok ja yok jumasa, sok spetsanil ja jas wa xmakuni kuj b'a wax tsikxi ja jmajtani. 29Yajni xa k'u'lani, spetsanil ja jastik oj och jan b'a oj makunuki, wanxax kan ajtab' kechan ke'n oj makunuk kuj, oj talnaxuk lek yuj ja tsa'ub'ali. Ta ay k'a jas och jan smoj sok ja jastik jumasa iti, yujni ti'xa oj kan b'a oj makunuk kuj ke'na'a.
30—Cho jach' jun xta ja aceite it oj wa makunuk b'a oj ja jaxyi ja Aaron sok ja yuntikil b'a oj ochuke pagre'ili. 31Ala yab' ja kristyano jumasa, kechan ja aceite jaw oj makunuk a wujilex b'a ka'teli. 32Sok mi chikanxta machun oj ja pek'ex yi, mi oj b'ob' a tojb'esex b'a oj makunuk b'a tuk schol. Ja aceite jawi tsa'ub'al yajtayik lek. 33Ta ay k'a ma' oj stojb'es ja aceite jastal ja it b'a ye'n oj makunuk yuj ma chikan ma oj spek' yi, ja kristyano jastal jawi, oj nutsxuk ele.
Ja pomi
34-37Ja Dyosi, yala yab' ja Moisesi:
—Ja pom oj tsikxuk b'a jtoyjeli, t'ilan oj talnaxuk lek b'a mi oj jomuk b'a kechan ke'n oj makunuk kuj. Jach' oj ja chap jastal iti, a och pom, sok jun b'a tsamal yik'il. B'a oj chapxuk ja perjume iti, oj sokxuk lek sok ja smoj jumasa, sok junxta ja ya'ayili, chok' lek, oj juch'xuk sok ja sojkili. Yajni tojb'ita, ti'xa wi'aj och b'a snajtsil ja tsomjeli, a ochyi b'a sti' sat ja skajonil ja trato. Ja iti jun pom mi tukuk ja'ni b'a oj makunuk kuji, jel t'ilan oj ja yajtayex lek. Mi ma oj b'ob' stojb'es ja jastal it b'a ye'n oj ya makunuk. 38Chikan ma oj yal oj sk'u'luk ja jastal iti, oj nutsxuk ele.
ที่ได้เลือกล่าสุด:
Exodo 30: YABD
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© Sociedad Bíblica de México 2021