Hesekiel 40
40
1Aularutijaunipta jâringita 25ingane, jârib pigiarningane, taᴋᴋiub uvlungita 10ingane, iglugasaksuit sugiartautainarningita jâringita 14ingane, uvlorme tâpsomaneluatsiaᴋ Nâlekab aggangita ᴋolangiarpânga, tamaungautivângalo.
2Takotitjutikut Gudemit pijokut tikiutivânga Israêlib nunanganut, ilivlungalo ᴋaᴋᴋamut poᴋtojomaringmut, tâpsomalo ᴋaᴋᴋaub seᴋerngane iglugasaksoangojârtut senajaulertut takovakka.
3Tagvungautingmangalo, nutte angut, ᴋaᴋorlertut tautulik, aggangminut tigumiartoᴋ noᴋaᴋserpalautimik ivaluksajarmik, suvlulingmiglo ôktutemik; nangerporlo itertarvingme.
4Angutiblo oᴋautivânga: Inûb erninga, ijîngnut takolerit, siutîngnut tusalerit, ômatillo kamatsiartiuk tamainik takotitjutigijomajamnik ilingnut, takotijomagapkit tamakkoninga tamaungautijauvotit: takojatit tamaita oᴋautigikit Israêlib ᴋitornganginut.
5Ahâglo, ᴋarmaᴋsoaᴋarpoᴋ iglub silatâne avatâne ilûnâne; angullo suvlolingmik ôktutemik tigumiartoᴋ aggangminut talertut pingasojortotut takitigijomik, taleᴋ agait silingninganik tappeᴋarpoᴋ; ᴋarmangatalo ibjuninga ôktorpâ, suvlulik atausiardlugo; poᴋtoningalo, suvlolik atausiardlugo.
6Tikiporlo tagva itertarvingmut ununga sangmijomut, majorarlunelo majutigut: ôktorpâlo itertarviub iglernaujanga, suvlolik atausiardlugo siliktigijoᴋ, tagva iglernaujaᴋ atauseᴋ suvlolik atausiardlugo siliktigivoᴋ.
7Inillo ilûnatik (tagva itertarviub udjertortingita inigijangit) atunit suvlolik atausiardlugo takitigivut, suvloliglo atausiardlugo senimutortigivut; inillo akuningit talertut telimatut, itertarviublo iglernaujanga itertarviub torᴋsukatângata seniane, iglo sângalugo, suvlolik atausiardlugo.
8Oktorpâtauᴋ itertarviub torᴋsukatânga, iglo sângalugo, suvlolik atausiardlugo.
9Ama ôktorivâ itertarviub torᴋsukatânga, talertut sitamaujortotut; iglernaujangalo, talertut maggotut, itertarviublo torᴋsukatângata iglo sângavâ.
10Itertarviublo iningit pingasôvut seniane omane, pingasullo seniane tâpsomane, tâpkoa pingasut ilûnatik adsigêktomik angineᴋarput; iglernaujangillo senerâgingne tamangne adsigêktunik angineᴋarput.
11Oktorivâtauᴋ upkoab itertarvingmêtub silingninga, talertut telimaujortotut; majorarviglo itertarvingmut, talertut 13tut.
12Inillo sivorângata seniane iksivaviᴋarput iglotut, iksivavik talertut atausertut seniane tamattomane, iksivaviglo talertut atausertut seniane tâpsomane; init nangmineᴋ atunit iglotut talertut pingasojortotut angitigivut.
13Taimaktauᴋ itertarvik ôktorivâ iniub ilangata ᴋolânit iniub aipangata ᴋolânut, talerut 25tut senimortotigivoᴋ; upkoaᴋarpoᴋ silaligêngnik.
14Napajoliorporlo, talertut 60tut poᴋtotigijomik, napajullo ilumavât itertarviub avaluliorsimaninga.
15Itertarviublo silaliub upkoanganit itertarviub torᴋsukatânganut ilulermut ilingajoᴋ, takininga talertut 50tut takitigivoᴋ.
