MOSIS KƐŊ IZIRAL TƖŊŊAA LƖƖ 8
8
Sɔrɔɔ su Ijipiti tinteeŋ kala
1Ŋɩɩ nɛ La TƖƖNA bʋla pɩ Mosis, “Mʋ Ijipiti tinteeŋ kuoro teeŋ a bʋla pʋ, ‘Leŋ dɩ mɩ nɩaa Iziral tɩŋŋaa mʋ a chʋɔlɛmɛ. 2Dɩ ŋ nɛ vɩa dɩ ŋ leŋ dɩ ba mʋ, mɩ jaŋ leŋ dɩ sɔrɔɔ kʋ su Ijipiti tinteeŋ kala. 3Fuo-la ba sɩɩ yɩrɛ Naayɩl jaŋ su arɩ sɔrɔɔ, dɩ ba lɩɩ nɩmɛ a jʋʋ ŋ dɩa, ŋ dɩpɩnɩŋ, ŋ nɩhɩasɩŋ arɩ ŋ nɩaa kala dɩɩsɩŋ, ma tabʋʋnʋŋ arɩ ma nɔnnʋŋ kala. 4Sɔrɔ-la jaŋ fɩla jɩla sagɛ ŋ lɛ, ŋ nɩhɩasɩŋ arɩ ŋ nɩaa kala lɛ.’ ”
5Ŋɩɩ nɛ La TƖƖNA bʋla pɩ Mosis, “Bʋla pɩ Arɔŋ dɩ ʋ kɛŋ dantɩga-la ʋ sɩ koro a kaa zaarɛ fuonuŋ, fuonaasɩŋ arɩ pɩlaa kala sɩ hɛ Ijipiti tinteeŋ lɛ, a leŋ dɩ sɔrɔɔ lɩɩ su Ijipiti tinteeŋ kala.”
6Ŋɩɩ nɛ Arɔŋ ŋaa ŋɩɩ La TƖƖNA sɩ dagʋ, sɔrɔɔ lɩɩ tɔ Ijipiti tinteeŋ kala. 7Ŋɩɩ nɛ Ijipiti tinteeŋ chichiribee ma ŋaa ba chichiribiŋ, sɔrɔɔ kʋ lɩɩ.
8Ijipiti tinteeŋ kuoro yɩrɛ Mosis arɩ Arɔŋ a bʋl, “Má sʋl La TƖƖNA dɩ ʋ leŋ dɩ sɔrɔ-la nyɩɩgɛ mɩ dɩ mɩ nɩaa tinteeŋ lɛ, ka dɩ mɩ leŋ dɩ ʋ nɩaa mʋ a kpʋ pʋsʋŋ a ŋaa Wɩɩsʋlʋŋ a dɛnnʋ.”
9Ŋɩɩ nɛ Mosis bʋla pɩ Ijipiti tinteeŋ kuoro, “Mɩ joŋ wɩɩkala hɛ ŋ nɩsɩŋ lɛ nɛ dɩ ŋ dagɛ bʋa-la lɛ ŋ sɩ cho dɩ mɩ sʋl Wɩa pɩŋ, ŋ nɩhɩasɩŋ arɩ ŋ nɩaa dɩ sɔrɔ-la lɛl, a lɛl ma dɩɩsɩŋ ma lɛ, aŋ ka kɩalɩŋ sɩ hɛ Naayɩl fuo-la lɛ.” 10Ŋɩɩ nɛ Ijipiti tinteeŋ kuoro bʋl, “Kʋ sʋl Wɩa pɩmɛ chie.”
Ŋɩɩ nɛ Mosis bʋl, “Mɩ jaŋ ŋaa ŋɩɩ ŋ sɩ bʋla, dɩ ŋ wuo jɩŋ arɩ Wɩa dɔŋ kala tuo a magɛ La TƖƖNA Wɩa. 11Sɔrɔ-la jaŋ nyɩɩgɛ ŋ lɛ, a nyɩɩgɛ ma dɩɩsɩŋ lɛ, a nyɩɩgɛ ŋ tɩntɩnnaa lɛ arɩ ŋ nɩaa lɛ, aŋ hɛ Naayɩl fuo-la dʋndʋŋa lɛ.”
