Hesekiel 37
37
1Nalekab aggangit uvamnêput, âpângalo Nâlekab Anerningagut ilivlungalo naᴋsamut sauneliksoarmut;
2Kolâtigôrtipângalo avamut, ahâglo, unuktoᴋsôvut naᴋsarme nunab ᴋângane; ahâglo, panertuinaudlarput.
3Oᴋautivângalo: Inûb erninga, saunit tamakkoa ômarungnarivât? Kiovaralo: Nâlegaᴋ Nâlegaujotit igvit ᴋaujimavotit.
4Oᴋautilerivângalo: Saunit tâpkoa nelautaivigikit, oᴋautikillo: Ilipse sauniojose panertut, Nâlekab oᴋausinga tusarsiuk.
5Imâk Nâlekab Nâlegaujub saunit makkoa oᴋautivait: Anerneᴋ ilipsingnut pulatitsomârpara ômartiluselo.
6Mamertitsomârpapselo, uvineᴋartiluselo, amertârtiluselo, anernermiglo ilumeromârpapse, ômatil selo; ᴋaujijuksaulârposelo uvangaugama Nâlegaᴋ.
7Nelautaivunga tagva sorlo perᴋojaugama, nelautailertilungalo pervaludlartoᴋarpoᴋ, nunalo sajukpilukpoᴋ, saunillo katilerput, inimingnut aivlutik.
8Takosarpungalo, ahâglo, mamivalialerput, uviniktâlerlutiglo, amiublo ulikpait ᴋângitigut; kissianele anerneᴋalungilat sulle.
9Oᴋautivângalo: Anerneᴋ nelautaivigiuk, nelautailerit, inûb erninga, anernerlo oᴋautiuk: Imâk oᴋarpoᴋ Nâlegaᴋ Nâlegaujoᴋ: Anordlervingnit sittamanit ᴋaigit, anerneᴋ, ukkoalo toᴋungajut suporkit ômarᴋovlugit.
10Nelautaivunga tagva sorlo perᴋongmanga, anernerublo pulavait ômarpullo nikovilutiglo itikamingnut, katimgajoᴋsôvlutik unuktoᴋsuit.
11Oᴋautivânga tagva: Inûb erninga, saunit ukkua, tagva Israêlib ᴋitorngangit ilûnaita: ahâk, oᴋarput, saunivut panerput, neriungnivullo assiomavoᴋ; kipijaumarikpogut.
12Tamanna pivlugo nelautailerit, oᴋautilugillo: Imâk oᴋarpoᴋ Nâlegaᴋ Nâlegaujoᴋ: Ahâk, iluvise angmaromârpakka, anititsomârpapselo iluvipsingnit, inuᴋotikka; tikiutijomârpapselo Israêlib nunanganut.
13Kaujijuksaulârposelo uvangaugama Nâlegaᴋ, iluvise angmarupkit, anitikupselo iluvipsingnit, ilipse inuᴋotikka.
14Anerneralo pititsomârpara ilipsingnut, ômaromârposelo, pititsomârpapselo nunaᴋotipsingnut: ᴋaujijomârposelo uvanga Nâlegaᴋ tamanna oᴋautigigapko piniarapkolo, oᴋarpoᴋ Nâlegaᴋ.
15Nâlekab oᴋausingata tikipânga ama, oᴋarlune:
16Igvillo, inûb erninga, ajaupiamik atautsimik tigusilerit, aglagvigilugolo: Judab pinga, Israêliblo ᴋitorngangita tâpsoma ilagijangita pingat, ajaupiamiglo tâpsoma assianik tigusigit aglagvigilugolo: Josefib pinga, Efraimib ajaupianga, Israêliblo ᴋitorngangita ilûnatik tapsoma ilagijangita pingat:
17Pivlutillo katitikik aipâ aipanganut atausioᴋovlugik, aggangne atausingorᴋovlugik.
18Inôᴋativillo ᴋitorngangita aperikpatit, oᴋarlutik: Nelonailivigijomangilaptigût ᴋanoᴋ ukkua tukkeᴋarmangângnîk?
19Oᴋautikit: Imâk oᴋarpoᴋ Nâlegaᴋ Nâlegaujoᴋ: Ahâk, Josefib ajaupianga, Efraimib agganginêtoᴋ, Israêliblo kinguvârêngita tâpsoma ilagijangita pingat, tigujomavara, katititsomârparalo tâpsomunga, Judab ajaupianganut, atausingortilugiglo, atausiojomârpuglo aggamne.
20Ajaupiâglo aglagvigijâkik aggangnêtsomârpuk tâpkoa ijingita sângine.
21Oᴋautikillo: Imâk oᴋarpoᴋ Nâlegaᴋ Nâlegajuoᴋ: Ahâk, Israêlib ᴋitorngangit tigujomârpakka inôᴋatigêksuit aivigijangita akornganit, avamillo katersoromarpakka, tikiutilugillo nunamingnut;
22Inôᴋatigêksoangortitsomârpakkalo atausiojut nuname, Israêlib ᴋaᴋᴋangine; atanerlo atauseᴋ ataniojomârpoᴋ tâpkonunga tamainut; kingornganelo inôᴋatigêksoangojungnairomârput magguinik, avitauniatsangilallo ataniovingnut maggungnut:
23Ivsornartitsomângilallo nangminermingnik kingorngane gudingoaᴋotimingnut, piniarnernullônêt maᴋojungnartunut, tapanerijamiglônêt nelianut; piulijomârpakkale inigijanginit tamainit idluitulivigilauᴋtanginit, ivsornaititsomârpakkalo: taimaglo inuᴋutaujomârput uvamnut, Gudeojomârpungalo tâpkonunga.
24Kivgaralo Davide ataniojomârpoᴋ tâpkonunga, tâpkoalo ilûnatik mianerijetuaᴋaromârput; arvertaromârpullo idluarijamne, perᴋojakkalo kamagilugit piniarlugillo.
25Nunaᴋaromârpullo nuname tunilauᴋtamne kivgamnut Jâkomut, atâtapse nunagilauᴋtangane; nunagilârpâllo tâpkoa, ᴋitorngangitalo, erngutangitalo, issoᴋangitomut; kivgaralo Davide angajoᴋârilârpât issoᴋangitomut.
26Uvangalo angeᴋatigijomârpakka ulapirᴋsauteᴋaᴋatigêngnermik: angeᴋatigêngneolârpoᴋ soraijuitoᴋ: ineᴋartitsomârpakkalo unuksitilugillo, ivsornaitoviᴋotigalo tâpkonanêtsainartitsomârpara soraijuitomik.
27Ineᴋarvigalo tâpkonanêtsomârivoᴋ; Gudigijomârpângalo, tâpkoalo inuᴋotigijomârpakka.
28Inôᴋatigêksuillo ᴋaujijomârput uvanga Nâlegaujunga ivsornaititsigama Israêlemik, ivsornaitoviᴋotiga sorairane tâpkonanêkpat.
ទើបបានជ្រើសរើសហើយ៖
Hesekiel 37: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.