Solid Joys ShqipShembull

Dashuri e pranishme dhe e fuqishme

Kush do të na ndajë nga dashuria e Krishtit? Pikëllimi, a ngushtica, a përndjekja, a uria, a të zhveshurit, a rreziku, a shpata? (Romakëve 8:35)

Vër re tri gjëra te Romakëve 8:35.

1. Krishti na do tani.

Një bashkëshorte mund të thotë për bashkëshortin e saj të ndjerë: “Asgjë nuk do të më ndajë nga dashuria e tij.” Ajo mund ta ketë me kuptimin që kujtimi i dashurisë së tij do të jetë i ëmbël dhe i fuqishëm gjithë jetën e saj. Por te ky varg Pali nuk e ka fjalën për këtë.

Te Romakëve 8:34 thuhet shumë qartë: “Krishti është ai që vdiq, po për më tepër ai edhe u ringjall; ai është në të djathtë të Perëndisë dhe ai ndërmjetëson për ne.” Arsyeja pse Pali mund të thotë se asgjë nuk mund të na ndajë nga dashuria e Krishtit, është sepse Krishti është i gjallë dhe ende na do, edhe tani.

Krishti është në të djathtën e Perëndisë dhe për pasojë Ai sundon për ne. Ai po ndërmjetëson për ne dhe kjo do të thotë se Ai po sigurohet që vepra e shpengimit, e përfunduar nga Ai, të na shpëtojë çast pas çasti dhe të na sjellë të sigurt në gëzimin e përjetshëm. Dashuria e Tij nuk është vetëm një kujtim. Ajo është një veprim çast pas çasti i Birit të gjallë dhe të gjithëpushtetshëm të Perëndisë për të na sjellë në gëzimin e përjetshëm.

2. Kjo dashuri e Krishtit është e efektshme për të na mbrojtur nga ndarja dhe për pasojë nuk është një dashuri universale për të gjithë, por një dashuri e veçantë për popullin e Tij–domethënë, për ata që, sipas Romakëve 8:28, e duan Perëndinë dhe janë të thirrur sipas qëllimit të Tij.

Kjo është dashuria e Efesianëve 5:25: “Ju, burra, duajini gratë tuaja, sikurse edhe Krishti deshi kishën dhe dha veten e tij për të.” Kjo është dashuria e Krishtit për kishën, për nusen e Tij. Krishti ka një dashuri për të gjithë dhe ka një dashuri të veçantë, shpëtuese dhe ruajtëse për nusen e Tij. Ti e di që je pjesë e asaj nuseje, nëse i beson Krishtit. Kushdo–pa përjashtim–kushdo që beson në Krishtin, mund të thotë se është pjesë e nuses së Tij, kishës së Tij, pjesë e të thirrurve dhe pjesë e të zgjedhurve të Tij, pjesë e atyre që sipas Romakëve 8:35 mbahen dhe ruhen përjetë, pavarësisht se çfarë ndodh.

3. Kjo dashuri ruajtëse, efektive dhe e gjithëpushtetshme nuk na kursen nga fatkeqësitë e kësaj jete, por na kalon të sigurt përmes tyre dhe na çon në gëzimin e përjetshëm me Perëndinë.

Ne do të vdesim, por vdekja nuk do të na ndajë dot nga dashuria e Tij. Prandaj kur Pali thotë në vargun 35 të Romakëve 8 se “shpata” nuk do të mund të na ndajë dot nga dashuria e Krishtit, ai po thotë se edhe nëse na vrasin, ne nuk ndahemi nga dashuria e Krishtit.

Prandaj mesazhi i përmbledhur në vargun 35 është ky: Jezu Krishti e do popullin e Tij tani me një dashuri të pushtetshme çast pas çasti, e cila nuk na shpëton gjithmonë nga fatkeqësitë, por na ruan për gëzimin e përjetshëm në praninë e Tij, madje edhe në mes të vuajtjes dhe vdekjes.