BibleProject | Ontdek die tema van die Eksodus-weg in die SkrifSample

Deur middel van doop – op weg na God se Koninkryk

Vandag se tekste bied drie perspektiewe op dieselfde verhaal van Johannes die Doper se eerste ontmoeting met Jesus waartydens hy vir Jesus doop. Hoe hou Jesus se doop verband met die Eksodus-weg? Dink terug aan Moses wat Israel uit Egipte gelei het. Met die volk se deurtog deur die Rooisee kom hulle nie onmiddellik by hulle bestemming aan nie. Om deur die waters te gaan, dui dus nie op ’n finale ingang in die beloofde land nie. Die mense begin eerder met 'n reis (deur herskepping) wat hulle na die toekoms sal lei wat God belowe het. Jesus is gedoop as 'n parallel met Moses – nie omdat Jesus sondig was nie. Die Skrif sê dat Jesus nooit gesondig het nie. Soos Moses by die Rooisee, gaan Jesus egter saam met sy volk die water in om hulle na iets nuuts te lei. Deur hierdie verhale met mekaar te verbind, toon die evangelieskrywers dat die doop nie ’n eindstreep is nie, maar ’n beginpunt. Dit is 'n aanduiding van ’n reis wat mense voorberei op die weg van lewe in God se Koninkryk.

Die menigtes om die Jordaanrivier moet van godsdienstige en politieke onderdrukking gered word. Hulle het nóg meer verlossing nodig van die skadelike denk- en gedragspatrone waarin hulle vasgevang is. Johannes roep dus uit: “Bekeer julle, want die koninkryk van die hemel het naby gekom” (Matteus 3:2). Die woord “bekeer” beteken “draai om”. Dit gaan oor die keuse om op ‘n nuwe manier te lewe. Johannes roep mense uit die weg waarop hulle lewe, deur die doopwater, in God se Koninkryksweg van lewe in – die weg van Jesus. Kom ons kyk na die herhalende tonele wat dien as verbindingspunte in hierdie gedeelte. Elke evangelieskrywer haal Jesaja aan (die gedeelte wat ons gister bespreek het), wat Johannes se doop verbind met Israel se eksodus uit Babiloniese gevangenskap. Let op hoe alles by die Jordaanrivier gebeur – die rivier waardeur Israel die heel eerste keer die beloofde land binnegaan. Johannes noem Jesus die “Lam van God”, wat verband hou met die eksodus uit Egipte en die eerste Paasfees. Kyk verder – daar is baie om hier waar te neem! Deur die tema van die Eksodus-weg deur die Skrif te volg, kan ons hierdie verhaal oor Jesus se doop in ’n nuwe lig sien. Hy is soos ’n nuwe Moses wat ’n nuwe reddingsmissie lei en daarop gemik is om doelbewus ’n nuwe manier van lewe te betree, die Eksodus-weg.

Vrae vir nadenke:

Het jy al ooit aan doop (of belydenis-aflegging) gedink as ’n eindstreep — ’n gebeurtenis wat daarop dui dat jy reeds by jou eindbestemming aangekom het? Wat gebeur wanneer ons die doop herdefinieer as die begin van ’n reis wat ons omskep in mense wat in God se Koninkryk kan lewe? By die eerste Paasfees het die bloed van 'n offerlam sonder enige gebrek, mense teen die doodsbedreiging beskerm. Johannes noem Jesus dan die “Lam van God” en sê dat Hy “die sonde van die wêreld wegneem” (Johannes 1:29). Waarom dink jy verbind Johannes vir Jesus op hierdie manier met die eerste Paasfees ?