Kruis Van LiefdeSample

Jy kan ’n ligdraer wees

Om met sagte oë en ’n lig-aangee-gesindheid na die wêreld en sy mense te kyk gebeur nie vanself nie. Ons natuurlike geaardheid is immers om krities en veroordelend te wees. Om raak te sien wat ander verkeerd doen, hoe onvolmaak hulle is. Waar hul swakhede lê. Dit laat ons mos soms so ’n bietjie beter oor onsself voel.

Totdat ons na die Man aan die kruis kyk en weet dat Hy ook mý krake so goed ken, maar steeds met deernis-oë na my kyk. Dat Hy al my stukkendwees raaksien, maar voortdurend sy vergifnis aanbied. Dat Hy my elke dag met nuwe genade omarm en sy onvoorwaardelike liefde onophoudelik oor my stort. Dán verstaan ek iets van die kruisliefde: van ’n mens se foute raaksien, maar tog begrip hê. Van iemand se ánders-wees besef, maar dit waardeer. Van kwaad word en weer vergewe, seerkry en heel word; van verskil, maar gemeenskaplike grond soek.

Om met sensitiewe oë te leef is ’n genade-reis waarin ek oor en oor na my Meester kyk en vra dat ek soos Hy sal wees. Dis ’n proses waarin ek gedurig sy liefde vir my sien, dit in sy Woord raaklees en dit in my hart vasvang, sodat ek sy lig sal aangee. Totdat my hart al hoe sagter teenoor ander word; ek met teerheid aan hulle sal dink. Sagte woorde spreek. Met sagte ore hoor. Die liefde lééf.

Mag die Lam jou vandag aanspoor om soos sagte reënbuie op ander se harte te wees.

Gee my u soort oë, Jesus.