Mattêuse 25
25
Adsiujungnik uigasungnik tallimaujortunik, Talentiniglo pimaklerutaukojaujunik. Erᴋartuiviksoarmik kingorlerpâmik.
1Tamanna naliutikpat, Gûdib nâlegauvia uigasuktitut tallimaujortutitut itsomârpok, ᴋollermingnik tigusijutitut, anijutitullo, uiksak pagrearlugo.
2Tâpkoale tallimat silaitut, tallimallo silatujut.
3Silaitut ᴋollitik neksarpait, orᴋsuksamingnigle neksaratik.
4Silatojulle illulerᴋutimingne orᴋsumiglo, ᴋollermingniglo neksarput.
5Uiksarle muludlarmat, ilûnatik uerngalerput sinisilutiglo.
6Unnuarle ᴋeterarmat, nippersoakalerpok: Ahâk, uiksak ᴋaivok; anititse, pagreariartorlugo!
7Tagva uigasuit taipkoa ilûnatik makiput, ᴋollitik âᴋiklugit.
8Silaitulle oᴋarput silatojunut: Orᴋsupsingnit tunitjivigitigut; ᴋollivut ᴋamilermatta.
9Tagva silatujut kiovlutik oᴋautivait; Aukagle; amigarᴋonago uvaptingnullo ilipsingnullo. Niuvertunulle pisiniariartoritse nangminiksapsingnik.
10Pisiniariartortilugillo, uiksak tikipok: opalungairsimajullo iterᴋatigivât nerrimâᴋatiginiardlugo; upkuarlo parngnanairtauvoᴋ tâva.
11Kingorngatigut uigasuit aipangit tikinivut, oᴋarlutiglo: Nâlegak, Nâlegak upkuêrutitigut.
12Tâpsomale kiovait oᴋarlunalo: Âhamarik, oᴋaupapse, ilitaringilapse.
13Tamanna pivlugo pigâritse; uvlorlônêt stundelônêt nalogapsigik, Inûb Erningata tikitsomârvinga.
14(Imaitsomârpok:) Sorlo angutitut, nuname assianut aularomajotut, kivgaminik ᴋaiᴋojijotut, perᴋutiminiglo pimaklerᴋojijotut tâpᴋonunga.
15Ilangallo tunitjivigivâ talentinik (kênaujanik) tallimanik, aipâ maggûngnik, pingajuak atautsemik atunit pijungnartanganik, tunitjivigivait; aularsârporlo.
16Tagva tallimanik talentinik pijub, niorvgotigijartoramigit, assinginik talentinik tallimanik illavait.
17Taimâktauk talentingnik maggûngnik pijub, assîgingniktauk maggûngnik illagivak.
18Atautsemigle pijub nuna itersalijartorpâ, atanerijame kênaujanga ijerdlugo.
19Mululauᴋârdlune akunit kivgat ukkua ataningat tikipok, kiglisiniarlugillo.
20Tagva sakᴋerpok, talentinik tallimanik pijok, assinginik talentinik tallimanik neksarlune, oᴋarlunalo; Atanek, talentinik tallimanik tunitjivigilauramga; ahâk, tagga assinginik talentinik tallimanik illavakka.
21Tagva ataningata oᴋautivâ; Nâmagivagit, issumagiktotit nertornartotillo kivgak, ikitunik nertornardlutit atulauravit; pimajingortitsomavagit unuktunik: Nâlekavît ᴋuvianarninganut iterit!
22Sakᴋerivoktauk talentingnik maggûngnik pijok, oᴋarlunalo: Atanek, talentîngnik maggûngnik tunitjivigilauramga; ahâk tagga, assîgingnik maggûngnik illavakka.
23Ataningata oᴋautivâ; Nâmagivagit, issumagiktotit nertornartotillo kivgak, ikitunik nertornardlutit atulauravit; pimajingortitsomavagit unuktunik: Nâlekavît ᴋuvianarninganut iterit!
24Sakᴋerivoktauk talentemik atautsemik pijok, oᴋarlunalo: Atanek, ilitarigapkit, sivôranartotit angutausertotit; sabvijartotit karngasulaungitarnik, katersijotillo ililaungitarnik.
