Isr. 2
2
Anearta. Uwempratin chicham nakitraip
1Nuikia Kristu ti uunt asamtai ashí Niniu antukajnia nuja̱i̱ kanakchatin ti enentáimtustiniaitji. 2Yaunchu nayaimpinmaya̱ suntar Muisaisan súsarmia nú akupkámu nekas uminkiatniuyayi. Shuar umitsuk yajauchin túramtai ti kakaram asutniáwarmiayi. 3Antsu ii Uuntri̱ Krístuka uwempratin chichaman emka itiamiayi. Tura imiá nekas tuíniak Nin anturkaru iin ujatmákarmaji. Tuma asamtai uwempratin chicham nakitiakrikia nuna naṉkaamas uwemtsuk asutniáttaji. 4Kame nu arantcha uwempratin chichaman ujatmainiakrin imiá nekas tuíniawai tusa aentsti túrachminian kakarman Yus iniakmasmiayi. Núnisaṉ ni Shiir Wakaní̱ ni wakerana núnisaṉ niisháa niisháa kakarmaja̱i̱ takamtikiawai. Nuja̱i̱ Yus Chichama nu paant nekanamniaiti.
Jesukrístu aents ajasma
5Ayu. Nuṉka átatna nu áujmatjinia nui̱ Yus nayaimpinmaya̱ suntaran akupkatniun tsaṉkatkachuiti. 6Antsu yaaksha ujakma Yus Papinium jú̱nis áarmaiti
“¿Aentsti Ame imiá enentáimtutai̱ átincha warimpiaitiajⁱ?
Kame aentsu uchirí̱sha ¿warí asamtai pujursataj tamea?
7 Warí aentstinkia nayaimpinmaya̱ suntarja̱i̱ imianchachⁱ awajsámiame.
Túrayatam winchari̱ tura arantútairi̱ susamam nuja̱i̱ páantin awajsaitme.
8 Tura ashí umirkarti tusam sukartusuitme.” YKan. 8:4-6
Yus “ashí nin umirkarti” takui̱ nin umirkashtinkia atsawai. Túrasha yamaikia ashí umirainiaka wáintsuji. 9Tura wáinjinia nu Krístuiti. Nisha aents ajas ishichik tsawant nayaimpinmaya̱ suntarja̱i̱ péejchach ajasmiayi. Yus ashí shuaran ti aneak jarukarti tusa wakerimiayi. Tura ni wáitias jakamuja̱i̱ yamaikia ti shiir naṉkaamas Uunt awajsamuiti.
10Ashí írunna nu Yus najankamu ásar ni wakeramun umiktin áiniawai. Kame Yus ashí ni uchirí̱sha ni shíirmari̱n pachinkiarat tusa wakerawai. Tuma asa Yuska Jesukrístun, nú shuaran Uwemtiknia asa, ni wáitsamuja̱i̱ nekas tí peṉker Uwemtikkiartin awajsámiayi. 11Yusna atí tusa shiir awajsámuncha tura Kristu nin shiir awajea nunasha Yuska mái̱ metek ni Aparí̱nti. Nu asamtai Yusa Uchirí̱ nú shuaran “yatsur” títinian natsantatsui. 12Yus Papinium núnisaṉ tawai
“Ame náarmin winia yatsurun ujakártatjai.
Ashí iruntramunam kantampruáttajme.” YKan. 22:22 13Ataksha ni shuari̱ji̱a̱i̱ métek enentáimtamun tawai
“Yusan ti shiir enentáimtustatjai.” YKan. 91:2; Isa. 12:2
Tura ataksha
“Yus surusmia nú uchirja̱i̱ Yusan umirkun pujajai” Isa. 8:18 tawai.
14Tura nu uchi aents ásarmatai núnisaṉ Jesussha aents ajasmiayi. Tura aents ajas jaka iwianchin jatai̱ nérenniuri̱n ashí emesramiayi. 15Tura ti untsurí shuaran uwemtikrarmiayi. Nu shuar yaunchu jákatniun ashamainiak tuke wáitin ármiayi. Antsu ni jakamuja̱i̱ yamái aṉkant áiniawai. 16Maa, imiá nekasaiti, nayaimpinmaya̱ suntaran yáiṉtaj tusa táchamiayi. Antsu ashí Aprajám wean ashí Yus shuar ainia nuna yáiṉtajtsa támiayi. 17Túratin asa peṉké métek ni yáchi̱ya áinis ajasmiayi. Nuja̱i̱ iin tuke waitnentrampramniaitji. Tuma asa Yúsnan pujurniu uuntri̱ ajas Yusan tuke péṉker chichartamsamniaitji. Núnisaṉ murikiun maa Yus súsatniua áintsaṉ ni jakamuja̱i̱ ashí shuara tunaari̱n tsaṉkurniuiti. 18Tura imia niṉki waitsa asa tura íwianch nekapsamu asa yamaikia iisha wáitiakrincha tura íwianch nekapramkurnisha yaintmakminiaitji.
ទើបបានជ្រើសរើសហើយ៖
Isr. 2: jiv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2009 Avant Ministries in cooperation with Wycliffe Bible Translators, Inc. All rights reserved.