Exodo 28
28
Ja sk'u'e ja ma' niwan ja ya'tel yuj ja pagre jumasa
1—B'a spetsanil ja israelenio jumasa, ja ke'n jtsa'ata ja wa moj alijel Aaron sok ja yuntikil b'a oj ochuke pagre'il, ja sb'i'ile'i, ja' it jumasa'i, Itamar, Nadab, Abihu sok Eleazar. Ja'yuj ala yabye a' ajyuke mojan a mok.
2-8—Wax k'ana k'u'lan yi'e jun sk'u'e' b'a mi tukuk yuj ja pagre'exa. Le'a ja ma ka'oj yi ja a'tel jawi, b'a oj stojb'ese tsamal ja k'u'uts jawi, wax k'ana b'a lek sok tsamal jastal ni wa slapa ja pagre jumasa.
—Ja k'u'al jawi, t'ilan oj ajyuk sok schompa'il, spal k'u'il, syujch'il, sgorra'il, ts'isub'al lek, ja k'u'uts oj k'u'laxuk soki b'a tuktukil yelaw, b'a chak muk muk, b'a k'ik' muk muk, b'a chak lek, sok b'a lekil k'u'uts, oj ts'isxuk sok k'anal tak'in. Ja pal k'u'i' oj och yak'il b'a spatikili, sok syuch'ulab'il.
9—Ja sb'i'ile ja lajchaw k'ole yuj ja israelenio jumasa, t'ilan oj ts'ijb'axuk b'a chab' ton sb'i'il Onise b'a tuktukil yelaw, 10B'a jujune' ton waktike b'i'ilal oj ts'ijb'axuk. 11-14Ja ma oj stojb'esi, oj ya ochyi k'anal tak'in ja chab' ton jawi, oj ya och chab' yak'il b'a toj k'anal tak'in, oj sts'ijb'a ja b'i'ilal jumasa jastal jun seyo, ti oj ya ochkan b'a stejlub'il sk'u' ja Aaroni. Ja chab' ton jawi, ti'ni oj ajyuk tiwa, jaxa yajnix jak sje' sb'aj ki ja pagre jawi, ti oj jak jk'ujol ja lajchaw k'ole sb'a israelenio jumasa.
Ja schompa ja ma' niwan ja ya'tel yuj ja pagre jumasa
15Ja schompa oj slap ja pagre Aaron b'a oj sna' ja jas wax k'ana, ja oj ja tojb'es sok ja jun xta k'u'uts it a tojb'es sok ja sk'u'i. 16Wax k'ana junxta sniwanil oj ja k'u'luk, a' skum akan jun ch'ile sok jun k'ab'e b'a jujune' sts'e'el ja snajtili. 17-21Ja chompa'al jawi, nok'o yi lajchawe yal tsamal ton sb'a yelaw, jujune ja yal ton jawi, ja' oj slaj ja jujune' k'ole yi'oj ja israelenio jumasa. Ch'akan cholo lek, a yi' sb'aj oxtike ton b'a jujune' chol, jujune' ton t'ilan ay yi'oj k'anal tak'in, cho jach'ni b'a jujune' ton ti oj ts'ijb'axuk ja sb'i'il ja jujune' k'ole yi'oj ja israelenio jumasa.
22-24B'a schab'il spejk'ul ja chompa'ali, a och jujune yargoya'il k'anal tak'in, cho k'u'lan chab' yal skadena'il sok k'anal tak'in, a och b'a jujune' yargoya'il. 25Jaxa pilan sni' ja yal kadena ti oj ja moch b'a yal tsamal ton it a nok'onej b'a stejlub'il ja k'u'ali.
26—Oj cha wa och jujune yargoya'il b'a k'anal tak'in, ja b'a yojol ja chompa'ali, b'a jach' june ita oj kan sok ja spal k'u'i. 27-28Ja stiman yak'il ja pal k'u' jawi, oj cha wa och yargoya'il b'a k'anal tak'in, ja lajan oj kan sok ja b'ay ja yargoya'il b'a yojol ja chompa'ali. Ja yargoya'il ja chopa'ali, ja' oj sta' sb'aj sok ja yargoya'il ja pal k'u'i', oj cho wa och jun yak'il b'a chak muk muk, jachuk satilajel oj kanuk ja chompa'al yuj ja yak'il ja pal k'u'i, b'a jach' mi oj spil sb'aj.
