Isr. 3
3
Jesuska Muisaisja̱i̱ naṉkamantuiti
1Tuma asamtai tunaarincha yatsuru, atumniasha Niniu atí tusa Yus achirmákuitrume. Tuma asarum Kristu Jesus péṉker enentáimtustarum. Nisha Yus nekas Akatrámuyayi. Tura ashí Yus shuar ajasárua nuja̱i̱ Yúsnan pujurniu uuntri̱a núnisaiti. 2Nu atí tusa Yus anaikiamiayi. Túramtai Kristu nuna tí peṉker takasuiti. Núnisaṉ Muisais ashí Yusa aentsri̱n Israer shuar armia nuna ti shiir wainkiamiayi. 3Túrasha Muisaisja̱i̱ naṉkaamas Kristu ti shiir awajnásuiti. Je̱a̱ja̱i̱ naṉkaamas je̱a̱ je̱a̱mniuka nekas péṉkerchakait. Núnisaṉ Kristu Muisaisja̱i̱ naṉkaamas péṉkeraiti. 4Kame ashí je̱a̱n shuar je̱a̱mtsuk. Tura Yus ashí írunna nuna najanaiti. 5Wats Muisais Israer shuaran wáiniuk Yusa Je̱e̱n takastinia áintsaṉ péṉker takarniuyayi. Tura ni takaak ukunam Yus títiatna nuna etserkatniuyayi. 6Túrasha Kristu Yusa Je̱e̱n takarniuchu asa antsu Yusa Uchirí̱ asa nui̱ ashí akupeawai. Nu je̱a̱sha iitji. Tura tuke iniaitsuk kakaram ajasár Yus suramsattaj nu wararsar nákastiniaitji.
Kristu shuari̱ shiir pujustin
7Nu asamtai Yusa Shiir Wakaní̱ Yus Papinium tawai
“Yamaikia Yus tana nu ántakrumka
8 nakittsuk shiir anturkatarum.
Israer shuar yaunchu aents atsamunam wekainiak Yus táman nakitrar Yusan nekapsar akajkarmiayi.
9 Túramtai Yus chichaak ‘Nui̱ atumí uuntri̱ nekaprusar akajtukarmiayi.’
Kuaraintia uwitin wi kakaram túramun íisarsha nakitrurarmiayi.
10 Tuma ásarmatai nu shuaran kajerkan tiármajai ‘Nu shuar ni enentái̱n tuke awajiniawai.
Tura Wi táman umirkatniun nakitiáiniawai’ tímiajai.
11 Tura kajerkaran nekas tákun
‘Wiji̱a̱i̱ shiir pujustinian peṉké tsaṉkatkachartatjai’ tímiajai” YKan. 95:7-11 tímiayi Yus.
12Anearta, yatsuru. Yajauch enentáimsarum tuke iwiaaku Yus enentáimtutsuk kanakiirap. 13Kame kashinkia yajauch túramuja̱i̱ anaṉnam enentáimin Yusna nakitrashtapash. Tuma asamtai yamaik tura ashí tsawant ikiakánairtarum. 14Yámankamtaik Kristu shiir enentáimtusmaj núnisrik tuke iniaitsuk émeteakrikia Krístuja̱i̱ shiir tsaniṉkiar pujustatji. 15Nu asamtai Yus Papí tawai
“Yamaikia Yus tana nu ántakrumka nakittsuk shiir anturkatarum.
Israer shuar yaunchu Yus táman nakitrarua núnisrum ajasáirap.” YKan. 95:7-8 16Muisais Ejiptunmaya̱ ji̱i̱kmia nú shuar Yusa Chichame̱n anturkariat nakitrarmiayi. 17Tura umiiniachkui kuaraintia uwí kajerkarmiayi. Tunaan túrawaru ásar untsurí shuar aents atsamunam kajinkiarmiayi. 18Kame umirkacharunka Yus “Wiji̱a̱i̱ shiir pujustinian peṉké tsaṉkatkachartatjai” tímiayi. 19Iis, Yusan enentáimtachu ásar Niji̱a̱i̱ shiir pujustinnium waya̱tniun tujintkiarmiayi.
ទើបបានជ្រើសរើសហើយ៖
Isr. 3: jiv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2009 Avant Ministries in cooperation with Wycliffe Bible Translators, Inc. All rights reserved.