Mateo 14
14
Morto di Huan Boutista
(Marko 6:14-29; Lukas 9:7-9)
1Den e tempu ei gobernador Heródes di Galilea a bin tende tokante Hesus. 2El a bisa su kriánan: ‘Ta Huan Boutista! El a lanta for di morto; p'esei e tin poder pa hasi milager!’
3A sosodé ku Heródes a manda kohe Huan, bui e i ser'é den prizòn pa motibu di Heródias, señora di su ruman hòmber Filipo. 4Pasobra Huan tabata bisa Heródes: ‘No ta pèrmití pa bo biba ku Heródias.’#Lukas 3:19-20#Levítiko 18:16; 20:21 5Ounke Heródes ker a laga mat'é, e no a hasié pasobra e tabatin miedu di e pueblo. Ta asina ku nan tabata konsiderá Huan un profeta.
6Dia a selebrá Heródes su aña, e yu muhé di Heródias a presentá un baile dilanti di e invitadonan i e baile a deleitá Heródes. 7P'esei Heródes a primintí bou di huramentu di dun'é kiko ku e pidié. 8Riba instigashon di su mama e hobensita a bisa: ‘Mi ke pa bo duna mi kabes di Huan Boutista riba un skalchi.’ 9Heródes a bira tristu, ma el a duna òrdu pa hasi loke e hobensita a pidié, pasobra el a hura dilanti di su invitadonan. 10El a manda un hende prizòn bai kap Huan su kabes kita afó. 11Nan a trese e kabes riba un skalchi i pas'é pa e hobensita ku na su turno a hib'é pa su mama. 12E disipelnan di Huan a bin kohe e kadaver i der'é. Despues nan a bai konta Hesus kiko a pasa.
Hesus ta duna sinku mil hende di kome
(Marko 6:30-44; Lukas 9:10-17; Huan 6:1-14)
13Ora Hesus a tende tur e kosnan akí, El a kita bai for di e lugá ei. Ku boto El a bai un lugá solitario. Ora e hendenan a tende, nan a sali for di e siudatnan i siguiÉ na pia. 14Ora Hesus a sali for di e boto i mira e multitut grandi, El a haña duele di nan i a kura nan enfermonan.
15Komo ya a bira hopi lat, e disipelnan a bin bisa Hesus: ‘E lugá akí ta solitario i ta lat kaba. Manda e hendenan akí bai ya nan por kumpra kuminda pa nan mes.’ 16Hesus a bisa nan: ‘Nan no tin nodi di bai. Boso mes duna nan di kome.’ 17Nan a kontestá: ‘Ma ta sinku pan i dos piská so nos tin aki.’
18Anto Hesus a bisa: ‘Trese nan pa Mi.’ 19El a manda e hendenan kai sinta riba yerba. E ora ei Hesus a kohe e sinku pan- i e dos piskánan; El a hisa su kara na shelu i gradisí Dios. Despues El a kibra e pannan i duna su disipelnan, ku a parti pa e hendenan. 20Tur hende a kome barika yen. E disipelnan a yena diesdos makutu yen yen ku loke a sobrá dje pannan. 21Un kantidat di sinku mil hòmber a kome di e pan, sin konta e muhé i e muchanan ku tabat'ei.
Hesus ta kana riba awa
(Marko 6:45-52; Huan 6:15-21)
22Djis despues Hesus a manda su disipelnan drenta boto, krusa lago promé kunÉ. E mes a keda pa E manda e multitut bai kas. 23Despues ku El a manda e hendenan bai, El a bai resa E so den seru. Ora anochi a sera, El a keda E so kantu di laman. 24E boto a yega na un bon distansia for di tera#14:24 a yega…tera; otro manuskrito tin: tabata meimei di lago kaba i tabata pasa trabou pa bai dilanti, pasobra bientu tabata kontrali. 25Durante e di kuater warda,#14:25 e di kuater warda: entre tres or i seis or di mardugá Hesus a kana riba awa bai serka e disipelnan. 26Ora nan a mira Hesus ta kana riba awa, nan a drenta pániko i bisa: ‘Ta spiritu!’ i nan a grita di miedu. 27Mesora Hesus a kuminsá papia ku nan i bisa: ‘Keda trankil, t'Ami, no tene miedu!’ 28Awor Pedro a rospondé: ‘Señor, si ta Abo, laga mi kana riba awa bini serka Bo!’ 29Hesus a bis'é: ‘Bini numa.’ Pedro a sali for di e boto i a kana riba awa bai serka Hesus. 30Ma ora el a sinti e bientu fuerte, el a haña miedu i a kuminsá senk. El a grita: ‘Señor, salba mi!’ 31Mesora Hesus a rèk man, koh'é tene i bis'é: ‘Hende di poko fe, pakiko bo a kuminsá duda?’ 32Ora nan a drenta den e boto, bientu a kalma. 33E disipelnan den e boto a hinka rudia p'E i bisa: ‘Enberdat, Abo ta Yu di Dios.’
Hesus ta kura e hende malunan na Genesarèt
(Marko 6:53-56)
34Hesus i su disipelnan a krusa e lago i a yega region di Genesarèt. 35E hendenan di e region ei a rekonosé Hesus i a plama e notisia den henter bisindario. P'esei e hendenan a trese tur esnan ku tabata malu serka djE i 36nan tabata rog'É pa e enfermonan por a djis mishi ku un punta di su paña. Tur esnan ku a mishi kunÉ a kura.
ទើបបានជ្រើសរើសហើយ៖
Mateo 14: PBDC13
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Papiamentu Bible with DC © Bible Society in Netherlands Antilles and Aruba, 2012, 2013
