Hesekiel 24
24
1Nalekablo oᴋausingata tikipânga jârit 9ingata taᴋᴋingata 10ingata uvlungita 10ingane, oᴋarlune:
2Inûb erninga, aglagit uvlub tamattoma attinganik, uvlorme tamattomaneluatsiaᴋ Babilonib ataninga tikingmat Jerusalemib ᴋanitanganut.
3Kitorngarêllo tapatojut oᴋarvigikit adsiujomik, oᴋautikillo: Imâk oᴋarpoᴋ Nâlegaᴋ Nâlegaujoᴋ: Ukkusik iliuk, iliuk imerlugolo:
4Iggâksat avgorkit, iggâksat annernarnerpât ilûnaita, mimit talillo; tataguk saunernik annernarnerpaujunik.
5Saukat katimgajut pionerpânganik tigusigit, sauningillo ᴋalerêktikit tâpsomunga; ᴋallatsiarlit; ila, sauningit ᴋallatsiarlit iluane.
6Tamanna pivlugo imâk oᴋarpoᴋ Nâlegaᴋ Nâlegaujoᴋ: Kappê iglugasaksuit auliksuit, ukkusiojut ᴋapotalik, pêjaiviongitoᴋ ᴋapominik! Aviksimajut (ukkusiub ilulingit) nelleᴋârtuinarlutik pêrkit, ânanauniarnagit.
7Aunga iluanêngmat; ᴋairtotuinarmut kovilauᴋpâ, ivjomut kovilaungilâ sanningnut saujaujungnarᴋovlugo;
8Kaningaumajârneᴋ ᴋagvertitsomavlugo akkiniarutigijomavlugo, aunga kovijautilauᴋpara ᴋairtotuinarmut, saujauᴋonago.
9Taimaimat imâk oᴋarpoᴋ Nâlegaᴋ Nâlegaujoᴋ: Kappianarmêk iglugasaksuit auliksuit! ᴋejuksat ᴋalerêt angijorortitsomavakka.
10Angijomik ᴋejugiaruk, ikoma ikoâlatsiarle, nerᴋejaᴋ igamatsiarᴋovlugo, ᴋajoᴋ kinertangorᴋovlugo, saunillo ôtauᴋovlugit.
11Imaᴋartinagolo aumanut iliuk, ônadlarᴋovlugo, ᴋaᴋorlingalo aumalerᴋovlugo, salumaininga pêrᴋovlugo iluane, mangertorningalo nungutauᴋovlugo.
12Suliaᴋarnermut merngortomarikpoᴋ, mangertorniâluale pêngilaᴋ tâpsomangat; mangertorninga pêjartaulungilaᴋ ikomamut.
13Ivsornarnît kangunartulinermik ilaᴋarpoᴋ; epᴋêjalauraloarapkit epᴋêjartaujomanginavillo epᴋêjartaujungnailârpotit salumainernit kingorngane, nâmaksititsiᴋârtinanga ningaumajârnimnik ilingnik.
14Uvanga Nâlegaujunga tamanna oᴋautigivara, nelautsilârpoᴋ piniaromârparalo; uteromangilanga, anajagosugomanangalo, ᴋaᴋᴋialeromangilangalônêt; apᴋutigijatit piniarnerijatillo maliklugit erᴋartoromârpâtit, oᴋarpoᴋ Nâlegaᴋ Nâlegaujoᴋ.
15Nâlekablo oᴋausingata tikipânga, oᴋarlune:
16Inûb erninga, ahâk, ijikpit ᴋuviagijanga pêjaromavara ilingnit tagvainârtomik; igville ogguartuksaungilatit ᴋeajuksaungilatillônêt, ᴋugvitillônêt ᴋorlortuksaungilat.
17Annersaumigit, tusaksaungitomigle; toᴋungajoᴋ ogguarutiginiarnago, niaᴋôserille kamiklutillo, ᴋangasinâkiglo mattoniarnagik, inuillo kiksartut nerrivaktanganik nerriniarnak.
18Uvlâkut tagva inuit oᴋaᴋatigivakka; unnukullo nuliara toᴋovoᴋ; uvlângormallo piniarpunga sorlo perᴋojaugama.
19Inuillo aperivânga: Oᴋautitsomangilaptigût taimailiornitit suksaumangâta uvaptingnût?
20Oᴋautivakka tagva: Nâlekab oᴋausingata tikipânga, oᴋarlune:
21Israêlib ᴋitorngangit oᴋautikit: Imâk oᴋarpoᴋ Nâlegaᴋ Nâlegaujoᴋ: Ivsornaitoviᴋotiga, pitsartunipse inornautâ, ijipse ᴋuviagijangat, tarnipse kajungervigijangat ivsornaijungnaititsomavara; erniselo paniselo ᴋemaktase oggotitaujomârput saviksoarmut.
22Pinialârposelo sorlo uvanga piniarama, ᴋangasinâse mattolulângilase, inuillo kiksartut nerrivaktangit nerrilulângilase.
23Niaᴋôsersimalârposelo kamiksimalârluselo; oggualulângilase ᴋeanaselônêt; kipilârposele idluinipsingne, ârusuᴋatigêlârluselo.
24Taimaglo Hesekiele nelunaikutaulârpoᴋ ilipsingnut; sorlo tâmna piniarmat taimailiolârpose: tamannalo neliutikpat, tagva ᴋaujilârpose uvangaugama Nâlegaᴋ Nâlegaujoᴋ.
25Igvillo, inûb erninga, uvlorme tâpsomane pitsartuneᴋarvingat, pinnarnarijangita inornautâ, ijingita ᴋuviagijangat, tarningitalo kajungervigijangat, erningillo paningillo, tâpkonangat tigugupkit,
26Uvlorme tâpsomane anigoijoᴋ ilingnôromangilâᴋ tusartitsomavlutit tamattominga siutingnût?
27Uvlorme tâpsomane ᴋannît angmaromârpoᴋ tâpsomunga anigoijomut, oᴋartuksaulârpotillo nipangerungnailutillo; taimaglo nelunaikutaujomârpotit tâpkonunga; ᴋaujilârpullo uvangaugama Nâlegaᴋ.
ទើបបានជ្រើសរើសហើយ៖
Hesekiel 24: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.