Kha vha Tshile Vhutshilo ho Ḓalaho Ndivho!Sample

Kha vha vhe Ṱhanzi I Shumaho

U ḓivha nḓila ya u vha ṱhanzi i shumaho shangoni ḽashu ḽa ḓuvha na ḓuvha zwi thoma nga u pfhesesa zwine Mudzimu a ṱoḓa vhaṅwe vha tshi zwi guda nga vhutshilo hashu. Phindulo pfhufhi ine ya vha khagala, ndi Yesu. Fhedzi zwenezwo zwi amba mini?

Yesu o vha tsumbo yo fhelelaho ya nḓila ine Mudzimu a ṱoḓa ri tshi tshila ngayo. Musi Yesu a tshi tshila vhutshilo hawe ḽifhasininga kha ḽifhasi ḽo fhambanaho vhukuma na ḽashu’ ḽa ṋamusi, O ṱanganya vhuvha ho fhelelaho ha Mudzimu nahone a ṋea tsumbo yo teaho kha shango ḽashu ḽa musalauno.

Ndi vhuvha ha Mudzimu vhune a tama u vhu bveledza vhutshiloni hashu na u vhoniwa nga vhaṅwe. Hezwi zwi swikelelwa fhedzi nga vhushaka hashu ha muthu nga eṱhe na Yesu. Yesu o ri:

“Munḓirivhe ndi Nṋe, inwi ni matavhi. Ane a dzula kha Nṋe, Nṋe nda dzula khae ndi ene ane a aṋwa mitshelo minzhi, ngauri ni si na Nṋe a ni koni u ita tshithu.” Johanisi 15:5

“Vhugala ha Khotsi anga vhu vhonala musi inwi ni tshi aṋwa mitshelo minzhi, nga u ralo na vha vhafunziwa vhanga.” Johanisi 15:8

Sa davhi ḽine ḽa sala kha nḓirivhe ḽi wana vhutshilo haḽo khaḽo ḽa kona u aṋwa mitshelo, zwo tou ralo na kha riṋe vhane ra dzula kha vhushaka hashu na Yesu - ri aṋwa mitshelo - kana u sumbedza vhuvha ha Mudzimu nga vhutshilo hashu kha vhaṅwe.

“Hone mutshelo wa Muya ndi lufuno na dakalo na mulalo na u sa fhela mbilu na vhulenda na vhuthu na u fulufhedzea na u vuḓa na u ḓifara. A hu na mulayo une wa lwa na zwenezwo.” Vhagalata 5:22-23

Musi vhuvha ha Mudzimu vhu tshi khou shuma kha riṋe na nga riṋe - lufuno lwawe, dakalo, mulalo, u sa fhela mbilu, vhuthu, vhuḓi, u fulufhedzea, vhulenda na u ḓifara ri vha ṱhanzi i shumaho ri tshi tshila vhutshilo hashu ha ḓuvha na ḓuvha.

Sa zwe zwa vha zwo ralo misini ya Yesu, mbonalo ya nga nnḓa i shumaho ya vhuvha ha Mudzimu nga vhutshilo hashu - mutshelo wa Muya - a zwi timatimisi. I kokodza ndivho ya Vhakhriste na vha sa tendi u fana, nahone a zwo ngo ḓowelea uri muthu a vhudzise nga hazwo.

“Khristo ndi Ene ane na fanela u mu luvha e Muṋe waṋu mbiluni dzaṋu; ni dzule no ḓiimisela u fhindula muṅwe na muṅwe ane a nga ni sengisela zwe na zwi fulufhela.” 1 Pitrosi 3:15

Kha vha ḓilugisele. Muṅwe muthu a nga vha a tshi khou vha lavhelesa na u ṱoḓa u vha vhudzisa vha songo zwi lavhelela. Vhuṱanzi havho ha vhuṋe ha u tshidzwa na ha mushumo wa Mudzimu u mangadzaho une wa khou bvela phanḓa vhutshiloni havho ndi mathomo mahulwane. Zwiṅwe hafhu ndi zwa uri yeneyi bugu ndi tshiṅwe tshishumiswa tshine vha nga tshi shumisa u itela u thusa muthu u pfhesesa nga maipfhi o leluwaho mulaedza wavhuḓi wa lufuno lwa Mudzimu na u tshidzwa zwine zwa wanala nga vhoṱhe.