MOSIS KƐŊ IZIRAL TƖŊŊAA LƖƖ 7
7
1Ŋɩɩ nɛ La TƖƖNA bʋla pɩ Mosis, “Bee na, mɩ ŋaa ŋ nagɛ mɩ-na Wɩa nɛ Ijipiti tinteeŋ kuoro teeŋ, ka ŋ naambie Arɔŋ ŋaa ŋ wʋlaabʋlla. 2Ʋ maga dɩ ŋ bʋl wɩalɩŋ kala mɩ sɩ bʋla pɩŋ, dɩ ŋ naambie Arɔŋ ma laa bʋla pɩ Ijipiti tinteeŋ kuoro, dɩ ʋ leŋ dɩ Iziral tɩŋŋaa lɩɩ ʋ tinteeŋ lɛ. 3Mɩ saa jaŋ leŋ dɩ Ijipiti tinteeŋ kuoro tʋɔŋ pɩrɛ, dɩ mɩ ŋaa wʋmagɩlaa arɩ wʋkpuŋkperisiŋ Ijipiti tinteeŋ lɛ. 4A tɩŋ Ijipiti tinteeŋ kuoro sɩ bɩ jaŋ jegile nɩɩ ma teeŋ ŋɩɩ, mɩ jaŋ joŋ doluŋ a kɛŋ mɩ nɩaa Iziral tɩŋŋaa a lɩɩ Ijipiti tinteeŋ lɛ. 5Ŋɩɩ nɛ Ijipiti tɩŋŋaa jaŋ jɩŋ arɩ mɩ nɛ ŋaa ba TƖƖNA, dɩ mɩ nɛ kɛŋ Iziral tɩŋŋaa lɩɩ ba tinteeŋ lɛ arɩ doluŋ.”
6Ŋɩɩ nɛ Mosis arɩ Arɔŋ ŋaa wɩalɩŋ kala La TƖƖNA sɩ sɩ ba ŋaa. 7Bʋa-la lɛ Mosis arɩ Arɔŋ sɩ mʋ Ijipiti tinteeŋ kuoro sɩpaaŋ, dɩ Mosis ŋaa jɩsɩŋ mahɩŋ banɛsɛ, ka Arɔŋ ma ŋaa jɩsɩŋ mahɩŋ banɛsɛ arɩ batori.
Arɔŋ dantɩga bɩrɩmɛ dɩmɩŋ
8Ŋɩɩ nɛ La TƖƖNA bɩra bʋla pɩ Mosis arɩ Arɔŋ, 9“Dɩ Ijipiti tinteeŋ kuoro nɛ bʋla arɩ ma ŋaa wʋmagɩl a dagɛ arɩ mɩ-na Wɩa nɛ tɩmma, bʋla pɩ Arɔŋ dɩ ʋ joŋ ʋ dantɩga-la lo Ijipiti tinteeŋ kuoro sɩpaaŋ, ʋ jaŋ bɩrɩmɛ dɩmɩŋ.”
10Ŋɩɩ nɛ Mosis arɩ Arɔŋ mʋ Ijipiti tinteeŋ kuoro sɩpaaŋ a ŋaa wʋmagɩl-la Wɩa sɩ dagɛba. Arɔŋ joŋ ʋ dantɩga lo Ijipiti tinteeŋ kuoro arɩ ʋ nɩhɩasɩŋ sɩpaaŋ, ʋ bɩrɩmɛ dɩmɩŋ. 11Ŋɩɩ nɛ Ijipiti tinteeŋ kuoro yɩrɛ ʋ jaŋ wʋjɩnnaa, vʋgʋraa arɩ ba chichiribee kala, ba ma ŋaa ŋɩɩ tɩtɩa arɩ ba chichiribiŋ. 12Ŋɩɩ nɛ ba kʋŋkala joŋ ʋ dantɩga lo ʋ bɩrɩmɛ dɩmɩŋ. Ama Arɔŋ dɩmɩŋ paa ba dɩŋŋaa liŋ. 13Ijipiti tinteeŋ kuoro tʋɔŋ ha pɩrɛ, ʋ bɩ Mosis arɩ Arɔŋ teeŋ jegile arɩ La TƖƖNA sɩ bʋl ŋɩɩ.
