Exodo 37
37
An Paggibo kan Kaban nin Tipan
(Exo. 25:10-22)
1An Kaban nin Tipan ginibo ni Bezalel sa kahoy na akasya na may sukol na syento dyes sentimetros an laba, sesenta y seis sentimetros an lakbang asin sesenta y seis sentimetros an langkaw. 2Pinatos niya an laog saka an luwas kaini nin purong bulawan asin binugtakan nin moldurang bulawan sa palibot. 3Ginibohan niya ini nin apat na siningsing na bulawan asin itinakod sa apat na bitis kaini, duwang siningsing sa mag-ibong na gilid kan Kaban. 4Ginibo niya an mga pasanan na akasya asin pinatos sa bulawan. 5Dangan isinurok niya an mga pasanan sa mga siningsing na bulawan na nasa duwang gilid kan Kaban. 6Ginibo niya an takop sa purong bulawan na may sukol na syento dyes sentimetros an laba asin sesenta y seis sentimetros an lakbang. 7Ginibo niya an duwang kerubin sa pinulpog na bulawan, 8saro sa mag-ibong na poro kan takop. Ginibo niya na magin saro sanang pedaso an duwang kerubin sagkod an takop. 9Naghahampangan an duwang kerubin sa ibabaw kan takop na natatahoban kan nakaunat nindang mga pakpak.
An Paggibo kan Lamesa para sa Tinapay na Dolot sa Dios
(Exo. 25:23-30)
10Ginibo niya an lamesa sa kahoy na akasya na may sukol na otsenta y otso sentimetros an laba, kwarenta y kwatro sentimetros an lakbang asin sesenta y seis sentimetros an langkaw. 11Pinatos niya ini nin purong bulawan asin binugtakan nin moldurang bulawan sa palibot. 12Naggibo siya nin sanipa na pito may kabangang sentimetros an lakbang asin pinalibotan niya ini nin moldurang bulawan. 13Ginibo niya an apat na siningsing na bulawan dangan ikinabit sa apat na kanto kan lamesa na namumugtakan kan mga bitis. 14An mga siningsing na susurokan kan mga pasanan sa pagdara kan lamesa ikinabit niya harani sa sanipa. 15Ginibo niya an mga pasanan sa akasya asin pinatos an mga ini nin bulawan. 16Ginibo niya sa purong bulawan an mga kagamitan sa lamesa: an mga plato na para sa insenso, an kalis, dulay asin mangko na para sa dolot na arak.
An Paggibo kan Kandelero
(Exo. 25:31-40)
17Ginibo man niya an kandelero sa purong bulawan. An bitis saka an kahawakan kaini ginibo niya sa pinulpog na bulawan; an dekorasyon na mga burak kaiba an mga bukol asin an mga petalo ginibo niya na magin saro sanang pedaso sagkod an kandelero. 18Igwa nin anom na sanga an mag-ibong na gilid kan kandelero, tolong sanga sa lambang gilid. 19An lambang sanga igwa nin tolong dekorasyon na burak na arog sa mga bukad na burak nin almendras na may kaibang mga bukol asin mga petalo. 20An kahawakan kan kandelero igwa nin apat na burak na arog sa mga bukad na burak nin almendras na may kaibang mga bukol asin mga petalo. 21Igwa nin sarong bukol sa irarom kan lambang pades kan anom na sanga. 22An mga bukol, an mga sanga saka an kandelero ginibo niya sa saro sanang pedaso nin pinulpog na bulawan. 23Ginibo niya an pitong ilawan para sa kandelero. An mga pansipit sa mitsa asin an mga bandehado ginibo niya sa purong bulawan. 24Naggamit siya nin treynta y singko kilos na purong bulawan sa paggibo kan kandelero sagkod kan gabos na kagamitan kaini.
An Paggibo kan Altar nin Insenso
(Exo. 30:1-5)
25Ginibo niya an akasyang altar nin insenso. Ini kwadrado, may sukol na kwarenta y singko sentimetros an laba, kwarenta y singko sentimetros an lakbang asin nubenta sentimetros an langkaw. An mga sungay sa apat na kanto sagkod an mismong altar ginibo niya na magin saro sanang pedaso. 26Pinatos niya nin purong bulawan an parteng ibabaw, an apat na gilid sagkod an mga sungay, dangan pinalibotan niya nin moldurang bulawan an altar. 27Ginibohan niya ini nin duwang siningsing na bulawan, na itinakod niya sa duwang gilid sa ibaba kan moldura, tanganing surokan kan mga pasanan na gagamiton sa pagdara kan altar. 28Ginibo niya an mga pasanan na akasya asin pinatos niya nin bulawan an mga ini.
An Paggibo kan Panlahid na Lana asin kan Insenso
(Exo. 30:22-38)
29Ginibo man niya an banal na lanang panlahid, asin an puro saka mahamot na insenso na sinalak siring sa pahamot.
ទើបបានជ្រើសរើសហើយ៖
Exodo 37: MBBBIK92
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Marahay na Bareta Biblia © Philippine Bible Society, 1992.