Markuse 6
6
Jêsusib nachogijauninganik Nazareteme. Tiliklerninganik Apostelinik. Jôhannesib baptiterijub niaᴋoertauninganik. 5,000 it nerrititauninginik. Imiub ᴋângagut Jêsusib pisungninganik.
1Tagvangallo aularpoᴋ, nunaminut pivlune; illiniartingitalo malikpât.
2Sabbatelo neliutingmat, katimavingme ajoᴋertuilerpoᴋ. Unuktullo tussartut tamattominga, ajoᴋertûtingit tataminiarivait, oᴋarlutiglo: Nakit ôma tamakkoa pivagît? ᴋanorlo silatunermik taimaitomik tunitjivionerᴋâ? tatamnartuniglo taimaitunik aggangitigut pijunîk?
3Igloliorteungitôᴋ? Marîab Erninga, Jakôbusiblo, Jôsesiblo, Jûdasiblo, Siminiblo ᴋatangutigingilatsûk? Najangillo, ilûnatik uvaptingnêngilât? Ilûnatiglo sinaungajutigivât.
4Jêsusible oᴋautivait: Nelautaijoᴋ kamagijaunginersauvakpoᴋ nunaᴋatiminut illaminullo, assinginit tamainit.
5Tagvane tatamnartulijungnangilaᴋ atautsemiglônêt; ᴋanimajut illainangit aggangminut aktorpait pijungnaitilugillo.
6Okpinginingillo tataminiarivait. Arvertarporlo iglugasaksoarnut avatiminêtunut, ajoᴋertuivlunelo.
712 illo ᴋaiᴋovait, maggoilivlugillo aularᴋolerpait, ajugautipaillo anernernut maᴋojungnartunut,
8Perᴋolugillo, sumik neksarᴋonagit ingergarlutik, ajaupiatuinrmik kissiane; ikpiârsulijaratiglo, ᴋaᴋᴋôjalijaratiglo, kênaujalijaratiglo tapserutimingne;
9Itigagusersimaᴋovlugille, annorângniglo maggûngnik atorᴋonagit.
10Oᴋautivaillo: Iglomut iterupse, tâpsomanetsainaritse, aularᴋârase tâpsomangat.
11Illangitalo illalioromangipase, oᴋausise tussaromanagillônêt; anititse tagvangat, itikapselo saningit katerarsigik nelojungnairutiksanginut (erᴋartortaujutiksanginullo). Ahamarik oᴋautivapse: Sodomablo Gomorrablo inugilauᴋtangit pitlartaunikinersaujomârput uvluksame erᴋartuivingme iglugasaksoarnit ukkunangat.
12Ailerpullo ajoᴋertuijartorlutiglo ᴋaᴋialeriaᴋarnermik.
13Sâtanasiniglo unuktunik anititsivoᴋ, ᴋanimajuniglo unuktunik pijungnaititsivoᴋ, mingoarûmut mingoarlugit.
14Atanerlo Herôdese tamattominga tussaumalerame, (Jêsusib attinga illitarijaulermat) oᴋarpoᴋ: Jôhannese baptiterijoᴋ toᴋungajunit makisimavoᴋ; tamanna pivlugo taimaitomik tatamnartulivoᴋ.
15Illangille oᴋarput: Elîaseovoᴋ; illangille: nelautaijôvoᴋ, nelautaijullônêt illangatitut.
16Herôdesele tamattominga tussarame, oᴋarpoᴋ: Jôhanneseovoᴋ niaᴋoêrtautilauᴋtara; toᴋungajunit makisimavoᴋ.
17Herôdesele tiliklilauᴋpoᴋ, Jôhannesemik tigujautitsilune, pititsilunelo parngnanairsimavingmut, Herôdiase, nukame Filippusib nulianga pivlugo; tâmna nulianikamiuk.
18Jôhannesib Herôdese oᴋautilaungmago: Idluangilaᴋ, nukavît nulianga pigigangne.
19Herôdiasible Jôhannese toᴋonasuaromagalloarlugo ajorpâle.
20Herôdesible Jôhannese ileragivâ, nelunginamiuk idluartôvlune issumagiktoᴋsôngmat; tamanna pivlugo saputivâ ᴋangaulermallo nâlekpâ, tussarnerilâllo.
21Uvloᴋalermallo pitjutivingmik Herôdesib inûlerviane, tâpsoma atanigasait, sorᴋsuktuksallo angajoᴋângit, Galilêtullo angajoᴋaunersat nerrimârtimagit,
22Tagva Herôdiasib pania iterpoᴋ, tânserlarmelo, Herôdesiblo nerreᴋatingitalo tamanna ᴋuviagivât. Tagva ataniub Herôdesib niviarsiaᴋ oᴋautivâ: Issumangnik tuksiarviginga, pijomajarnik pilitsomavagit.
23Oᴋautimariklugolo oᴋarpoᴋ: Sumik tuksiarvigigumga, ila pilitsomavagit, ataniovingma ᴋoppanganiglônêt.
24Anivlunelo anânane apersoriartorpâ: Sumîk tuksiartuksauvêk? Kiovâ: Jôhannesib baptiterijub niaᴋoanik.
25Itersârivorlo atanermut, ᴋenuvlune oᴋarpoᴋ: Tagvainaᴋ tunitjiviojomavunga Jôhannesib baptiterijub niaᴋoanik, pôgutamut ilimajomik.
