Soma Biblia Kila Siku Julai 2021Mfano

Yesu anaonyesha kwamba ndiye Masihi aliyetumwa na Mungu, ijapokuwa Wayahudi waliomsikia hawakutambua hilo. Shamba la mizabibu ni taifa la Israeli. Imeandikwa kwa mfano katika Isa 5:7, Shamba la mizabibu la Bwana wa majeshi ndilo nyumba ya Israeli, na watu wa Yuda ni mche wake wa kupendeza; akatumaini kuona hukumu ya haki, na kumbe! Aliona dhuluma; alitumaini kuona haki, na kumbe! Alisikia kilio. Mwenye shamba ni Mungu. Wakulima ni mfano wa hao Wayahudi alioongea nao Yesu, na watumwa ni manabii waliotumwa na Mungu. M.9 una maonyo kwa Wayahudi waliosukumia mbali neema ya Mungu: Yule bwana wa shamba la mizabibu … atakuja na kuwaangamiza wale wakulima, na lile shamba la mizabibu atawapa wengine. M.10 waonyesha kwamba Yesu ni msingi. “Jiwe kuu la pembeni” ni mfano kuhusu Yesu. Lakini pamoja na hilo, bado watu wengi na hata wakubwa wa jamii wanamkataa. Wewe je, imani yako iko katika msingi gani?