Solid Joys ShqipSample

Çfarë do të thotë ta duash Perëndinë

O Perëndi, ti je Perëndia im, unë të kërkoj në mëngjes; shpirti im është i etur për ty; ty të dëshiron mishi im në tokë të thatë dhe të djegur, pa ujë. Kështu të admirova në shenjtërore, duke soditur forcën tënde dhe lavdinë tënde. (Psalmi 63:1-2)

Vetëm Perëndia do ta kënaqë një zemër si ajo e Davidit. Dhe Davidi ishte një njeri sipas zemrës së vetë Perëndisë. Edhe ne u krijuam që të jemi kështu.

Thelbi i asaj se çfarë do të thotë ta duash Perëndinë është: të jesh i kënaqur në Të. Në Të—jo thjesht në dhuratat e Tij, por në vetë Perëndinë, si personi i lavdishëm!

Dashuria për Perëndinë do të përfshijë bindjen ndaj të gjitha urdhërimeve të Tij; do të përfshijë besimin në gjithë fjalën e Tij; do të përfshijë falënderimin për të gjitha dhuratat e Tij. Por të gjitha këto janë rrjedhoja. Thelbi i dashurisë për Perëndinë është admirimi dhe kënaqësia që gjejmë në gjithçka që Ai është. Dhe është kjo kënaqësi me Perëndinë që i bën të gjitha reagimet tona të tjera të jenë vërtet përlëvduese për të.

Të gjithë ne e dimë këtë gjë me intuitë, por dhe nga Shkrimi. A ndihemi më tepër të nderuar nga dashuria e atyre që na shërbejnë nga ndjenja e detyrës, apo nga kënaqësitë e bashkësisë?

Bashkëshortja ime nderohet më tepër kur unë them: “Lumturohem kur kaloj kohë me ty.” Lumturia ime është një jehonë e vlerës së saj. E njëjta gjë është edhe me Perëndinë. Ai përlëvdohet më tepër në ne, kur ne kënaqemi më tepër në Të.

Asnjëri prej nesh nuk ka arritur të ndiejë kënaqësinë e përsosur në Perëndinë. Shpesh vajtoj për murmuritjen e zemrës time kur humbas ndonjë rehati apo lehtësi tokësore. Megjithatë unë kam shijuar që Zoti është i mirë. Përmes hirit të Perëndisë, unë e njoh tani burimin e gëzimit të përjetshëm.

Prandaj më pëlqen t’i kaloj ditët duke i tërhequr njerëzit drejt gëzimit derisa ata të thonë bashkë me mua: “Për një gjë iu luta Zotit dhe atë kërkoj: të banoj në Shtëpinë e Zotit tërë ditët e jetës sime, për të soditur bukurinë e Zotit dhe për të admiruar tempullin e tij” (Psalmi 27:4).