Daniel 3
3
1Atanik Nebukadnezar inungoaliorpoᴋ goldimit, talertut 60tut poᴋtotigijomik, talitullo 6tut siliktigijomik: napartipâlo Durab naᴋsangani Babilonib nunangani.
2Ataniublo Nebukadnezarib tilikliluni katimaᴋovait atanirusit, angajoᴋâᴋsuillo, aulatsijullo, idluarsaijullo, kênaujaniglo kamajut, atanituijullo, piᴋojaniglo ilisimajut, tamaitalo nunami pitsartujut, tikiᴋovlugit inungoab ataniub Nebukadnezarib napartitangata attijauvianut.
3Tagva atanirusit, angajoᴋâᴋsuillo, aulatsijullo, idluarsaijullo, kênaujaniglo kamajut, atanertuijullo, piᴋojaniglo ilisimajut, tamaitalo nunami pitsartujut katimavut inungoab ataniub Nebukadnezarib napartitangata attijauvianut; nangipullo inungoab Nebukadnezarib napartitangata sângani.
4Oᴋâlajorlo nippiᴋortovluni nipliavoᴋ: Oᴋoksi ilipsi inôᴋatigêngojosi nunaᴋatigêngojosilo oᴋausiᴋatigêngojosilo.
5Tusatuarupsi tiptulautit nipjautillo harfillo ᴋilularaillo noᴋaᴋsiralillo ᴋaningmigautillo nipliajûllo sunatuinait nipinginik, pâmaktituksauvosi inungoarlo goldiojoᴋ ataniub Nebukadnezarib napartitanga opigilugo;
6Pâmaktingitorlo opigosulungtoᴋ tagvainaᴋ igitaujuksauvoᴋ kiaksautiâlub ikomaliksûb ᴋiᴋânut.
7Taimaimat naliutomi tâpsomani inôᴋatigêt ilûnatik tusarvingini tiptulautit nipjautillo harfillo ᴋilularaillo noᴋaᴋsiralillo ᴋaningmigautillo nipliajûllo sunatuinait nipinginik, inôᴋatigêt ilûnatik nunaᴋatigêllo oᴋausiᴋatigêllo pâmaktiput inungoarlo goldiojoᴋ ataniub Nebukadnezarib napartitanga opigilugo.
8Naliutomili tâpsomani Kaldêarit ilangit ᴋaivut, Judillo pasilugit.
9Pigiarlutiglo oᴋarpoᴋ atanimut Nebukadnezaremut: Ataniᴋ, issoᴋangitomut inôtsainalaurit.
10Igvit, ataniᴋ, piᴋojaᴋartitsivotit inuit ilûnatik tusartut tiptulautit nipjautillo harfillo ᴋilularaillo noᴋaᴋsiralillo ᴋaningmigautillo nipliajûllo sunatuinait nipinginik pâmaktilutiglo opigijaksaringmatsuk inungoaᴋ goldiojoᴋ:
11Pâmaktilungitorlo opigosulungitoᴋ igitaksaungmat kiaksauteâlub ikomaliksûb ᴋiânut.
12Angutit, Judit ilangit, aulatsijungortitatit Babilonib nunangata piksanginik, Sâdraki, Mîsakilo, Abednigolo, angutit tâpkoa kamagingilâtit, ataniᴋ; kivgartulungilait gudingoat, inungoarlo goldiojoᴋ napartitat opigingilât.
13Tagva Nebukadnezarib ningadlarnimini ilungitudlarniminilo, Sâdraki, Mîsakilo, Abednigolo ᴋaitauᴋovait. Angutillo tâpkoa âtauvut ataniub sânganut.
14Nebukadnezariblo kiovluni oᴋautivait: Pijârillusi, Sâdraki, Mîsakilo, Abednigolo, kivgartortailipisiûk gudingoara, opigitaililugolo inungoaᴋ goldiojoᴋ napartitarâ?
15Takuitsi, atuinaugupsi ᴋangaugaloarpat tusartuarupsi tiptulautit nipjautillo harfillo ᴋilularaillo noᴋaᴋsiralillo ᴋaningmigautillo nipliajûllo sunatuinait nipinginik pâmaktiromavlusi opigilugolo inungoaliarimajara, nâmakpoᴋ; opigosulungikupsili, tagva tagvainaᴋ igitaujuksauvosi kiaksautiâlub ikomaliksûb ᴋiᴋânut; kinauvâlo Gudeojoᴋ piulijungnartisi aggamnit?
