MARKA 2
2
Mizaw Hihdamna
(Mat 9.1-8; Luk 5.17-26)
1Huan ni bangzah hiam nung in Kapernaum a ahong lut nawnleh inn ah a-om chih thu ahong thang hi. 2Huchi in kongkhak kim a omna ding om lou khop in mi tampi ahong kikhawm ua, akiang uah thu agen hi. 3Mizaw khat, mi li zawn, akiang ah ahon pi uhi. 4Mipi ziak a akiangnai a ahong pai theih louh ziak un a-omna intung aphenvang ua; huai khit in alupna leh atung a mizaw lum kawm in akhaikhesuk uhi. 5Huchi in Jesu'n aginna uh amuh in, mizaw kiang ah, “Ka tapa, na khelhnate ngaihdam ahita,” achi hi.
6Laigelhmi khenkhat huai mun ah atu uhi. 7“Hiai mi'n bangziak a hichibang thu gen ahia? Pathian agensia hi; mi khat, Pathian kia lou ngal, kua'n ahia khelhnate ngaidam thei?” chi in alungtang un angaihtuah uhi.
8Huan Jesu'n, alungtang un huchibang angaihtuah uh chih alungsim in athei pah a, akiang uah, “Huai thu bangziak a na lungtang ua ngaihtuah na hi ua? 9Mizaw kiang a, ‘Na khelhnate ngaihdam ahita,’ chih leh ‘na lupna la inla, khe in paita in,’ chih akoi ahia agen nuamzaw? 10Himahleh leitung ah Mihing Tapa in khelhnate ngaihdam theihna anei chih na theihna ding un,” ahi, mizaw kiang ah; 11“Thou inla, na lupna la inla, na inn ah pai in, ka hon chi,” achi hi.
12Huchi in amah athou a, alupna la pah in, avek ua mitmuh in apaita hi; huchi in avek un lamdang asa mahmah uh, hichibang himhim i mu ngei kei, chi in Pathian aphat uhi.
Levi Sapna
(Mat 9.9-13; Luk 5.27-32)
13Huan apawt nawn a tuipi gei ah apaita hi, mipi tengteng akiang ah ava pai ua, ama'n thu ana hilh hi. 14Apai kawm in, Alphai tapa, Levi siah piakna mun a tu amu a, akiang ah, “Hon zui in,” achi hi. Athou a azuita hi. 15Huan hichi ahong hi a, Jesu'n Levi inn ah an a-um a, siahkhonte leh mikhialte tampi in Jesu leh anungzuite a-umpih uhi, amah zuite tampi ahi uh. 16Pharisaite leh laigelhmite'n Jesu'n mikhialte leh siahkhonte kiang a anek amuh un, anungzuite kiang ah, “Bangchidan ahia siahkhonte leh mikhialte kiang a anek a adawn?” achi uhi.
17Jesu'n huai aza a, akiang uah, “Michidamte'n daktor akiphamoh kei ua, midamloute'n akiphamohzaw uh; midiktatte sam ding a hong pai ka hi kei a, mikhialte sam ding a hong pai ka hi zaw,” achi hi.
An Ngawl Thu A Dotna
(Mat 9.14-17; Luk 5.33-39)
18Huan Johan nungzuite leh Pharisaite'n an angawl zel uhi. Amau ahong pai ua, Jesu kiang ah, “Bangziak a Johan nungzuite leh Pharisaite nungzuite'n an ngawl ua, nang nungzuite'n angolh sam louh uh?” achi uhi.
19Jesu'n akiang uah, “Moupite kiang a apasal a-om lai teng moupite'n an angawl thei ua hia? Apasal ding akiang ua a-om lai teng angawl thei kei ding uh. 20Himahleh akiang ua kipan apasal pimang nite ahong tung ding a, huai ni chiang in zaw angawl ding uhi.
21“Kuamah in puan tui khai nai louh them in puan lui athuap ngei kei uh; thuap le uh, thuap bit asawmna lam uah akaikek ding a, athak in alui akaikek ding a, ahong kek semsem ding hi. 22Huan kuamah in savun uain thawl lui ah uain thak athun ngei kei, uain in savun thawl aphukham ding a, uain abo bei ding hi, savun thawl mah leng; uain thak savun uain thawl thak ah athun zaw uh,” achi hi.
Sabbath Thu A Dotna
(Mat 12.1-8; Luk 6.1-5)
23Huan hichi ahong hi a, Jesu Sabbath ni in buhlei ah apaisuak hi, anungzuite'n apai kawm un buhvuite akhiak uhi. 24Pharisaite'n akiang ah, “En dih, bangziak a Sabbath ni a hihsiang lou hih ahi ua?” achi uhi.
25Ama'n akiang uah, “David leh alawmte ataksap ua, agilkial lai ua athilhih uh na sim kei ua hia? 26Abiathar siampu lianpen ahih lai a, Pathian inn a alut a, siampute kia lou ngal in anek siang louh tanghou koihtuam anek a, alawmte kiang a apiak sam thu,” achi hi.
27Huan amah mah in, akiang uah, “Sabbath zaw mihing a dia bawl ahi, mihing bel Sabbath ni a dia bawl ahi kei hi. 28Huchi in Mihing Tapa zaw Sabbath tung nangawn a Toupa ahi,” achi hi.
ที่ได้เลือกล่าสุด:
MARKA 2: PAITBSI
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
