MARKA 4
4
Buhchithehpa Gentehna
(Mat 13.1-9; Luk 8.4-8)
1Huan tuipiau ah thu ahilh nawn hi. Mipi tampitak akiang ah ahong kikhawm ua, huchi in tuipi ah long ah tuang in atu a, mipi tengteng tuipiau a leitung ah a-om uhi. 2Huan gentehna zang in thil tampi asinsak a, amah sinsakna dan in akiang uah, 3“Ngaikhia unla, en dih ua; buhchithehpa buhchi theh ding in akuan hi. 4Huan hichi ahong hi a, atheh lai in akhen lampi sik ah akia a, vasate'n anegai uhi. 5Akhen suangsilei ah akia a; lei asah louh ziak in apou pah hi. 6Himahleh ni ahong suah in haivuai in ahong om a, zung aneih louh ziak in avuaimang uhi. 7Akhen loulingnei lak ah akia a, loupa ahong khang a, buhkungte adepmang a, agahta kei hi. 8Akhen lei hoih a kia in apou a, akhanglian a, agah a; aleh sawmthum aleh sawmguk leh aleh za in apung chiat uhi,” achi hi.
9Huan akiang uah, “Kuapeuh zakna ding bil nei in, za hen!” achi hi.
Gentehna Thiltup
(Mat 13.10-17; Luk 8.9-10)
10Huan amah kia a-om lai in akim a omte leh sawm-le-nihte'n gentehna thu adongchian thak uhi. 11Ama'n akiang uah, “Pathian lalgam thuguk zaw noute kiang a piak ahi a, polam mite a ding in bel bangkim gentehna a gen ahi. 12Muh zaw amu na ua, atheisiam kei ding uh, huchi lou in zaw akihei nawn ding ua, ngaihdam ahong hi kha ding uh,” achi hi.
Buhchithehpa Gentehna Hilhchetna
(Mat 13.18-23; Luk 8.11-15)
13Huan ama'n akiang uah, “Hiai gentehna thu na theisiam kei uh maw? Huchi ahih in bangchi in gentehna tengteng na theisiam tuan ding ua? 14Buhchithehpa'n thu atheh ahi. 15Lamsik a thu theh hiai bang ahi uh; thu azaktak un kintak a Setan hong pai in alungtang ua thu theh alakmangsak hi. 16Huchibang mah in suangsilei a theh hiaite ahi uh; thu azak phet ua kipaktak a pom pahte. 17Himahleh amau ah zung anei kei ua, sawt louchik kia a-om uh; huai nung in thu ziak a gimthuakna hiam sawina hiam ahong om phet in akipuk pah uhi. 18Huan midangte loulingnei lak a theh bang ahi uh; huaite'n thu azata ua, 19himahleh khovel lunggulhnate, thil dang duhgawlnate ahong lut chiang in, thu adep a, gah lou in a-om hi. 20Huchi in lei hoih a kia hiaite ahi uh; thu za a, pom, aleh sawmthum, aleh sawmguk leh aleh za a gahte ahi uh,” achi hi.
Khawnvak A Pan Gentehna
(Luk 8.16-18)
21Huan akiang uah, “Mi'n khawnvak de in akoihna a koih lou in, loh nuai hiam, lupna nuai hiam ah akoih ngei ua hia? 22Thang lou ding a iim bangmah a-om ngei kei a, lang lou ding a sel bangmah a-om sam kei hi. 23Kuapeuh zakna ding a bil nei peuh in za hen,” achi hi.
24Huan akiang uah, “Na zak uh bang ahia, pilvang un; na tehna ngei mah ua tehsak in na om ding ua, atamzaw bawn piak in na om ding uhi. 25Kuapeuh anei piak behlap in a-om ding ua, kuapeuh anei lou aneihsun nangawn laksak in om ding,” achi hi.
Haichitang A Pan Sinsakna
26“Pathian lalgam tuh mi'n lei a chi atuh bang ahi,” achi hi. 27“Zan chiang in a-ihmu a, sun chiang in athou zel a; chi pou in ana khang a, himahleh bangchi a pou a, khang ahia chih athei kei. 28Lei in amah in gah ahon suah a; amasapen in akung, huan avui leh avui ah atang hong om hi. 29Himahleh agah amin chiang in, kawite in a-at pah uhi; buhlak ahun tak ziak in,” achi hi.
Ankam Tang Gentehna
(Mat 13.31-32; Luk 13.18-19)
30Huan “Pathian lalgam bang toh i tehpih dia? Ahihkeileh, bang gentehna in ahia i genteh ding? achi hi. 31Ankam chi tang khat lei a atuh un, lei a chi tengteng sang in neupen mahleh, 32atuh nung un ahong pou a, loupa tengteng sang in ahong lianzawta a, hiang liantak ahon nei a, huchi in tungleng vasate alim ah agiak uh, huchi mah bang ahi,” achi hi.
33Huan huchibang gentehna thu tampi in, atheihsiam theih khomkhom uh, akiang uah agen zel hi. 34Himahleh gentehna lou in zaw akiang uah thu agen ngei kei; amah nungzuite kiang ah asim in bangkim ahilhchian zel hi.
Huihpi Jesu'n Adaisak
(Mat 8.23-27; Luk 8.22-25)
35Huai ni mah nitaklam ahong hih in, akiang uah, “Gal khat lam i kai ding uh,” achi hi. 36Huchi in mipite paisan in, a-om ngeingei bang in, long ah apaipih pah ua, long dangte leng akiang ah a-om uhi. 37Huchi in huihpi thupitak ahong nung a, tuikihotte long ah ahong kihotlut zuazua hi, huchi in long ahong dimta hi. 38Amah lukham kham a ihmu in, longmei lam ah a-om hi. Huan aphawng ua akiang ah, “Heutupa, ka manthat uh khawk sa lou na hi maw?” achi uhi.
39Amah ahong thou a, huih atai a, tuipi kiang ah leng, “Dai inla om kinken in,” achi hi. Huan huih atawp a, hong dai dide hi. 40Ama'n akiang uah, “Bangchi a hichi tel a lau na hi ua oi? Ginna nei lou na hi uh maw?” achi hi.
41Huchi in lau petmah in alau ua, “Hiai mi kua ahia le, huih leh tuipi nangawn in athu aman uh?” akichi uhi.
ที่ได้เลือกล่าสุด:
MARKA 4: PAITBSI
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
