លូកា 19:28-40 កាលព្រះ‌យេស៊ូមានព្រះ‌បន្ទូលដូច្នោះហើយ ព្រះអង្គក៏យាងនាំមុខបណ្ដា‌ជន ឡើងទៅក្រុងយេរូ‌សាឡឹម។ លុះព្រះអង្គយាងជិតដល់ភូមិបេតផា‌សេ និងភូមិបេតថា‌នី ដែលនៅចង្កេះភ្នំដើមអូលីវ ព្រះអង្គចាត់ | ព្រះគម្ពីរភាសាខ្មែរបច្ចុប្បន្ន ២០០៥ (គខប)

លូកា 19:28-40 គខប

កាលព្រះ‌យេស៊ូមានព្រះ‌បន្ទូលដូច្នោះហើយ ព្រះអង្គក៏យាងនាំមុខបណ្ដា‌ជន ឡើងទៅក្រុងយេរូ‌សាឡឹម។ លុះព្រះអង្គយាងជិតដល់ភូមិបេតផា‌សេ និងភូមិបេតថា‌នី ដែលនៅចង្កេះភ្នំដើមអូលីវ ព្រះអង្គចាត់សិស្ស*ពីររូបឲ្យទៅមុន ដោយមានព្រះ‌បន្ទូលថា៖ «ចូរទៅភូមិខាងមុខនោះ ពេលអ្នកទៅដល់ អ្នកនឹងឃើញកូនលាមួយដែលគេចងនៅទីនោះ ពុំទាន់មាននរណាជិះនៅឡើយទេ ចូរស្រាយវាដឹកមក។ ប្រសិនបើមានគេសួរថា “ហេតុអ្វីបានជាអ្នកស្រាយវា?” ចូរឆ្លើយទៅគេថា “ព្រះ‌អម្ចាស់ត្រូវការវា”»។ សិស្សទាំងពីរក៏ចេញទៅ ហើយឃើញដូចព្រះ‌យេស៊ូមានព្រះ‌បន្ទូលប្រាប់គេមែន។ ពេលគេកំពុងស្រាយកូនលា ម្ចាស់វាសួរថា៖ «ហេតុអ្វីបានជាអ្នកស្រាយលានេះ?» សិស្សឆ្លើយថា៖ «ព្រះ‌អម្ចាស់ត្រូវការវា»។ បន្ទាប់មក អ្នកទាំងពីរដឹកកូនលាយកមកថ្វាយព្រះ‌យេស៊ូ ហើយក្រាលអាវធំរបស់ខ្លួនលើខ្នងវា ថ្វាយព្រះអង្គគង់។ នៅពេលព្រះអង្គយាងទៅមុខ មនុស្ស‌ម្នាយកអាវធំរបស់ខ្លួនមកក្រាលតាមផ្លូវ។ កាលព្រះ‌យេស៊ូយាងតាមផ្លូវដែលចុះពីភ្នំដើមអូលីវ មកជិតដល់ក្រុងយេរូ‌សាឡឹម មានសាវ័កច្រើនកុះ‌ករអរសប្បាយ នាំគ្នាបន្លឺសំឡេងសរសើរតម្កើងព្រះ‌ជាម្ចាស់អំពីការអស្ចារ្យទាំងប៉ុន្មាន ដែលគេបានឃើញ។ គេពោលថា៖ «សូមព្រះ‌ជាម្ចាស់ប្រទានពរដល់ ព្រះ‌មហា‌ក្សត្រដែលយាងមក ក្នុងព្រះ‌នាមព្រះ‌អម្ចាស់! សូមសន្តិ‌ភាពកើតពីស្ថានបរម‌សុខ*មក សូមលើកតម្កើងសិរី‌រុងរឿងរបស់ព្រះអង្គ នៅស្ថានដ៏ខ្ពង់‌ខ្ពស់បំផុត!» ។ មានអ្នកខាងគណៈ‌ផារីស៊ី*ខ្លះ ដែលនៅក្នុងចំណោមបណ្ដា‌ជន ទូលព្រះ‌យេស៊ូថា៖ «លោកគ្រូ សូមឃាត់សិស្សរបស់លោកឲ្យនៅស្ងៀមផង!»។ ព្រះ‌យេស៊ូមានព្រះ‌បន្ទូលតបថា៖ «ខ្ញុំសុំប្រាប់ឲ្យអ្នករាល់គ្នាដឹងថា ប្រសិនបើអ្នកទាំងនេះនៅស្ងៀម ដុំថ្មមុខជាស្រែកជំនួសគេវិញមិនខាន»។

អាន លូកា 19

ស្ដាប់នូវ លូកា 19

ប្រៀបធៀបគ្រប់ជំនាន់បកប្រែ: លូកា 19:28-40