MARKA 3
3
Mi Khutzaw Hihdamna
(Mat 12.1-8; Luk 6.1-5)
1Huan sinagog ah alut nawn a; huai ah khutzaw khat ana om hi. 2Amah ahektheihna ding un Sabbath ni a ahihdam nop leh nop louh a-enkhia uhi. 3Ama'n khutzaw kiang ah, “Dingkhia in,” achi hi. 4Huan akiang uah, “Sabbath ni in hihhoih hia siang, hihsiat? Hotdam hia siang, hihlup?” chi in adong hi. Himahleh adai dide uhi. 5Huan alungtang uh tak ziak a lungkham mahmah leh heh kawm a amaute a-et velvel nung in, huai mi kiang ah, “Na khut zan in,” achi a, huchi in azankhia a, akhut adamta hi. 6Pharisaite apawtkhia ua, amah hihlup theihna ding lampi ngaihtuah in Herod pawl a mite toh akihoukhawm pah uhi.
Hihdamna Dangte
7Jesu anungzuite toh tuipi lam ah apaimang ua; Galili gam a kipan mipi tampitak in azui uhi. 8Athilhih thupidan azak un Judia gam a kipan, Jerusalem a kipan, Idumai gam a kipan, Jordan gal a kipan, Tura leh Sidon kho kim a kipan in mipi tampitak akiang ah ahong pai uhi. 9Mipi ziak in amah a dia long neu mansa a om ding in anungzuite ahilh hi, huchi lou in zaw hon um lutlut kha ding uhi. 10Mipi tampi ahihdam tak ziak in natna nei peuhmah in amah akhoihtheihna ding un aboh huthut uhi. 11Dawi ninte'n leng amah amuh un ama ah bokkhup in, “Nang Pathian Tapa na hi,” chi in akikou uhi.
12Huan atanchin genthang lou ding in akiang uah achi bikbek hi.
Sawltak Sawm-le-nih Telna
(Mat 10.1-4; Luk 6.12-16)
13Huan tang ah ahohtou a, ama'n angaihngaih akiang ah asam a; amau akiang ah ahohtou uhi. 14Akiang a om ding leh thugen dia asawlkhiak ding in sawm-le-nihte asep hi. 15Natnate hihdam ding leh dawite delhkhe ding in thuneihna apia hi.
16Huai mite, Simon, Peter, achih pa; 17Zebedai tapa, Jakob leh Jakob unau Johan, huai mite Boanerges achihte; huai omdan tuh vanpiging tapate chihna ahi. 18Andru, Philip, Bartholomai, Matthai, Thomas, Alphai tapa Jakob, Thaddai, Kanaan mi Simon leh, 19amansakpa, Judas Iskariot ahi uhi.
Jesu Leh Beelzibul
(Mat 12.22-32; Luk 11.14-23; 12.10)
20Huai zoh in, inn khat ah alut uhi. Huai ah mipi tampi ahong kikhawm nawn ua, huchi in an nangawn leng ane thei kei uhi. 21Huan alawmte'n azak un, “Lungsim buai ahita,” chi in amah mat atum uhi.
22Huan laigelhmi, Jerusalem a kipan a hong sukte'n, “Beelzibul zawl ahi, dawite kumpipa ziak in ahi, dawite adelhkhiak,” achi uhi.
23Jesu'n laigelhmite asam a, gentehna in akiang uah, “Setan in Setan mah bangchi in adelhkhe thei dia? 24Gam leng amah akidouleh huai gam adingkhe thei kei ding hi. 25Inkuan khat leng amah akidou uleh, huaite inkuan adingkhe thei kei ding uhi. 26Setan leng amah kidou a, akilanleh adingkhe thei kei ding a, amangthang zaw ding hi. 27Kuamah in mihatpa ahen masak phot keileh inn a lut in asum alaksak thei kei uh, huai nung in bel a-inn alok mai ding uhi.
28“Chihtaktak in ka hon hilh ahi, mihing tate, akhelhna tengteng uah leh Pathian agensiatna bangpeuh uah leng agensiatnate uh ngaihdam ahi ding hi. 29Kuapeuh Kha Siangthou hilhial gensia zaw chik mah chiang in ngaihdam ahi kei ding a, tangtawn khelhna ah siam louh in a-om zaw ding,” achi hi. 30Dawi nin pai ahi, achih ziak un huai agen ahi.
Jesu Nu Leh Sanggamte
(Mat 12.46-50; Luk 8.19-21)
31Huan anu leh a-unaute ahong ua, inpua ah adingh ua; amah sam ding in mi asawl uhi. 32Akim a mipi tu diamduamte'n akiang ah, “Ngai dih, inpua ah na nu leh na sanggampate'n ahon ngak uh,” achi uhi.
33Ama'n akiang uah, “Ka nu leh ka sanggampate kuate ahi ua?” chi in adong hi. 34Akiang a tute a-en vialvial a, “En un, ka nu leh ka sanggampate; 35kuapeuh Pathian deihlam hih photphot ka sanggampa, ka sanggamnu leh ka nu ahi uh,” achi hi.
ที่ได้เลือกล่าสุด:
MARKA 3: PAITBSI
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