16Inillo torᴋsukatâllo igalâᴋarput killapatâlingnik iglernaujaniglo upkoat avatâne, iglernaujaᴋarivorlo torᴋsukatât igalâllo avatâne, iglernaujallo avatâgut napârtungoaᴋarpoᴋ palmingoanik.
17Tikiutilerivângalo avaluliorsimajomut silalermut, sunaubvalo igloarsuᴋarpoᴋ, natsiteᴋarporlo ujarᴋanik senasimajunik silalerme ilûnâne; natsitelingme tâpsomane igloarsuᴋarpoᴋ 30nik.
18Natsitiliglo itertarvit senianêpoᴋ, itertarvit silingningititut siliktigivoᴋ; tamadja natsitelik alleᴋ.
19Oktorpâlo nerrotoninga itertarviub alliub sânganit avaluliorsimajub ilulerub sânganut silatâgut talertut 100tut, kitânelo taggânelo.
20Avaluliorsimajublo silalerub itertarvinga taggamut sangmijoᴋ ôktorpâ tukimullo senimullo.
21Tâpsomalo iningit pingasôvut seniane omane pingasullo seniane tâpsomane, iglernaujangillo igloarsungillo taimak angitigivut sorlo itertarvingme sivorlerme; takiningit talertut 50tut, silingningillo talertut 25tut.
22Igalângillo, igloarsungillo, napârtungoangillo palmingoat itertarviub kitânut sangmijub pingititut angitigivut; majutikullo tungmeralikut 7nik tagvunga majorarput; igloarsungillo sivorânêput.
23Avaluliorsimajorlo iluleᴋ itertarveᴋarpoᴋ itertarviub aipangata akiane, taggânelo kitânelo; itertarvingmillo itertarvingmut ôktorpâ talertut 100tut.
24Tesiorpânga tagva aunga, ahâglo, itertarveᴋarpoᴋ aunga sangmijomik; ôktorpaillo torᴋsukatângit igloarsungillo ôktûtit makkoa maliklugit.
25Tagvanelo igalâᴋarpoᴋ igloarsungita avatâne, igalâᴋtitut ipkotitunaᴋ, takiningit, talertut 50tut, silingningillo talertut 25tut.
26Majutillo tungmeraᴋarput 7nik, igloarsungillo sivorânêput; napârtungoaᴋarporlo palmingoanik, aipâ seniane tamattomane, aipangalo seniane tâpsomane iglernaujangine.
27Avaluliorsimajorlo iluleᴋ itertarveᴋarpoᴋ aunga sangmijomik; ôktorpâlo itertarvingmit itertarvingmut aunga sangmijomut talertut 100tut.
28Tikiutilerivângalo avaluliorsimajomut ilulermut itertarvikut aunga sangmijokut; ôktorpâlo itertarvik aunga sangmijoᴋ ôktûtit tâpkoa maliklugit.
29Iningillo iglernaujangillo igloarsungillo ôktûtit tâpkoa maliklugit; igalâᴋarporlo igloarsungita avatâne; talertut 50tut takitigivoᴋ, talertullo 25tut siliktigivoᴋ.
30Igloarsuᴋarporlo avatâne, talertut 25tut takitigilutik, talertullo tellimatut siliktigilutik.
31Igloarsungillo avaluliorsimajomut silalermut sangmivut; palmingoaᴋarporlo iglernaujangine; majutillo tungmeraᴋarput sitamaujortunik.
32Tikiutivângalo avaluliorsimajomut ilulermut unanêtokut; itertarviglo ôktorpâ ôktûtit makkoa maliklugit.
33Iningillo iglernaujangillo igloarsungillo ôktûtit makkoa maliklugit: igalâᴋarporlo igloarsungita avatâne; talertut 50tut takitigivoᴋ, talertullo 25tut siliktigivoᴋ.
