Solid Joys ShqipShembull

Një e ardhme për dështimet

“Mos u frikësoni; edhe pse keni bërë gjithë këtë të keqe, mos lini së ndjekuri Zotin, por shërbejini Zotit me të gjithë zemrën tuaj. Mos u largoni për të ndjekur gjëra të kota, që nuk vlejnë, as çlirojnë, sepse janë gjëra të kota. Sepse Zoti nuk do ta braktisë popullin e tij, për hir të emrit të tij të madh, sepse i pëlqeu Zotit t’ju bëjë popullin e vet.” (1 e Samuelit 12:20-22)

Pasi izraelitët përballen me frikën dhe pendohen për mëkatin e tyre në lidhje me kërkesën që Samueli t’u jepte një mbret, ashtu si kombet e tjera, atëherë erdhi lajmi i mirë: “Mos u frikësoni; edhe pse keni bërë gjithë këtë të keqe.” A e dëgjon se sa pa vend tingëllon kjo—sa e pavend, por e mrekullueshme? Ndoshta prisje që Samueli të thoshte: “Frikësohuni, sepse keni bërë gjithë këtë të keqe.” Kjo është një arsye e mirë për t’u frikësuar: keni bërë të keqe të madhe, sepse keni kërkuar një mbret tjetër, përveç Perëndisë! E megjithatë, Samueli nuk e tha këtë. “Mos u frikësoni; edhe pse keni bërë gjithë këtë të keqe.”

Ai shton: “Mos lini së ndjekuri Zotin, por shërbejini Zotit me gjithë zemrën tuaj. Mos u largoni për të ndjekur gjëra të kota, që nuk vlejnë e as çlirojnë, sepse janë gjëra boshe.”

Ky është ungjilli: Edhe pse keni mëkatuar shumë dhe e keni çnderuar plotësisht Zotin, edhe pse tani keni një mbret, për të cilin ngulët këmbë dhe ky është mëkat, edhe pse ai mëkat nuk mund të zhbëhet dhe as pasojat e tij të dhimbshme nuk mund të anashkalohen, ka ende një të ardhme dhe një shpresë. Ka mëshirë!

Mos ki frikë! Mos ki frikë!

Pastaj vjen themeli madhështor, baza dhe themeli i ungjillit te 1 e Samuelit 12:22. Pse nuk duhet të frikësohesh, edhe pse ke bërë një të keqe kaq të madhe? “Sepse Zoti nuk do ta braktisë popullin e tij, për hir të emrit të tijtë madh, sepse i pëlqeu Zotit t’ju bëjë popullin e vet.”

Baza e ungjillit është përkushtimi që Perëndia ka ndaj vetë emrit të Tij. A e dëgjove? Mos ki frikë, edhe pse ke mëkatuar: “Sepse Zoti nuk do ta braktisë popullin e tij, për hir të emrit të tij të madh.” Kjo duhet të ketë dy efekte tek ti: përulësi që të thyen zemrën, dhe lumturi ngadhënjyese. Përulësi për faktin se themeli i shpëtimit tënd nuk është vlera, që ti ke. Lumturi për shkak se shpëtimi yt është po aq i sigurt sa besnikëria e Perëndisë ndaj emrit të Tij. S’mund të ketë më shumë siguri se kaq!