Isr. 12
12
Jesus tuke enentáimtusar tsékeṉtiai
1Ashí ju̱ nuṉkanam túrajnia nuka shuar nakuruiniak tsékena nuja̱i̱ nakumkamniaiti. Ashí shuar yaunchu Yusan shiir enentáimtusaruka téntakar íirmainiaji. Tuma asamtai ashí kijin ana nusha tura ashí yajauch túramu itit awajtamaj nusha ajapa iniaisar tura katsuntrar tsékeṉkir jeatái. 2Túmakur Jesus tuke enentáimtusar tsékeṉtiai. Ashí shuarja̱i̱ naṉkaamas Jesus Yusan ti nekas enentáimtak aya péṉkernak túramiayi. Tuke nekas awakmakmiayi. Imiá yajauch shuar krúsnum mátin ai̱ṉ natsanmainium jákatniuncha surimiakchamiayi. Antsu ukunam ti shiir warastin átatna nuna enentáimtak nuna ashí katsuntramiayi tura nuyá̱ Yusa untsuurí̱ni̱ akupin pujutai̱nium pujusuiti.
3Yajauch shuar Jesusan wáitkiasarmia nu enentáimpratarum. Túrarum pimpitsuk katsuntratarum. 4Átumka yajauch túramuja̱i̱ mániakrumsha Jesus túramia áintsarum numpe̱msha puárchaitrume tura jákachuitrume. Nui̱sha katsuntrarum jeatniuitrume. 5-6Yus nekas ni uchirí̱n chicharkatniua áinis túramprum nu kajinmatkichmashuram. Jú̱nis tawai
“Uchiru, wi jintintramajmena nu kajinmátkip.
Asutiámkuisha kúntuts pujusaip.
Kame Uuntka Ni aneana nuna jintintiawai.
Tura ni uchirí̱ ajasat tusa achíana nuna asutiawai.” Neka. 3:11-12
7Tuma asamtai Yus ni uchirí̱a ánis chichartamkuisha katsuntratarum. Warí ashí apa ni uchirí̱n chicharkashtatuak. 8Tura ashí uchin chicharkatniua núnis Yus atumín chichartamchakrumni̱ṉkia nekas ni uchirí̱nchuitrume. Antsu chikichnaitrume. 9Nu arantcha ii aparí̱ uchich árini̱ṉ chichartamkurin umirniuyaji. Nu arant nuikia nekas ii Aparí̱ nayaimpiniam pujana nu shiir umirkar tuke shiir pujustin wakerishtatjik. 10Ii aparí̱ ishichik ni enentái̱ji̱a̱i̱ wakeramun chichartamniuyaji. Antsu Yuska tí peṉker awajtámsataj tusa nekas atsumajnia nuja̱i̱ métek chichartamji. 11Kame nekasaiti, ashí chicharnamu yamaikikia waraschamniaiti aya kúntuts enentáimtikramji. Tura jintintiakur chicharnákmaja̱i̱ ukunam péṉker pujutnum unuitiamji.
Yus tana nu nekas antuktiniaitme. Anearta
12Nuja̱i̱ pimpirárusha tura kakarmachu ainia nusha ikiaká̱rtarum. 13Túrarum péṉker esettsa enentáimsarum wekasatarum. Túrarum tujintiainia nusha shiir wekasatin yaiṉtarum.
