MOSIS KƐŊ IZIRAL TƖŊŊAA LƖƖ 9
9
Pʋsʋŋ sʋba Ijipiti tinteeŋ lɛ
1Ŋɩɩ nɛ La TƖƖNA bʋla pɩ Mosis, “Mʋ Ijipiti tinteeŋ kuoro teeŋ a bʋla pʋ, ‘Wɩɩ-la mɩ-na ma TƖƖNA Iziral tɩŋŋaa Wɩa sɩ bʋla nɛ ŋ-la: Leŋ dɩ mɩ nɩaa mʋ a chʋɔlɛmɛ. 2Dɩ ŋ nɛ vɩa aŋ ha kɛmba kɩɩ, 3mɩ-na ma TƖƖNA jaŋ joŋ nyanyalɩŋ hɛ ma pʋsʋ-la kala ma sɩɩ dɩɛsʋ lɛ: ma janɩŋ, ma kakusuŋ, ma bʋntaŋŋaba, ma nɛsɩŋ, ma piesee arɩ ma bʋʋnaa kala. 4Ama mɩ-na ma TƖƖNA jaŋ kɛŋ Iziral tɩŋŋaa arɩ Ijipiti tɩŋŋaa pʋsʋŋ pɔrɛ dɔŋɔ lɛ, dɩ Iziral tɩŋŋaa pʋsʋŋ sɩ́ sʋʋ.’ ”
5Ŋɩɩ nɛ La TƖƖNA hɛ tapʋlɩɩ-la a bʋl, “Chie nɛ mɩ jaŋ ŋaa wɩɩŋ deeŋ tinteeŋ deeŋ lɛ.” 6Taŋ sɩ pʋla, La TƖƖNA ŋaa ŋɩɩ ʋ sɩ daga. Ŋɩɩ nɛ Ijipiti tɩŋŋaa pʋsʋŋ kala sʋʋ, ama Iziral tɩŋŋaa pʋŋ-bala ma bɩ sʋba. 7Ŋɩɩ nɛ Ijipiti tinteeŋ kuoro pɩɛsa nɩɩ arɩ Iziral tɩŋŋaa pʋŋ-bala ma bɩ sʋba. Ama Ijipiti tinteeŋ kuoro tʋɔŋ ha pɩrɛ, ʋ bɩ chɛ dɩ Iziral tɩŋŋaa mʋ.
Mɔpʋllʋŋ ŋmɛrɛ Ijipiti tɩŋŋaa lɛ
8Ŋɩɩ nɛ La TƖƖNA bʋla pɩ Mosis arɩ Arɔŋ, “Má ŋaa tʋɔrʋŋ tabʋʋŋ lɛ nɩsɩŋ sɩɩŋ, a kaa mʋ Ijipiti tinteeŋ kuoro sɩpaaŋ, dɩ Mosis joŋo yuo wɩa-nyuŋ. 9Ʋ jaŋ bɩrɩmɛ kʋŋkɔlʋŋ Ijipiti tinteeŋ kala lɛ, dɩ mɔpʋllʋŋ ŋmɛrɛ nuhuobiinee arɩ pʋsʋŋ lɛ a yɛrɛ a ŋaa naawɩɩlaa.”
10Ŋɩɩ nɛ ba ŋaa tʋɔrʋ-la tabʋʋŋ lɛ a kaa mʋ Ijipiti tinteeŋ kuoro sɩpaaŋ. Mosis joŋo yuo wɩa-nyuŋ, mɔpʋllʋŋ ŋmɛrɛ nuhuobiinee arɩ pʋsʋŋ kala lɛ a yɛrɛ a ŋaa naawɩɩlaa. 11Ijipiti tinteeŋ chichiribe-la bɩ wuo pagɩsɛ Mosis mɔpʋllʋ-la-na lɛ, bɛɛ wɩaa mɔpʋllʋ-la ŋmɛrɛ chichiribe-la kala lɛ nɛ a nagɛ Ijipiti tɩŋŋaa kala sɩ ŋmɛrɛ ŋɩɩ. 12Ama La TƖƖNA leŋ Ijipiti tinteeŋ kuoro tʋɔŋ pɩrɛ, ʋ bɩ jegile nɩɩ Mosis arɩ Arɔŋ teeŋ, arɩ La TƖƖNA fa sɩ bʋl ŋɩɩ.
