Lukas 4
4
Hesus ta vense tentashon
(Mateo 4:1-11; Marko 1:12-13)
1Hesus a regresá for di Yordan, yená ku Spiritu Santu, ku a gui'É hiba desierto. 2Ei diabel a purba lag'É kai den tentashon durante kuarenta dia largu. E no a kome nada durante e dianan ei i na final El a haña hamber. 3Diabel a bini serka djE i bis'É: ‘Si Bo ta Yu di Dios, bisa e piedra ei bira pan!’ 4Hesus a kontest'é: ‘Skritura ta bisa:
Hende no ta keda na bida
di pan so.’#4:4 di pan so; otro manuskrito tin: di pan so, ma dor di kada palabra ku Dios ta papia#Deuteronomio 8:3
5Diabel a subi bai ariba kunÉ i mustr'É tur e reinonan di mundu den un frega di wowo. 6El a bisa Hesus: ‘Lo mi duna Bo tur poder i rikesa di e reinonan akí, pasobra a entregá nan na mi i mi por duna ken ku mi ke nan. 7Ke men si Bo hinka rudia pa mi i adorá mi, tur e kosnan akí lo bira di Bo.’ 8Hesus a kontest'é: ‘Skritura ta bisa:
Señor, bo Dios, so bo mester adorá
i t'E so bo mester sirbi.’#Deuteronomio 6:13
9Despues diabel a bai Herusalèm kunÉ i a pon'É riba e punta di mas altu di tèmpel. El a bisa Hesus: ‘Si Bo ta Yu di Dios, bula abou for di aki, 10pasobra Skritura ta bisa tòg ku:
Lo E duna su angelnan òrdu
pa nan protegé bo,#Salmo 91:11
11i tambe:
Riba nan man nan lo karga bo,
pa bo no dal bo pia kontra piedra.’#Salmo 91:12
12Hesus a kontest'é: ‘Skritura ta bisa tambe: No pone Señor bo Dios na prueba.’#Deuteronomio 6:16 13Ora diabel a kaba di purba tur manera pa lag'É kai den tentashon, el a bai lag'É pa un tempu.
Hesus ta kuminsá prediká
(Mateo 4:12-17; Marko 1:14-15)
14Hesus a regresá Galilea yená ku poder di Spiritu Santu. Su fama a plama den henter e bisindario ei. 15E tabata siña e hendenan den nan snoa i nan tur tabata gab'É.
Nan ta rechasá Hesus na Nazarèt
(Mateo 13:53-58; Marko 6:1-6)
16Hesus a bai Nazarèt, kaminda El a lanta komo mucha, i riba sabat El a bishitá snoa manera kustumber. El a lanta para pa E lesa Skritura. 17Nan a dun'É e ròl di buki di profeta Isaías pa lesa. Hesus a habri e ròl di buki i a haña e troso ku ta bisa:
18‘Spiritu di Señor ta riba Mi,
p'esei El a ungi Mi
pa anunsiá e bon notisia na pobernan.
El a manda Mi proklamá libertat pa prezunan;
bista pa siegunan;
i pa esnan oprimí, libertat.