12Mosis arɩ Arɔŋ sɩ ta Ijipiti tinteeŋ kuoro aŋ lɩɩ, ŋɩɩ nɛ Mosis sʋl Wɩa a mʋ tɩgɛ sɔrɔ-la lɛ La TƖƖNA sɩ kaa kʋ hɛ Ijipiti tinteeŋ kuoro lɛ. 13La TƖƖNA laa Mosis sʋla. Sɔrɔ-la kala sɩ hɛ ba dɩɩsɩŋ lɛ, kaalɩsɩŋ lɛ arɩ bagɩsɩŋ lɛ kala sʋʋ. 14Ba hiesi sɔrɔ-la bil puguloo, ba sʋara su tintee-la kala. 15Ama Ijipiti tinteeŋ kuoro sɩ na dɩ sɔrɔ-la sʋba ŋɩɩ, ʋ tʋɔŋ bɩra dol. Ʋ bɩ chɛ dɩ ʋ nɩɩ Mosis arɩ Arɔŋ teeŋ arɩ La TƖƖNA fa sɩ bʋl ŋɩɩ.
Dɩnsɩŋ su Ijipiti tinteeŋ
16Ŋɩɩ nɛ La TƖƖNA bʋla pɩ Mosis, “Bʋla pɩ Arɔŋ dɩ ʋ kɛŋ ʋ dantɩga-la je a ŋmoo tinteeŋ dɩ kʋŋkɔlʋŋ sii a bɩrɩmɛ dɩnsɩŋ a su Ijipiti tinteeŋ kala. 17Ba ŋaa ŋɩɩ La TƖƖNA sɩ daga, Arɔŋ kɛŋ ʋ dantɩga-la je a ŋmoo tinteeŋ kʋŋkɔlʋŋ sii a bɩrɩmɛ dɩnsɩŋ a dɩdɩŋ nuhuobiinee arɩ pʋsʋŋ kala, Ijipiti tinteeŋ kala su arɩ dɩnsɩŋ. 18Ijipiti tinteeŋ chichiribee ma ŋaa ba chichiribi wɩaa dɩ ba ma leŋ dɩnsɩŋ lɩɩ, ama ba bɩ wuo ŋaa, ka dɩnsɩ-la dɩdɩŋ nuhuobiinee arɩ pʋsʋŋ kala.”
19Ŋɩɩ nɛ chichiribe-la bʋla pɩ Ijipiti tinteeŋ kuoro, “Wɩa nɛ dagɛ ʋ doluŋ ŋɩɩ.” Ama Ijipiti tinteeŋ kuoro tʋɔŋ ha pɩrɛ ʋ bɩ jegile nɩɩ ba teeŋ, arɩ La TƖƖNA fa sɩ bʋl ŋɩɩ.
Nanchʋɔsʋŋ su Ijipiti tinteeŋ kala
20Ŋɩɩ nɛ La TƖƖNA bʋla pɩ Mosis, “Sii mʋ cheŋ Ijipiti tinteeŋ kuoro chʋchʋɔ-fɩɛla, bʋa-la lɛ ʋ sɩ yie mʋmʋ fuo-la leriŋ a bʋla pʋ, ‘Wɩɩ-la La TƖƖNA sɩ bʋla nɛ ŋ-la: Leŋ dɩ mɩ nɩaa mʋ a wuo dɛnnɛmɛ. 21Dɩ ŋ nɛ vɩa, mɩ jaŋ leŋ dɩ nanchʋɔsʋŋ kʋ ju tɔŋ, a tɔ ŋ nɩhɩasɩŋ, a tɔ ŋ nɩaa a jʋʋ su ma dɩɩsɩŋ. Ijipiti tɩŋŋaa dɩɩsɩŋ arɩ ba tinteeŋ kala jaŋ su arɩ nanchʋɔsʋŋ.