26Ataneᴋ kiksalerpoᴋ; oᴋautsinele oᴋarmaringnine pivlugo, nerruᴋatinelo pivlugit, sulinane tuksiarᴋojomalungilâ.
27Ataniublo niaᴋoêrsije tilisârpâ, niaᴋoalo aijauᴋovâ. Tâpsoma parngnanairsimavingmut niaᴋoêriartorpâ,
28Niaᴋoalo pôgutamut ilimajoᴋ tikiupâ, tunilugolo niviarsiamut, niviarsiable anânaminut tunivâ.
29Tamannalo illiniartingita tussaramitsuk, tikilerput timingalo iluvermut ilijartorpât.
30Apostelillo Jêsusemut katilerput, oᴋautivlugolo tamakkoninga tamainik, piniarnermingniglo ajoᴋertuinermingniglo.
31Oᴋautivaillo: Kissipta inuᴋangitomut ailauᴋta, merngoêrserluselo. Tikitut utertullo unungmatta; nerrijungnangilallônêt, agviartaugamik.
32Umiakullo aularput inuᴋangitomut.
33Inuillo takovait allivartut, unuktullo illitarivât, aᴋpangerlutiglo ᴋuterorlutik malikpât illagêklutik iglugasaksoarnit tamainit, ingiarlugolo tikipât.
34Jêsuselo niovoᴋ; inugasaksuillo takogamigit, ilapsugidlarpait; saukatitut mianerijeᴋangitutitut-ingmatta. Unuktuniglo oᴋâlavigilerpait.
35Uvluklilermallo, illiniartingita tikipât, Oᴋautivlugolo: Tamâne sunataᴋangimat, uvluklilermallo;
36Aularlit, mattoma erᴋât iglugasanginut niuvervinginullo, ᴋaᴋᴋôjaᴋsiniariartorᴋovlugit; nerᴋiksaᴋanginamik.
37Jêsusible kiovait, oᴋautivlugillo: Ilipse nerᴋiksanginki tunitjivigisigik. Oᴋautivâllo: Kaᴋᴋôjaᴋsiniariartortuksauvitâ, kênaujat 200 it akkinginut, ukkua nerᴋiksanginîk?
38Oᴋautivaille: Kapsinik ᴋaᴋᴋôjaᴋarᴋisê? ullernaisijartoritse. Ullernairamigillo, oᴋarput: Tellimanik, mingeriângniglo maggûngnik.
39Ikterᴋolerpaillo nerrimârtutitut iviksukkanut ᴋunorlingaitunut.
40Tunulerêktidlutik tâva ikterput ingmigolivlutik 100 illo 100 illo 50 illo 50 illo.
41Ukkualo ᴋaᴋᴋôjat tellimat, mingeriâglo magguk tiguvait, ᴋilangmullo ârlorpoᴋ, ᴋujalivlunelo ᴋaᴋᴋôjat avgorpait, tunivlugillo illiniartiminut, manijerᴋovlugit tâpkonunga, mingeriaglo magguk avikpak ilûnainut.
42Ilûnatik tâva nerrivut, kâgungnairlutiglo.
43Amiakungillo katilerpait, amârgaujat 12 it tattadlugit, mingeriaglo illanginik.
44Nerrilauᴋtullo angutainait 5,000 iovut.
45Illiniartinello erinesâlerdlugit umiarmut ikiorᴋaᴋolerpait, sivorlerijomagamigit Betsaidamut, inuit aularterᴋârnagit.
46Inuillo aulartinamigit, ᴋaᴋᴋamut majorarpoᴋ tuksiariatorlune.
47Unnulermallo umiat tesseᴋsûb ᴋerᴋanêput, Jêsuselo kissime nunamêpoᴋ.
48Takovorlo, epunermik sapikasalermatta, anore aggormatsuk. Pigârvingitale sitamangane unnuame tikilerpait, imab ᴋângagut pisuklune,
49Kângerniarᴋôrdlugit. Imarlo pisugvigingmago takogamitsuk, ijorônasugivât, nipliadlarlutiglo.
50Ilûnatik takogamitsuk, kakkilârput. Tuavile oᴋaᴋatigilerpait, oᴋautivlugit: Manigoleritse, uvangauvunga, erᴋsinase!
51Umiarmullo ikivoᴋ tâpkununga, ᴋassûmivoᴋ tâva kakkilârlutiglo tataminiadlarput angijomik.
52Kaᴋᴋôjat pitjutigilugit silatusinersaulaungilat, ômatingit mangaidlarmatta.
53Ikâlauramiglo, Genêzaremiut nunanganut pivut nunalidlutiglo.
54Umiarmillo niungmatta, inuit illitarijarêrpât.
55Aᴋpangilerlutiglo nunanut mattoma erᴋânêtunut tamainut; ᴋanimajullo aumitimingne nelajut âlerpait najugânut tussaumajamingnut.
56Niuvervingnut, iglugasaksoarnullônêt iglugasangnullônêt iterangat, ᴋanimajiatik ilivait iglut akornganut, tuksiarvigivlugolo, annorângata sinâ aktortauᴋovlugo taipkonunga. Tâpsomingalo aktuijut ilûnatik pijungnairput.
ទើបបានជ្រើសរើសហើយ៖
Markuse 6: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.