29-30—Jaxa Aaroni, yajni oj ochuk ja b'a stij sati, oj ni slap ja schompa'a, sok ti ts'ijb'anub'al b'a sni' sk'ujol ja sb'i'il ja k'ole jumasa yuj ja israelenio, b'a jach' ti oj jna'e spetsanil k'ak'u. Cho jach'ni jel t'ilan oj yi'e och b'a jun ye'tal ja Urim sok ja Tumim#28:29-30 ja Urim sok ja Tumim: Wa sk'ana yale, chab' yal ton was jipawe b'a ti oj sna'e ja jas wa sk'ana ja Dyosi. ja chab' yal ton, b'a oj ya makunuk b'a ti oj snaj ja jas wax k'ana.
Ja smoj jumasa ja k'u'ali
31—Ja yelaw ja sk'ujtsil sat ja pal k'u'i, chak muk muk, 32ja b'a snalani, oj kan jun spochanal b'a oj ochuk ja s'olomi. B'a spochanal jawi ay jun spakulab'il, ja jastal ja chompa'al ts'u'umi, ja'ni sb'a mi oj ch'i'uki. 33-34Skotanal ja k'u'uts spojtsil sat ja k'u'ali, oj och yelaw, jastal tek'ul, yuj ja ts'isub'al sok k'u'uts b'a yelaw chak muk muk, b'a k'ik' muk muk, sok b'a mero chak. B'a jujune snalan ja yelaw jumasa oj ochkan jun yal kampana b'a k'anal tak'in. 35Jaxa yajni oj ochuk b'a yoj snajtsil ja tsomjel ja pagre Aaron b'a oj sk'u'luk ja a'teli, ja oj kab' ja yok'el ja yal skampana'il ja sk'u'i', b'a jach' mi oj ch'ay sna'jela.
36—Cho k'u'lan jun yal lechan tak'in b'a k'anal tak'in, jach' oj ja k'u'l jastal wax tojb'esxi jun seyo, ts'ijb'an jastal iti: Kechan ja oj makunuk yuj ja Dyos. 37-38Ja yal lechan tak'in jawi, ti'xa nocho b'a sti sat ja sgorra ja pagre, sok jun smocholab'il chak muk muk, spetsanil k'ak'u ti oj ajyuk b'a spatan ja pagre Aaroni. Sok ja yal lechan tak'in jawi, ja wa sk'ana yal ta ay k'a ja kistal oj sk'u'luk ja israelenio jumasa ye'n oj yil ja Aaroni, ja jmajtan oj jak ya'ki'i oj ni ki' leka, oj ni jch'ayi ja smule ja kristyano'i.
39—Ja sk'u' sok ja sgorra ja pagre Aaroni, oj tojb'uk sok lekil k'u'uts, t'ilan oj sna' lek ja ma oj stojb'esi.
Ja sk'u'e ja tuk pagre jumasa
40—Cho jach'ni ja yuntikil jumasa ja Aaroni, oj ni cho k'u'laxuk ja sk'u' ye'nle'a, syujch'ile, sgorra'e b'a tsamal oj ilxuk ja pagre jumasa jawi. 41Ti'xa wal yab' ja Aaron sok ja yuntikil a slap'e' ja sk'u'e'i, a ochyi aceite ja s'olome'i, b'a ti oj chiknajuk mixa tuk winikuk ja pagre jumasa jawi.
42—Ja pagre jumasa oj ja k'u'lyi yal sch'inwexe, sok lekil k'u'uts oj smus ja snalane'i, man b'a yechmale. 43Ja yal ch'in wexal jumasa jawi, t'ilan ja oj slap'e' ja Aaron sok ja yuntikil jumasa ja yajni oj ochuke b'a yoj na'itsi, ma ja yajni oj ochuke b'a altar oj sk'u'luke ja ya'tele'i. Ta mik'a oj slap'e oj ni chamuke'a. Ja iti jun ab'al t'ilan oj sk'u'uke ja Aaron sok ja yuntikil jumasa.
ที่ได้เลือกล่าสุด:
Exodo 28: YABD
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© Sociedad Bíblica de México 2021