22Ama mɩ bɩ jaŋ leŋ dɩ nanchʋɔsʋŋ hɛ Goseŋ tinteeŋ lɛ, lee-la mɩ nɩaa sɩ hɛ, ŋ-la nɛ jaŋ leŋ dɩ ma jɩŋ arɩ mɩ-na ma TƖƖNA hɛ tinteeŋ deeŋ lɛ nɛ. 23Mɩ jaŋ leŋ dɩ ŋ jɩŋ mɩ nɩaa arɩ ŋ nɩaa pɛgɛ, chie nɛ wʋmagɩlɩŋ deeŋ jaŋ ŋaa.’ ”
24La TƖƖNA ŋaa ŋɩɩ ʋ sɩ daga, a leŋ nanchʋɔ-laalɩŋ kʋ su Ijipiti tinteeŋ kala, Ijipiti tinteeŋ kuoro dɩa arɩ ʋ nɩhɩasɩŋ dɩɩsɩŋ, a chei ba tinteeŋ.
25Ijipiti tinteeŋ kuoro yɩrɛ Mosis arɩ Arɔŋ a bʋla pɩba, “Má mʋ a kpʋ pʋsʋŋ a dɛnnɛ ma Wɩa tinteeŋ deeŋ lɛ.”
26Ŋɩɩ nɛ Mosis bʋl, “Ŋɩɩ bɩ jaŋ wuo ŋaa, dɩ la nɛ sɩ la kpʋ pʋsʋŋ a dɛnnɛ La TƖƖNA Wɩa Ijipiti nɩaa sɩɩŋ lɛ, la jaŋ chei ba kɩsɩŋ lɛ, dɩ ba yagɛla arɩ tabɩaa. 27Ʋ maga la vɛŋ tapʋlaa batori wombiiŋ nɛ a jʋʋ tintee-hɩlɩŋ tʋɔŋ, a mʋ kpʋ pʋsʋŋ a ŋaa Wɩɩsʋlʋŋ a pɩ La TƖƖNA Wɩa arɩ ʋ sɩ dagɛla ŋɩɩ.”
28Ŋɩɩ nɛ Ijipiti tinteeŋ kuoro bʋl, “Mɩ jaŋ leŋ dɩ ma mʋ a kpʋ pʋsʋŋ a ŋaa Wɩɩ-sʋla pɩ ma TƖƖNA tintee-hɩlɩŋ lɛ, ama má sɩ́ dɩ-bolii mʋ. Má pɛ sʋl Wɩa pɩmɛ.”
29Ŋɩɩ nɛ Mosis bʋla pɩ Ijipiti tinteeŋ kuoro, “Dɩ mɩ nɛ kʋ lɩɩ daha, mɩ jaŋ sʋl La TƖƖNA dɩ ʋ chie leŋ dɩ nanchʋɔsʋ-la nyɩɩgɛ ŋ lɛ, ŋ nɩhɩasɩŋ arɩ ŋ nɩaa kala teeŋ. Ama ŋ bɩra bɩ maga dɩ ŋ nyɩsɛla, a pɔ dɩ la sɩ́ mʋ kpʋ pʋsʋŋ a ŋaa Wɩɩsʋlʋŋ pɩ La TƖƖNA.”
30Mosis sii Ijipiti tinteeŋ kuoro teeŋ a mʋ sʋl La TƖƖNA. 31Ŋɩɩ nɛ La TƖƖNA laa Mosis sʋla a leŋ nanchʋɔsʋ-la nyɩɩgɛ Ijipiti tinteeŋ kuoro lɛ, ʋ nɩhɩasɩŋ arɩ ʋ nɩaa kala teeŋ. Nanchʋɔ-bala ma bɩ ka. 32Ama nanchʋɔsʋ-la sɩ mʋa, Ijipiti tinteeŋ kuoro tʋɔŋ bɩra dol, ʋ bɩ leŋe nɩalɩŋ mʋ.
ที่ได้เลือกล่าสุด:
MOSIS KƐŊ IZIRAL TƖŊŊAA LƖƖ 8: SIS
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Ghana Institute of Linguistics Literacy and Bible Translation 1984, 2014