BibleProject | Ontdek die tema van die Eksodus-weg in die SkrifSample

Jesus se eie Eksodus-ondervinding

In vandag se oordenking weef die evangelieskrywers besonderhede uit vorige eksodus-ervarings op kreatiewe wyse in Jesus se eie verhaal in. Sodoende openbaar hulle dat Jesus nie bloot 'n nuwe Moses is nie, maar 'n nuwe Israel wat sy eie eksodus ondervind het. Nadat Maria aan Jesus geboorte gee, beveel koning Herodes dat alle babaseuntjies in die streek vermoor moet word (Matteus 2:16-18), wat die farao se bevel herhaal om die Israelitiese babaseuntjies dood te maak (Eksodus 1:15-22).

Om Jesus teen Herodes se bevel te beskerm, vlug Maria en Josef na Egipte en sit daarmee ’n eksodus-patroon voort wat ons nou al behoort te herken. Onthou dat Abraham en Sara na Egipte gevlug het om 'n sekere dood te ontsnap. Josef en sy gesin het later dieselfde gedoen. Maria en Josef vlug nou saam met Jesus en bly in Egipte totdat 'n engel hulle verseker dat hulle veilig kan terugkeer. Matteus 2:15 beskryf Jesus se tyd in Egipte as die vervulling van Hosea 11:1: “Ek het hom, my seun, uit Egipte geroep.” Jesus herhaal dus Israel se verhaal met sy eie eksodus uit Egipte. Jare later sien ons hoe Jesus deur die water van doop in die Jordaanrivier gaan en God se Seun genoem word (Matteus 3:17). Hierdie gebeurtenis herinner ons Israel wat God se oudste seun genoem word (Eksodus 4:22) en hoe die Israeliete tydens hulle eie eksodus deur die waters van die Rooisee gegaan het (Eksodus 14:21-29).

Later, wanneer die Gees vir Jesus die woestyn inlei om daar vir 40 dae lank voorsien en getoets te word, moet ons onthou hoe God die Israeliete 40 jaar lank in die woestyn voorsien en getoets het (Eksodus 16:1-7; Deuteronomium 8:2). Hoewel die Israeliete hulle ontrouheid openbaar deur God met hul murmurering op die proef te stel (Eksodus 17:1-7), toon Jesus onwrikbare getrouheid (sien Matteus 4:1-11).

As die nuwe Israel, kondig Jesus aan dat die nuwe "beloofde land" – God se Koninkryk (of die “Koninkryk van die hemel”) – na die aarde sal kom net soos dit in die hemel is. Op die Eksodus-weg word Jesus self uit die dood verlos om deur die woestyn te gaan en dan die beloofde Koninkryk in te gaan. Die res van die Nuwe Testament dui daarop dat Hy voortgaan om alle mense uit te nooi om op hierdie nuwe lewensweg by Hom aan te sluit.

Vrae vir nadenke:

Wat leer die ooreenkomste tussen Israel se eksodus uit Egipte en Jesus se eksodus ons omtrent Jesus se missie op aarde? Watter ander ooreenkomste met vorige eksodus-verhale sien jy in vandag se oordenking? (Dink aan agtergrond, karakters, simbole en beelde, sleutelwoorde en frases, ens.)