16Sâdrakib, Mîsakiblo Abednigoblo kiovlutik ataniᴋ oᴋautivât: Nebukadnezari, ilirasulungilagut akkiorlutit tamattomani.
17Taimaigiaᴋarpat, Gudivut kivgartortavut sapilungilaᴋ piuliluta kiaksautiâlungmit ikomaliksoarmit; piulijomavâtigullo aggangnit, ataniᴋ.
18Pingikaloarpallônêt, tagva ᴋaujijuksauvotit, ataniᴋ, gudingoatit kivgartoromanginaptigik, inungoarlônêt goldiojoᴋ napartitat opigijomanginaptigo.
19Tâva Nebukadnezar ilumitauvoᴋ ningadlarnimik, kênangatalo tautua ablatsangolipoᴋ Sâdrakimut, Mîsakimullo, Abednigomullo; taimaimallo oᴋarluni piᴋojivoᴋ kiaksauteâluk 7ertorlugo ônarnisautitaksaringmatsuk ilusirivaktanganit.
20Angutillo ilangit sangijôdlartut sorᴋsuktuksarsoaᴋotiminêtut piᴋovait ᴋilaksuiᴋovlugit Sâdrakimik, Mîsakimiglo, Abednigomiglo, igilugillo kiaksauteâlungmut ikomaliksoarmut.
21Tâva angutit tâpkoa ᴋilaksortauvut, ᴋarlilijarlutik, ikialijarlutiglo, ulilijarlutiglo, tâpkoalo assinginik annorâlijarlutik, igitauvullo kiaksauteâlub ikomaliksûb ᴋiᴋânut.
22Ataniublo piᴋojanga atangusidlarmat, kiaksauteâluglo ônarpâdlarmat, ikomab ikoalaningata toᴋopait egitsijut Sâdrakimiglo Mîsakimiglo, Abednigomiglo.
23Angutillo tâpkoa pingasut, Sâdraki, Mîsaki, Abednigolo ᴋilaksorsimavlutik katakput kiaksauteâlub ikomaliksûb ᴋiᴋânut.
24Atanilo Nebukadnezar kakilâdlarpoᴋ, nikovisâdlarlunilo, niplilunilo atanituijiminut oᴋarpoᴋ: Angutinik pingasunik igitsilaungilagût ikomab ᴋiᴋânût? Tâpkoa kiovut oᴋarlutiglo atanimut: Nalautsivoᴋ, ataniᴋ.
25Tâmna kiovoᴋ oᴋarlunilo: Ahâk, angutinik sitamanik ᴋilaksorsimanatik pisuktunik takovunga ikomab ᴋiᴋâni, ôtaunatiglo, sitamangallo tautuᴋarpoᴋ gudit iningatut.
26Nebukadnezarilo aivoᴋ kiaksauteâlub ikomaliksûb pânganut: niplilunilo oᴋarpoᴋ: Sâdrak, Mîsak, Abednigolo kivgaujosi Gudemut ᴋotsingnipaujomut, anititsi tamaungarlusilo. Sâdrakilo, Mîsakilo, Abednigolo anivut ikomab iluanit.
27Atanirusit, angajoᴋâᴋsuillo, aulatsijullo, ataniublo atanituijingit, katimajut tagvani, takovut angutinik tâpkoninga, ikomallo pitsartuniᴋangimat timinginut, nujallo niᴋunginêtut ôlikâlungimatta, annorângillo soᴋosingimatta, ikisungnilungimattalônêt.
28Nebukadnezarilo niplipoᴋ oᴋarlunilo: Nakorijauli Sâdrakib, Mîsakiblo, Abednigoblo Gûdingat, ingiliminik tiliklitoᴋ piulilugillo kivgani tatigijini tapajullo ataniub piᴋojanganik, timimingniglo tunitjijomangitut Gûdimik assia kivgartoromavlugo opigijomavlugolo.
29Tamanna pivlugo piᴋojivunga imaitomik, inôᴋatigêt, nunaᴋatigêlônêt, oᴋausiᴋatigêllônêt nallit oᴋarnilutjijut Sâdrakib, Mîsakiblo, Abednigoblo Gudinganik avgortaulârput, iglungillo atsiviksangortitaulârput: tâpsoma assianik gudiᴋangimat taimak piuliklirungnartomik.
30Ataniublo Sâdraki, Mîsakilo, Abednigolo pilluangotipait Babilonib nunangani.
ទើបបានជ្រើសរើសហើយ៖
Daniel 3: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.