34Igloarsungillo sangmivut avaluliorsimajomut silalermut; palmingoaᴋarporlo iglernaujangita seniane omane senianelo tâpsomane; majutillo tungmeraᴋarput sitamaujortunik.
35Tikiutivângalo itertarvingmut aunga sangmijomut; ôktorpâlo ôktûtit makkoa maliklugit;
36Iningillo iglernaujangillo igloarsungillo; igalâᴋarporlo avatâne: takininga, talertut 50tut, silingningalo talertut 25tut.
37Iglernaujangillo sangmivut avaluliorsimajomut silalermut; palmingoaᴋarporlo iglernaujangita seniane omane senianelo tâpsomane; majutingillo tungmeraᴋarput sitamaujortunik.
38Igloarsuᴋarivok ama upkoalingmik iglernaujat seningine itertarvit seninginêtune; tagvane tunergutiksat ôtaksat ergortortauvut.
39Itertarviublo torᴋsukatângata iluane sâᴋarpoᴋ maggungnik seniane tamattomane, sâglo magguk seniane tâpsomane, toᴋotsiviksanik tunergutiksanik ôtaksanik, tunergutiksaniglo ajortoêrutiksanik, tunergutiksaniglo pasijaksairutiksanik.
40Senianelo silatâne itertarviub avunga sangmijub pângata majutingine, sâᴋarpoᴋ maggungnik, ama igluane, itertarviub torᴋsukatângata seniane sâᴋarivoᴋ maggungnik.
41Sâᴋarpoᴋ sitamanik seniane tamattomane, sâᴋarporlo sitamanik seniane tâpsomane, itertarviub seniane sât sitamaujortut toᴋotsiviksat tunergutiksanik.
42Tunergutinullo ôtaksanut ilingajunik sâᴋarivoᴋ sitamanik, ujarᴋanit senamajunik, talertut abvatullo takitigivut, talertullo abvatullo senimortotigivut, talertullo atausertut poᴋtotigivut; tâpkoa ᴋânginut sakkut toᴋotsitiksat tunergutiksanik ôtaksanik ajortoêrutiksaniglo ilijauvut.
43Iglublo iluane ᴋolerutsiviᴋarpoᴋ ivertisimajunik avatâne aggait silingningititut: sâllo ᴋânginut nerᴋit tunergutiksat ilijauvut.
44Avaluliorsimajublo ilulerub silatâne igloarsuᴋarpoᴋ imgertinut avaluliorsimajome ilulerme, itertarviub avatânêtub seniane; tâpkoa aunga sangmivut; itertarviublo unanêtub senianêtoᴋ sangmivoᴋ avunga.
45Oᴋautivângalo: Igloarsuk una aunga sangmijoᴋ ajoᴋertuijunut udjertortunut piksanginik ilingavoᴋ.
46Igloarsuglo avunga sangmijoᴋ ajoᴋertuijunut tunerguserviub piksanginik udjertortunut ilingavoᴋ; tâpkoa Zâdokib kinguvârivait, tâpkoa kissimik Levib kinguvânginit najorniktuksauvut Nâlekamik, tâmna kivgartorlugo.
47Avaluliorsimajorlo ôktorpâ, talertut 100tut tukimut, talertullo 100tut senimut, iktoᴋeriktoᴋ; tunerguserviglo iglub sânganêpoᴋ.
48Tikiutilerivângalo iglub torᴋsukatânganut, torᴋsukatâblo iglernaujangit ilûnaita ôktorpait, talertut tellimatut seniane omane, talertullo tellimatut seniane tâpsomane; itertarviglo talertut pingasutut siliktigivoᴋ seniane omane, talertullo pingasutut seniane tâpsomane.
49Torᴋsukatâglo talertut 20tut takitigivoᴋ, talertullo 11tut siliktigivoᴋ; tungmeratigullo majorarvigivât: napajoᴋarporlo iglernaujane, atauseᴋ seniane tamattomane, atauserlo seniane tâpsomane.
ទើបបានជ្រើសរើសហើយ៖
Hesekiel 40: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.