19Mi mester anunsiá e era di Señor su grasia.’#Isaías 61:1-2
20Hesus a lora e ròl ser'é bèk, dun'é na e asistente di snoa i kai sinta. Tur hende den snoa a keda ku nan bista fihá riba djE. 21E ora ei El a kuminsá papia ku nan; El a bisa: ‘Awe e palabranan ku boso a tende, a keda kumplí.’ 22Tur hende a ekspresá ku nan tabata di akuerdo kunÉ; nan a keda asombrá di tende e palabranan bunita ku Hesus tabata papia i nan a bisa: ‘N' ta Hesus, yu di Hosé, esei ta?’ 23Hesus a deklará: ‘Sigur boso lo bisa Mi: “Dòkter, kura bo mes antó!” Tambe boso lo bisa: “Nos a tende tur e kosnan ku Bo a hasi na Kafárnao, hasi e kosnan ei aki den bo mes pueblo, no!” ’ 24El a sigui bisa nan: ‘Mi ta sigurá boso: Ningun profeta no ta bonbiní den su mes siudat.#Huan 4:44 25Mi ta bisa boso: Enberdat tabatin hopi biuda na Israel den tempu di Elías, tempu áwaseru a stòp di kai pa tres aña i mei i un hamber grandi a plama rònt pais.#1 Reinan 17:1 26Tòg no a manda Elías serka niun di nan, ma serka un biuda di e pueblo Sarfat na Sidon.#1 Reinan 17:8-16 27Tambe tabatin hopi leproso na Israel tempu di profeta Eliseo. Niun di nan no a kura, ta e sirio Naaman sí a haña su kura.’#2 Reinan 5:1-14 28Ora nan a tende loke Hesus a kaba di bisa, e hendenan den snoa a bira furioso. 29Nan a bula lanta kohe Hesus tene, sak'É fo'i siudat i hib'É riba kabes di e seru, kaminda a traha nan siudat. Nan ker a bent'É for di e subida, 30ma Hesus a kana pasa meimei di e multitut, bai.
Hesus ta saka mal spiritu for di un hòmber
(Marko 1:21-28)
31Hesus a bai Kafárnao, un siudat na Galilea, kaminda E tabata siña e hendenan riba sabat. 32Nan a keda babuká di su manera di siña, pasobra E tabata papia ku outoridat.#Mateo 7:28-29 33Tabatin den snoa un hòmber ku tabatin mal spiritu den dje. El a kuminsá grita: 34‘Ei, ta kiko Bo ke di nos, Hesus di Nazarèt? Akaso Bo a bini pa kaba ku nos? Mi sa bon bon ta ken Bo ta; Bo ta e Santu di Dios!’ 35E ora ei Hesus a skual e spiritu i El a orden'é: ‘Keda ketu i sali for di e hòmber ei!’ E spiritu a hisa e hòmber benta meimei di e snoa i a sali for di e hòmber sin hasié niun daño. 36Tur hende a keda asombrá i un tabata puntra otro: ‘Ta ki e palabranan ei? E hòmber akí ta komandá mal spiritu ku poder i outoridat i nan ta sali bai tambe!’ 37E notisia tokante Hesus a plama tur kaminda den bisindario.
Hesus ta kura hopi hende
(Mateo 8:14-17; Marko 1:29-34)
38Hesus a sali for di snoa i a bai kas di Simon. Suegra di Simon tabatin keintura hopi altu i nan a pidi Hesus yud'é. 39Hesus a bùig riba dje, skual e keintura i e keintura a baha. Mesora e suegra a lanta i a kuminsá sirbi nan.
40Anochi, ora solo a baha, tur hende a trese nan hende malunan, ku tur sorto di malesa, serka Hesus. E tabata pone man riba kada un di nan i kura nan. 41For di hopi hende demoño tabata sali; nan tabata grita: ‘Abo ta Yu di Dios!’ Hesus tabata skual e demoñonan; E no tabata laga nan papia, pasobra nan tabata sa ku E tabata e Mesias.
Hesus ta biaha rònt pa prediká
(Marko 1:35-39)
42Ora di dia a habri, Hesus a sali for di e siudat ei i bai un lugá solitario. E multitut tabata busk'É i ora nan a hañ'É, nan no ker a lag'É bai. 43El a bisa nan: ‘Mi mester prediká e bon notisia tokante reino di Dios den e otro pueblonan tambe, p'esei a manda Mi!’ 44I Hesus tabata prediká den e snoanan di Hudea.#4:44 Hudea; otro manuskrito tin: Galilea
ទើបបានជ្រើសរើសហើយ៖
Lukas 4: PBDC13
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Papiamentu Bible with DC © Bible Society in Netherlands Antilles and Aruba, 2012, 2013
