ការកាន់ទុក្ខធ្វើឱ្យឈឺចាប់៖ ក្ដីសង្ឃឹមសម្រាប់ថ្ងៃហូលីដេគំរូ

អីយ៉ា! ថ្ងៃហូលីដេ! វាជាគ្រាដែលសកម្មភាពការងារត្រូវបានផ្អាកមួយរយៈ ហើយវាក៏ជាពេលដែលអាចរំឭកដល់យើងថា ទម្លាប់ដែលយើងគួរធ្វើនិងធ្លាប់ធ្វើ នោះបានមកដល់ហើយដែរ។ ដូចជាពិធីបុណ្យណូអែលនោះក្ដី គឺយើងរំពឹងថាវានឹងឆាប់មកដល់ និងនៅជិតបង្កើយៗដែរហើយ។ គ្រានោះគឺជាពេលដែលគ្រប់គ្នាមានចិត្តពេញដោយអំណររីករាយ ការដឹងគុណ ក្ដីស្រឡាញ់ ក្ដីនឹករឭកពីក្រុមគ្រួសារ ហើយនិងចិត្តរំភើប មែនដែរអត់?



តែគួរឱ្យសោកស្ដាយ អារម្មណ៍នៃចិត្តទាំងនេះ គឺមិនស្ថិតនៅក្នុងមនុស្សរាល់គ្នានោះទេ—ជាពិសេសគឺសម្រាប់អស់អ្នកដែលបានបាត់បង់នូវមនុស្សជាទីស្រឡាញ់ ដែលជាអស់អ្នកបានបាត់នូវទំនាក់ទំនងយ៉ាងជ្រាលជ្រៅ ឬជាអ្នកកំពុងទទួលរងវិបត្តិគ្រួសារ ឬកំពុងតែបាត់បង់មនុស្សជាទីស្រឡាញ់ដោយសារមរណៈភាព ឬការឈឺចិត្តនោះទៅវិញ។



ពេលកំពុងធំដឹងក្ដី ខ្ញុំតែងតែស្រឡាញ់គ្រានៃថ្ងៃហូលីដេ ហើយពិតជារំពឹងរង់ចាំថ្ងៃទាំងនោះមែនទែន។ នៅពេលប្អូនស្រីដែលមានអាយុ ២២ ឆ្នាំ របស់ខ្ញុំគាត់បានស្លាប់នៅថ្ងៃបុណ្យរំឭកការដឹងគុណ នោះថ្ងៃហូលីដេ ដែលធ្លាប់ជាថ្ងៃដ៏សប្បាយរីករាយអស្ចារ្យ ត្រូវប្ដូរមកជាថ្ងៃដ៏សោកសៅ។ ខ្ញុំបន់ឱ្យតែវាឆ្លងហួសទៅឱ្យផុតពីមួយឆ្នាំៗទៅវិញ។



តើអ្នកអាចស្វែងរកក្ដីសង្ឃឹមនៅក្នុងរដូវកាលនៃថ្ងៃហូលីដេបានយ៉ាងដូចម្ដេច?



តើអ្នកអាចគោរពដល់មនុស្សដ៏មានតម្លៃរបស់អ្នក ដែលគាត់បានចាកឋានទៅ និងកំពុងតែអបអរជាមួយព្រះ ឬមិនបានទទួលស្គាល់ព្រះ នោះបានដោយរបៀបណា?



តើអ្នកអាចមានអំណរនៅក្នុងរដូវកាលនៃថ្ងៃហូលីដេ... ជាពិសេសនៅក្នុងខណៈពេលនៃការកំពុងកាន់ទុក្ខយ៉ាងសោកសៅនោះ ដោយរបៀបណា?



តើអ្នកអាចបង្កើតគ្រាមានន័យក្នុងពេលអបអរថ្ងៃឈប់បុណ្យ ដែលអាចនាំឱ្យអ្នកមានភាពសុខសាន្ត ដោយមិនគិតពីអ្វីៗដែលកំពុងតែកើតឡើងនៅក្នុងជីវិតរបស់អ្នក ដោយរបៀបណា?



សូមចូលរួមជាមួយនឹងខ្ញុំក្នុងរយៈពេលប៉ុន្មានថ្ងៃខាងមុខ ក្នុងខណៈពេលដែលខ្ញុំឆ្លើយតបទៅកាន់សំណួរទាំងប៉ុន្មានខាងលើ និងសំណួរដទៃផ្សេងទៀត។



«ឱ ព្រះវរបិតាដែលគង់នៅស្ថានសួគ៌! ទូលបង្គំសូមអធិស្ឋានសម្រាប់រាល់អស់អ្នកដែលកំពុងតែឈឺចាប់ នៅក្នុងគ្រាប្រារព្ធបុណ្យទាំងនេះ—ជាពិសេសនៅគ្រានៃថ្ងៃបុណ្យរំឭកការដឹងគុណ និងថ្ងៃបុណ្យណូអែល នេះ។ សូមព្រះអង្គព្យាបាល ហើយកម្សាន្តចិត្តយ៉ាងជ្រាលជ្រៅចំពោះអស់ទាំងដួងចិត្តដែលកំពុងតែឈឺចាប់។ សូមព្រះអង្គចាក់បង្ហូរព្រះគុណនិងក្ដីមេត្តាករុណារបស់ព្រះអង្គ ទៅលើពួកគាត់ជាប្រចាំថ្ងៃ។ សូមព្រះអង្គឱបក្រសោបពួកគាត់នៅក្នុងរង្វង់នៃព្រះហស្ដពេញដោយក្ដីស្រឡាញ់ ហើយសូមលើកនិងបីពួកគាត់ឱ្យឆ្លងរួចផុតពីការកាន់ទុក្ខរបស់ពួកគាត់។ ទូលបង្គំទូលសូមនៅក្នុងព្រះនាមព្រះយេស៊ូវ។ អាមែន!»។



អត្ថបទស្មឹងស្មាធិ៍ជាមួយនឹងព្រះនេះ បានរក្សាសិទ្ធិឆ្នាំ © 2015 ដោយ លោកស្រី ឃីម ណែល (Kim Niles) ពីព័ន្ធកិច្ច ការកាន់ទុក្ខធ្វើឱ្យឈឺចាប់ (Grief Bites)។ សូមរក្សាសិទ្ធិទាំងឡាយ។ បានប្រើដោយមានការអនុញ្ញាត។