Kha vha Tshile Vhutshilo ho Ḓalaho Ndivho!Sample

Khiyi dza Vhushaka Vhu Bvelelaho

Vhushaka vhuṅwe na vhuṅwe, vhu nga vha ha khonani, muraḓo wa muṱa, mufarisi, kana na Mudzimu, vhu na zwipiḓa zwivhili zwa ndeme zwine zwa ita uri vhu bvelele: lufuno na u vha na vhupfhiwa zwine zwa kovhelwa vhukati ha vhathu, na u vhea lufuno lwonolwo kha nyito.

Ngoho ndi ya uri lufuno lwa vhukuma lu dzula lu tshi tshimbila na zwiito; khonani ya vhukuma i tshi vhona muṅwe a tshi ṱoḓa thuso i ḓo aravha nga thuso. Zwo tou ralo na kha vhushaka hashu na Mudzimu. U funa Mudzimu zwa vhukuma zwi tshimbidzana na zwiito; u kwama mbilu ya Mudzimu nga u kwama vhutshilo ha vhane ra vha navho.

U shumisa vhushaka hashu na vhaṅwe nga vhuḓalo zwi thoma nga vhushaka hashu na Mudzimu. Zwi re zwone ndi uri Mudzimu u humbela uri vhushaka hashu na vhaṅwe vhu vhe nyengedzedzo ya vhushaka hashu nae. Vha dzhiele nzhele ndaela mbili khulwanesa dzi re Bivhilini samusi dzo bulwa nga Yesu:

“‘Funa Mudzimu Muṋe wau nga mbilu yau yoṱhe, nga zwoṱhe zwine wa vha zwone, nga ṱhalukanyo yau yoṱhe, nga maanḓa au oṱhe!’ Une wa tevhela asuyu: ‘Funa muṅwe unga iwe muṋe.’ A hu tshee na muṅwe mulayo une wa fhira yenei mivhili.” Markosi 12:30-31

Sa vhatendi, vhushaka hashu ho khwaṱhaho na Mudzimu na vhushaka hashu ho khwaṱhaho na vhaṅwe ndi zwone zwine zwa vha zwa ndeme vhukuma kha Mudzimu - u mu funa na u funa vhaṅwe.