Chalɩŋ su Ijipiti tinteeŋ
14Ŋɩɩ nɛ La TƖƖNA bʋla pɩ Mosis, “Ijipiti tinteeŋ kuoro tʋɔŋ ha pɩra nɛ. Ʋ vɩa dɩ ʋ pɩ Iziral tɩŋŋaa wombiiŋ dɩ ba mʋ nɛ. 15Sii mʋ chemu chʋchʋɔ-fɩɛla fuo-la ba sɩɩ yɩrɛ Naayɩl niiŋ. Pɛ joŋ dantɩga-la sɩ bɩrɩmɛ dɩmɩŋ a kori. 16Dɩ ŋ nɛ chemu, bʋla pʋ, ‘Iziral tɩŋŋaa Wɩa nɛ tɩmmɛ ŋ teeŋ dɩ mɩ bʋla pɩŋ: Leŋ dɩ mɩ nɩaa mʋ a chʋɔlɛmɛ tintee-hɩlɩŋ lɛ. Ama faafaa kala a kaa kɔ bʋa deeŋ lɛ ŋ bɩ jegile nɩɩ. 17Wɩɩ-la mɩ-na ma TƖƖNA sɩ bʋla nɛ ŋ-la: Wʋmagɩlɩŋ deeŋ nɛ mɩ jaŋ ŋaa dɩ ŋ jɩŋ arɩ mɩ nɛ nʋʋkala Tɩɩna. Dantɩga deeŋ mɩ sɩ koro mɩ jaŋ joŋo ŋmoo fuo-la ba sɩɩ yɩrɛ Naayɩl lɩɩŋ dɩ ʋ bɩrɩmɛ chalɩŋ. 18Chenfile-la kala sɩ hɛ fuo-la lɛ jaŋ sʋʋ, dɩ lɩɩ-la sʋsʋɔrɛ. Ijipiti tɩŋŋaa bɩ jaŋ wuo nyʋa lɩɩ-la.’ ”
19Ŋɩɩ nɛ La TƖƖNA bʋla pɩ Mosis, “Bʋla pɩ Arɔŋ, dɩ ʋ kɛŋ dantɩga-la sɩ hɛ ʋ nɩsɩŋ lɛ a kaa liesi Ijipiti tinteeŋ fuonuŋ, vilee arɩ lee na-kala lɩɩŋ sɩ hɛ, ba kala jaŋ bɩrɩmɛ chalɩŋ. Chalɩŋ jaŋ hɛ Ijipiti tinteeŋ lee na-kala. Kɩalɩŋ kala ba sɩ kɛŋ daasɩŋ arɩ chʋrʋŋ ŋaa a hɩhɛ lɩɩŋ jaŋ su arɩ chalɩŋ.”
20Ŋɩɩ nɛ Mosis arɩ Arɔŋ ŋaa ŋɩɩ La TƖƖNA sɩ dagɛba. Arɔŋ kɛŋ ʋ dantɩga je Ijipiti tinteeŋ kuoro arɩ ʋ nɩhɩasɩŋ kala sɩpaaŋ aŋ ŋmoo fuo-la ba sɩɩ yɩrɛ Naayɩl lɩɩŋ, ʋ bɩrɩmɛ chalɩŋ. 21Ŋɩɩ nɛ chenfile-la sɩ hɛ fuo-la lɛ sʋʋ, lɩɩ-la sʋsʋɔrɛ, Ijipiti tɩŋŋaa bɩ lɩɩ-la wuo nyʋa. Chalɩŋ su Ijipiti tinteeŋ kala.
22Ijipiti tinteeŋ chichiribee ma ŋaa ŋɩɩ arɩ ba chichiribiŋ. Ŋɩɩ nɛ Ijipiti tinteeŋ kuoro tʋɔŋ wasa dol. Ʋ vɩa dɩ ʋ jegile Mosis arɩ Arɔŋ teeŋ arɩ La TƖƖNA sɩ bʋl ŋɩɩ. 23Wɩɩŋ deeŋ sɩ ŋaa ma kala, Ijipiti tinteeŋ kuoro bɩ jegile nɩɩ aŋ mɩɩra jʋʋ ʋ kuoru dɩa. 24Ŋɩɩ nɛ Ijipiti tɩŋŋaa gɔllɔ lu vilee Naayɩl fuo-la sɛmɛ a chɩchɛ lɩɩŋ ba nyʋa, bɛɛ wɩaa ba fa bɩ fuo-la lɩɩŋ wuo nyʋa. 25La TƖƖNA sɩ ŋaa Naayɩl fuo-la lɩɩŋ bɩrɩmɛ chalɩŋ ŋɩɩ, ʋ diene a yi tapʋlaa balɩpɛ nɛ.
ที่ได้เลือกล่าสุด:
MOSIS KƐŊ IZIRAL TƖŊŊAA LƖƖ 7: SIS
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Ghana Institute of Linguistics Literacy and Bible Translation 1984, 2014