Duoŋ-tabɩaa tel Ijipiti tinteeŋ lɛ
13Ŋɩɩ nɛ La TƖƖNA bʋla pɩ Mosis, “Sii mʋ Ijipiti tinteeŋ kuoro teeŋ chʋchʋɔ-fɩɛla a chaasa bʋla pʋ, ‘Mɩ-na Iziral tɩŋŋaa Wɩa sɩ dɩ ŋ leŋ dɩ mɩ nɩaa mʋ a chʋɔlʋ. 14Bʋa deeŋ-na lɛ dɩ ŋ nɛ vɩa, mɩ jaŋ joŋ mɩ nyanyal bɔŋŋɔɔ kala hɛ ŋ lɛ, ŋ nɩhɩasɩŋ arɩ ŋ nɩaa kala lɛ, dɩ ma jɩŋ arɩ nʋʋkala tuo a magɛmɛ dʋnɩa kala lɛ. 15Mɩ kɛŋ doluŋ mɩ fa sɩ jaŋ joŋ nyanyal bɔŋŋɔɔ hɛ ŋ dɩ ŋ nɩaa kala lɛ dɩ ma nyɩɩgɛ tinteeŋ kala lɛ, 16ama mɩ lemma nɛ, dɩ mɩ dagɛ mɩ doluŋ dɩ mɩ yɩrɩŋ yɩrɛ dʋnɩa sɛmɛ na-kala. 17Ŋ ha kɛŋ ŋ tʋɔŋ nɛ a bɩ chɛ dɩ ŋ leŋ dɩ mɩ nɩaa mʋ, 18a tɩŋ ŋɩɩ wɩaa, chie bʋa deeŋ lɛ mɩ jaŋ leŋ dɩ duoŋ-tabɩaa faasa tel Ijipiti tinteeŋ kala lɛ, dɩ ʋ ŋaa wɩɩ Ijipiti tɩŋŋaa ha sɩ bɩ na aŋ ka. 19Bʋla pɩ nʋʋkala dɩ ba kiri ba pʋsʋŋ arɩ kʋŋ na-kala ba sɩ kɛnɛ dɩ-jalɩŋ a hɛ dɩɩsɩŋ lɛ, bɛɛ wɩaa duoŋ-tabɩaa jaŋ yagɛ nuhuobiinee arɩ pʋsʋ-la kala sɩ hɛ dɩ-jalɩŋ dɩ ba sʋʋ.’ ”
20Ijipiti tinteeŋ kuoro nɩhɩasɩ-la dɔnsʋŋ sɩɩ fá Wɩa sɩ nɩɩ wɩɩ-la La TƖƖNA sɩ bʋla, fawʋllʋŋ kɛmba, ba kiri ba yosuŋ arɩ ba pʋsʋŋ kala lɩma lɩma ba jʋʋ dɩɩsɩŋ. 21Ama nɩalɩŋ sɩ bɩ wɩɩ-la La TƖƖNA sɩ bʋla kaa tɩŋ, leŋ ba yosuŋ arɩ ba pʋsʋŋ kala dɩ-jalɩŋ.
