BibleProject | Ontdek die tema van die Eksodus-weg in die SkrifSample

Dit het al tevore gebeur — 'n Nuwe eksodus

In die vorige oordenking het ons na Israel se eksodus uit Egipte gekyk. Namate ons die volk se reis na die beloofde land volg, sien ons dat hulle soms vir God volg en Hom soms wantrou en ignoreer. Geduldig herinner God die mense daaraan dat Hy hulle tot vryheid en lewe gered het. As hulle die gebooie verbreek en hulle verbondsverhouding met God beskadig, waarsku God hulle dat hulle weereens onderdrukking en dood sal ondervind. Die volk ignoreer uiteindelik hierdie waarskuwings. Daarom is Israel dus teen 586 v.C. verwoes en Jerusalem asook die tempel word vernietig. Die volk word in ballingskap na Babilon weggevoer waar hulle weer onderdrukkende tirannie beleef. Hulle het ’n uitweg nodig en God bied, deur middel van sy profete, aan hulle hoop. Jesaja 40:3 beskryf ’n stem wat die ballinge beveel om "die pad vir die Here gereed te maak", dit wil sê, om volgens God se opdragte te lewe, want Hy kom om die volk vry te maak. Jesaja se woorde openbaar God se belofte om mense op ’n nuwe soort uittog te lei – uit ballingskap, deur die woestyn en terug na hulle goeie land. In hierdie nuwe eksodus word die volk deur God op 'n kragtige wyse (Jesaja 40:10; Eksodus 6:6) van hulle onderdrukkers verlos. Net soos Hy Moses opgerig het om die eksodus uit Egipte te lei, belowe God om uiteindelik ’n “vaandel vir die volk” uit die geslag van Isai op te wek — ’n groter leier wat ’n koning uit Dawid se geslagslyn is (Jesaja 11:10).

Wanneer die volk Babilon verlaat, neem hulle baie rykdom saam met hulle (11:14), wat herinner aan die optrede van die Israeliete wat Egipte voor hulle uittog geplunder het (Eksodus 12:36). Net soos God die Rooisee met ‘n wind oopgekloof het (Eksodus 14:21-22), stuur Hy hier ‘n skroeiende wind om die Eufraatrivier op te droog (Jesaja 11:15). Die volk word uit ballingskap weggeneem, deur water en die woestyn heen en teruggebring na die lewe van vryheid waarvoor God hulle bestem het. Hulle ervaar weereens die Eksodus-weg.

Vrae vir nadenke:

Hoe hou Jesaja se visioen van ’n nuwe soort eksodus verband met die verhaal van Israel se uittog uit Egipte of met ander uittogverhale wat ons tot dusver gelees het?

Hierdie Bybelse eksodus-verhale toon dikwels die almag van God. Die einde van hierdie gedeelte in Jesaja bied 'n verrassende manier om God te beskou. Lees weer Jesaja 40:11. God sê dit is hoe Hy sy volk – wat dikwels opstandig, onverstandig en vergeetagtig is – sal behandel terwyl Hy hulle toerus en lei. Wat openbaar Jesaja se woorde moontlik omtrent God se karakter?