Daniel 10
10
1Koresib, Persiamiut ataningata, jâringita pingajuani oᴋausiᴋ nalonaijartauvoᴋ Danielimut, Beltesasarimik atsirataujomut; oᴋausilo miksiᴋârtôvoᴋ, tamadja sorᴋsungnisoarmik; tâpsomalo oᴋausiᴋ tukkisilugo takotitjut ipaksigivâ.
2Naliutomi tâpsomani uvanga Danieli kiksatsainarpunga vôgit pingasut nâvlugit.
3Iklingnartomik nirringilanga, niᴋêjamiglo vainimiglo oᴋomisilungilanga, mingoarlungilangalônêt uvamnik, vôgit pingasumarît nâᴋârtinagit.
4Takᴋiublo sivorlerpâb uvlungita 24ingani kôb Hidikilib sinânêtilunga,
5Arlorpunga takosarlungalo, ahâglo, angut miᴋoᴋangitomik ᴋaᴋortamik annorâlik, makitimigullo tapsirutilik goldiojomik Ufazemit pijomik;
6Timinga ujarᴋatut Tarsisemit pijotun-ipoᴋ, kênangalo ᴋaumalaᴋtut, ijîgik sorlo ᴋollîk ikomajûk, talîgiglo itigangillo tautuᴋarput ᴋaᴋorlitut ᴋibliriᴋsârtaumajotut, oᴋâlaningatalo nippiᴋortoninga sorlo inugiartoᴋsuit nippingat.
7Uvangalo Danieli kissima takotitjutit takovakka; angutit ilagijama takungilait takotitjutit; iᴋsiniruble angijûb tupvigivait, ᴋimâvullo ijiriatorlutik.
8Inutôvlunga ᴋimaktauvunga tagva, takotitjullo tamanna angijoᴋ takovara, nukingêrutivungalo; nukiᴋarnira assirotaumarikpoᴋ, pitsartuniᴋarungnaipungalo.
9Oᴋâlaningalo tusarpara, tusarapkolo oᴋâlaninga pâmâkivunga, siningmullo itijomut tikitaugama, kênara nunamut pûlugo sinikpunga.
10Ahâglo, aggait aktorpânga, pallungatilungalo sêrᴋumnut aggangmalo itimanginut.
11Oᴋautivângalo: Danieli, idligijaudlartotit, oᴋautsit oᴋausirijakka ilingnut kamagitsiarkit, nikovilutillo; ilingnut tilijaugama mâna; taimaglo oᴋautingmanga nikovipunga, sajuklungali.
12Oᴋautivânga tagva: Erᴋsiniarnak, Danieli, uvlormit sivorlipâmit ômatit kamatsiartilaurangni, manigôtilauravillo Gudivît sângani, oᴋautsitit tusartauvut; tikipungalo oᴋautsitit pivlugit.
13Persiable ataniovingata angajoᴋâᴋsoangata akkiratorpânga uvlut 21 nâvlugit; sunaubvali Migailib, angajoᴋaunirojut ilangata ikajoriartorpânga: uvangalo Persiab ataninginêtualauᴋpunga.
14Tikipungali mâna ajoᴋitoromavlutit naliutijomârtunik inuᴋotingnut uvluni kingorliojuni: takotitjut uvlut unuktut ᴋângipatta kissiani nalaulârpoᴋ.
15Oᴋautsillo tamakkoa oᴋausiringmagit uvamnut, okungavunga niplinangalo.
16Ahâglo, inûb, ᴋitorngangatut adsiᴋartûb ᴋangasinâka aktorpâk; ᴋanira aitarpara tagva, okarlungalo oᴋautivara sâmni nangitoᴋ: Nâlegara, takotitjut tamanna pitjutigillugo, kiksautigijakka utiput uvamnut, nukiᴋarungnaipungalo.
17Kanorlo nâlikama kivganga una oᴋarungnarᴋâ nâlikamnut omungâ? Uvangali, tagvainaᴋ nukingêrutivunga, anirsâlungalônêt ajulerpunga.
18Amalo inuktut adsiᴋartûb aktorivânga, tâpsomalo pitsartutipânga.
19Oᴋarporlo: Angut idligijaudlartotit, iᴋsiniarnak; ulapirᴋsautiᴋarit, sôngosilerit, ilâ, sôngosilirit. Oᴋarvigingmangalo pitsartutitauvunga, oᴋarpungalo: Nâlegara oᴋâlagit; pitsartutigamga.
20Tagva oᴋarpoᴋ: Kaujimavêt tikitjutigijamnik ilingnût? Mâna utiromavunga Persiab angajoᴋâᴋsoanga sorᴋsugvigijomavlugo; aularumalo, ahâk, Griggit angajoᴋâᴋsoanga tikilârpoᴋ.
21Oᴋautitsomavagilli miksiᴋârtub aglangini aglaᴋsimajunik: ipkonungali ikajortaungilanga, angajoᴋâᴋsoapsi Migailib kissimi ikajorpânga.
ទើបបានជ្រើសរើសហើយ៖
Daniel 10: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.