22Ŋɩɩ nɛ La TƖƖNA bʋla pɩ Mosis, “Kɛŋ ŋ nɩsɩŋ je wɩa-nyuŋ, dɩ duoŋ-tabɩaa tel Ijipiti tinteeŋ kala lɛ, a yagɛ nɩaa, pʋsʋŋ arɩ kʋŋ na-kala sɩ nyʋ tinteeŋ lɛ.” 23Mosis sɩ kɛŋ ʋ dantɩga je wɩa-nyuŋ, La TƖƖNA leŋ taŋ lɩgɩsɛ, a kpɩa, duoŋ-tabɩaa tuu Ijipiti tinteeŋ lɛ. 24Duoŋ peliŋ faasa lulu, wʋdoho deeŋ ha bɩ Ijipiti tinteeŋ lɛ ŋaa aŋ ka. 25Ijipiti tinteeŋ lɛ duoŋ-tabɩaa tele tɔ kʋŋkala nɛ, pʋsʋŋ, nuhuobiinee arɩ kʋŋkala sɩ nyʋ tinteeŋ, tɩɩsɩŋ kala yuori. 26Iziral tɩŋŋaa sɩ hɛ tintee-la lɛ ba sɩɩ yɩrɛ Goseŋ dʋndʋŋa lɛ nɛ wɩɩŋ deeŋ bɩ ŋaa.
27Ŋɩɩ nɛ Ijipiti tinteeŋ kuoro tɩma yɩrɛ Mosis arɩ Arɔŋ a bʋla pɩba, “Bʋa deeŋ lɛ la ŋaa chei La TƖƖNA nɛ, La TƖƖNA kɩaa sɩma nɛ, mɩ dɩ mɩ nɩaa nɛ bɩ woruŋ ŋaa. 28Má sʋl La TƖƖNA pɩla, duoŋ-tabɩaa arɩ duoŋ kpɩa-na-la dɔgɩsɛla yʋgɛ nɛ. Mɩ jaŋ leŋ dɩ ma mʋ, ma bɩra bɩ maga dɩ ma hɛ daha.”
29Ŋɩɩ nɛ Mosis bʋla pɩ Ijipiti tinteeŋ kuoro, “Dɩ mɩ nɛ lɩɩ tabalɩŋ deeŋ tʋɔŋ, mɩ jaŋ sʋl La TƖƖNA dɩ duoŋ kpɩana-la arɩ duoŋ-tabɩa-la leŋ. Ŋɩɩ nɛ ŋ jaŋ jɩŋ arɩ La TƖƖNA nɛ tɩɩ tinteeŋ kala. 30Ama mɩ jɩma arɩ ŋ dɩ ŋ nɩhɩasɩŋ ha bɩ La TƖƖNA Wɩa ka fá.”
31Bɔɔ doho kʋbala ba sɩ kaa ŋɩŋaa gɛrɩpɛɛŋ arɩ mɩaa kala chei, bɛɛ wɩaa bʋa-la lɛ dɩ mɩa-la lʋla, tɩa-la ma fɩɩlɛ. 32Ama duoŋ-tabɩa-la bɩ mɛmpɛba cheye, bɛɛ wɩaa ba-na fa ha bɩ waa.
33Mosis sɩ sii Ijipiti tinteeŋ kuoro sɩpaaŋ a lɩɩ tabal-la lɛ ʋ sʋl La TƖƖNA, ŋɩɩ nɛ duoŋ-tabɩa-la arɩ duoŋ kpɩa-na-la arɩ duoŋ-la kala leŋ. 34Ijipiti tinteeŋ kuoro sɩ na dɩ duoŋ-tabɩa-la arɩ duoŋ kpɩa-na-la arɩ duoŋ-la leŋe, ʋ bɩra ŋɩŋaa wʋbɔŋŋɔɔ. Ʋ dɩ ʋ nɩhɩasɩŋ kala bɩra kɛŋ tʋɔ-doluŋ. 35Ijipiti tinteeŋ kuoro tʋɔŋ pɩrɛ ʋ vɩa dɩ ʋ leŋ dɩ Iziral tɩŋŋaa mʋ, arɩ La TƖƖNA fa sɩ bʋl ŋɩɩ pɩ Mosis.
ที่ได้เลือกล่าสุด:
MOSIS KƐŊ IZIRAL TƖŊŊAA LƖƖ 9: SIS
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Ghana Institute of Linguistics Literacy and Bible Translation 1984, 2014