25Sivôragamalo, talentit nunamut ijeriartulauktara; ahâk tagga, pît piuk!
26Ataningatale kiovâ, oᴋautivlugolo: Ajortotit erᴋeasuktotillo kivgak! Ilitarigamga, sabvijartunga karngasulaungitamnik, katersijungalo ililaungitamnik;
27Tamanna pivlugo kênaujaᴋotimnik tunitjijuksaulaukpotit kênaujanik tauksêjunut, tikikumalo, perᴋutiga tigunajalauktara illaᴋartilugo.
28Tamanna pivlugo talentemik aᴋsârsiuk, tunilugolo talentinik tallimaujortunik pilingmut.
29Peᴋartok tunitjivioniarmat, peᴋaluarᴋovlugo; peᴋangitorle aᴋsârtauniarpok pinganik.
30Kivgarlo piungitok egisiuk tâᴋtoᴋsoarmut ungardlerpâmut: tagvane ᴋeavaksoadlarneᴋaromârpok aglerulârneᴋaromârlunalo.
31Inûble Erninga ânanaunermine tikikune, Engelit ajungitut tamaita illagilugit, iksivajomârpok iksivautamine ânanaunersoalingme.
32Inuᴋatigêllo ilûnamatsiatik katititaujomârput sânganut. Avitsomârpaillo, sorlo mianersijub saugaᴋotine avingmagit tuktungajunit.
33Okpertullo talerpingme tungânut pititsomârpait, okpingitulle saumingme tungânut.
34Tagva Nâlekab talerpingme tungânêtut oᴋautijomârpait: ᴋaititse, Atâtama nagliktangit, nâlegauvik kingormgutilersiuk, ilipsingnut pijarêrsimajok silaksûb pigiarninganit.
35Kâktilunga nerritilaurapsinga. Imeruktilunga imertilaurapsinga. Tujormitilunga iterᴋolaurapsinga.
36Annorairsimatilunga annorârtilaurapsinga. Kanimatilunga takojartulaurapsinga. Parngnanairsimavingmêtilunga pullâlaurapsinga.
37Tagva idluartut kioniarpât oᴋarlutiglo; Nâlegak, ᴋanga kâktilutit takolaukpitigît, nerritilaukpitigîllo? Imeruktilutillônêt, imertilaukpitigîllo?
38ᴋangalo tujormitilutit takolaukpitigît, iterᴋolaukpitigîllo? Annorairsimatilutillônêt, annorârtilaukpitigîllo?
39ᴋangalo takolaukpitigît ᴋanimatilutit, parngnanairsimavingmêtilutillônêt, pullâlaukpitigîllo?
40Nâlekablo kioniarpait oᴋautivlugillo: Âhamarik oᴋaupapse: Ukkua ᴋatangutima mikinerojut ilangat sumik pitinapsiuk, tamattominga uvanga pilaukpapsinga.
41Saumingmêtunullo oᴋarniarivok; Idluitoâlôjose, uvamnit aularitse, ikomamut ᴋamitsuitomut pijarêrsimajomut Sâtanasemut Engelinginullo.
42Kâktilunga nerritilaunginapsinga. Imeruktilunga imertilaunginapsinga.
43Tujormitilunga iterᴋolaunginapsinga. Annorairsimatilunga annorârtilaunginapsinga. ᴋanimatilungalo parngnanairsimavingmêtilunga pullâlaunginapsinga.
44Taipkoatauk kioniarivât oᴋarlutiglo: Nâlegak, ᴋanga takolaukpitigît, kâktilutit, imeruktilutillônêt, tujormitilutillônêt, annorairsimatilutillônêt, ᴋanimatilutillônêt, parngnanairsimavingmêtilutillônêt, kivgartulaungipitigîllo?
45Tagva kioniarivait oᴋarlunalo: Âhamarik oᴋaupapse: Ukkua mikinerojut ilangat sumik pitinginapsiuk, tamattominga uvanga pilaunginivapsinga.
46Tâva taipkua ânianartoksoarmut nungusuitomut pijomârput; idluartulle inônermut nâksaungitomut.
ទើបបានជ្រើសរើសហើយ៖
Mattêuse 25: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.
