Migga 7
7
1Kapianarmek uvanga! Ilingavunga sorlo kinguraijoᴋ katersorêrpatta paunganik aujaᴋsiutinik, sorlo vainiksat amiakunginik ᴋenertoᴋ katersoiviub kingorngane; nerrijaksaᴋangilaᴋ; aungatannaᴋarungnaiporlo tarnima ikligijanganik.
2Idluartoᴋarungnaipoᴋ nuname, nalâgôrtoᴋarungnaiporlo inuit akorngane; ilûnatik terliarsilutik pinasuarput aungmik, nulluanut pinasuarᴋatautivut.
3Aggangit iglotut issamivut katsungaitomik idluitulijomavlutik; angajoᴋâᴋsoaᴋ ᴋenuvoᴋ, idluarsaijorlo akkilertausunguvoᴋ; inûblo erᴋanartûb tarningata katjârtanga oᴋautigivâ; taimaglo pergaiᴋatigêkput.
4Idluarnerpângat kapianartotut ipoᴋ; nalâgôrnerpâk piungiluarpoᴋ avalunit kakilautelingnit; pigârtivît uvlungat, tamadja nalipsartauvît, tikisimavoᴋ; mâna uimâladlalârput.
5Ilanâᴋ sungertûtiginiarasiuk, tatiginiarasiuk ilanârinerpârijase; ᴋanivît upkoanga upkoaruk inangaᴋatigijarnit.
6Ernerub atâtane naggogingmago, paniub anânane akkerartormago, ukkoablo sakkine; inûblo iglomioᴋatine ômigijigivait.
7Uvangale Nâlegaᴋ arlorvigijomavara; Gude piulijigijara nerriugijomavara; Gudima tusaromavânga.
8Kuviasûtiginiarnanga, ômigijiga; pâlaguma, makilârivunga; tâᴋtome iksivaguma, Nâlekab ᴋaumalârpânga.
9Nâlekab ningarninga nangmaromavara, idluitulivigilaurapko, nautsertorᴋârtinago ilinganimnik idluarsiᴋârtinangalo uvamnik; tâpsoma ᴋaumajomut anitilârpânga, uvangalo takolârpunga idluartoᴋsôninganik.
10Tamannalo ômigijima takolârpâ, uliktaulârporlo kangusungnermut, uvamnut oᴋalauᴋtoᴋ: Nâlegaᴋ Gudît naûk? Ijingma takolârpâ, mânalo tullerajârtaulârpoᴋ sorlo aᴋilupik apᴋosinerme.
11Uvlorme tâpsomane ᴋarmatit sanajaulârput, uvlorme tâpsomane perᴋojaᴋ ungasiktomut nûtaulârpoᴋ.
12Uvlorme tâpsomane ilingnut tikilârput Assiriamit Egipteniblo iglugasaksoanginit, Egiptenemillo kôksoaᴋ tikidlugo, imarbingmillo imarbingmut, ᴋaᴋaᴋsoarmillo ᴋaᴋaᴋsoarmut.
13Sullele nuna sunataᴋangitôjomârpoᴋ inungit pivlugit, piniarningitalo kinguningit pitjutigilugit.
14Inukotitit pairikit ajaupiarnut, kingormgutijavît katimgajoᴋsôningit, apsimautilutik inôjut napârtolingme Karmelib ᴋerᴋane; Basaneme Gileademelo nerrilit, sorlo itsarsoarme.
15Tatamnadlartunik takotitsomârpakka, sorlo taipsomane nunamit Egiptenemit anilaurapse.
16Inôᴋatigêksuit takolârput, pitsartunitiglo tamât kangusûtigilugit; ᴋanitik matulârpait aggangmingnut, siutingillo tusângitôjomârput.
17Kuglugiaᴋsoatut ivjomik aluktoromârput; pâmgortutitut nuname sajuklutik anijomârput pulavingmingnit; sivôravlutik tikilârput Nâlekamut Gudiptingnut, erᴋsilutiglo igvit pivlutit.
18Kina iliktut Gudeovâ, issumagijungnainiktoᴋ idluitunik, kingormgutijamelo amiakungita idluitulininginik anigoijôᴋ? Soraijuitomik ningarnine tigumianginalungilâ, nâpkiningneᴋ ᴋuviagigamiuk.
19Sanguniarivoᴋ ama ilapjugilutalo; idluinivut tukkalârpait; ajornivullo ilûnaita egilârpatit imarbiub itininganut.
20Nertornarnît unertutigilârpat Jakomut, nâpkiningnîllo Abrahamut, angerutigilauᴋtatit atâtagijaptingnut itsarsoarme.
ទើបបានជ្រើសរើសហើយ៖
Migga 7: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.