’n Reis

Ek en jy is op ’n reis op pad na die ewigheid toe. Ons moet ons vandag ’n baie ernstige vraag afvra en dit is op watter pad ons is. Jesus sê baie duidelik dat as ons nie saam met Hom is nie, ons definitief teen Hom is (Matt. 12:30). En as ons teen Hom is, gaan ons ons lewe verloor. Maar as ons saam met Hom werk en saam met Hom op die pad na die ewigheid is, het ons niks om oor bekommerd te wees nie.

Jonathan Edwards het gesê: “As ons lewe nie ’n reis na die ewige lewe is nie, is dit ’n reis op pad na die hel toe.” Dit is ’n baie ernstige stelling. Daar is slegs een pad hemel toe. Die Here sê self vir ons daardie pad is nou en dat daar min mense op gaan wees. Tog is die pad na die hel toe breed en vol mense (Matt. 7:13-14). Dit gaan ’n maklike pad sonder uitdagings wees. Maar dit is ook die pad wat na die ewige verderf toe gaan lei.

Ek en jy moet baie seker wees dat ons op pad saam met Jesus is — op pad saam met Hom na die ewige lewe toe.

Hierdie oordenkings is geneem uit LEEF VIR DIE EWIGHEID deur Angus Buchan © Christelike Uitgewersmaatskappy. Besoek gerus www.cumbooks.co.za.