14Kame tuke enentáimji̱a̱i̱ ashí shuar péṉker túrakrum itit awajnáitsuk tura tunaasha máattsuk aṉkant pujustinnium matsamsatarum. Kame núja̱i̱ṉchuka ii Uuntri̱ peṉké wainkiachminiaiti. 15Chikichkisha Yusa waitnenkartutairi̱n tátracharat tusarum péṉker iistarum. Tura yapá nupa̱ tsapái̱ yáitmataik jamaki̱ wea atumíin yajauch awajtamkui ni túruiniamun untsurí shuar utsumárara̱i̱ṉ tusarum péṉker wáinkiatarum.Muis. 29:18-19; Tur. 8:23; Ipi. 4:31 16Núnisaṉ atumín tsanirmatniua núnis Yusna nuna nakitratniun Isaka uchirí̱ Esaú enentáimturmia nuja̱i̱ métek atsutí. Kame iwia̱i̱ri̱ asa núkap sunastinia nuna ántraiti tu enentáimias ishichik yurumkaja̱i̱ yapaji̱á surukmiayi. 17Tura ukunam aparí̱ iwia̱i̱ri̱n súsatniua nuna nekáa Esaú ti wakerukmiayi tura utki̱ seamaitiatcha ni aparí̱ péṉkernum yumiṉkramun yapajtsuk aparí̱ tsaṉkatkachmia nuka nékatsrumek.Naṉ. 27
18Atumji̱a̱i̱ṉkia Yusna enentáimtusminia nuka yaunchu Israer shuarja̱i̱ ashammain amia núnischaiti. Yáunchuka Yus ni akupkámuri̱n Israer shuaran súakui Senái naintian jearmiayi. Nainnium uunt jisha kiritniusha teesha nasesha ajamiayi. 19Tura kachu kakaram umpuamusha ámiayi. Tura Yus kakaram nin chichaream antukar ashamkar atakka chichaschati tu searmiayi. 20Kame Yus chichaak “Shuarsha taṉkusha ishichkisha nú nainnium najarmatai nuka kayaja̱i̱ tukurar tura naṉkiji̱a̱i̱sha mátniuiti” Jiin. 19:12-13 tímiayi. Nu akupkámu ti ashammai asamtai “chichaschati” tiármiayi. 21Wáinkiarmia nu tí tsuumai̱ asamtai imia Muisaissha “Ashamakun kura̱a̱jai” Muis. 9:19 tímiayi.
22Antsu atumji̱a̱i̱ṉkia Yusna enentáimtustin nuja̱i̱ naṉkaamas péṉkeraiti. Átumka nayaimpinmaya̱ Seun nainnium Jerusaréṉ iwiaaku Yus pujutai̱ péprun nakumeana nui̱ jeeaitrume. Nui̱sha ti untsurí nayaimpinmaya̱ suntarsha 23ashí Yus shuarsha shiir iruntraru áiniawai. Yus shuarka ashí nayaimpiniam ni naari̱ anujtúkma ásar ni uchirí̱ áiniawai. Nui̱sha Yus, ashí shuaran ti nékana nu pujawai. Nisha shuaran tí peṉker awajsámtai nu shuar jákar ni wakaní̱ nui̱ shiir pujuiniawai. 24Nui̱sha Yamaram Chichaman iin chichamprútmajnia nu, Jesus pujawai. Ni numpe̱ ukatramuja̱i̱ Apira numpe̱ja̱i̱ naṉkaamas péṉkeraiti. Kame Apir ántar maamu asamtai yapajmiátrukta títinia áintsaṉ enentáimtaji. Antsu Jesus yajauch shuaran péṉker awajsartaj tusa jakamiayi.
25Nuka tí peṉker asamtai Yus chichartamprumna nu nekas anturkatniuitrume. Yaunchu Yus jú̱ nuṉkanam murá chichaamun anturkachar asutniátniunam uwempracharmiayi. Nui̱kia Yus nayaimpinmaya̱ chichartamkurin ántachkurkia ishichkisha uwemprashtatji. 26Yaunchu Yus Chichame̱ja̱i̱ nuṉkan ú̱u̱rmamtikiarmiayi. Tura yamaisha tawai “Ataksha aya núṉkankechu antsu nayaimpinmasha ú̱u̱rmamtikiattajai.” Jiin. 19:18; Aji. 2:6 27“Ataksha” tana nuja̱i̱ “ashí muchitrámnia nu amuukartatui” tawai. Tura muchitrachminia nu juárartatui. 28Yus iin akupkatniun tsaṉkatramaj nuka umuchnakchattawai. Tuma asamtai Yus yumiṉsatniuitji. Yus wakerana núnisrik wishiktsuk shiir enentáimtusar Yus shiir awajsatniuitji. 29Maa, ii Yusri̱ṉkia kajerkaṉka uunt jía nuke aesa mash emesramniaiti.
ទើបបានជ្រើសរើសហើយ៖
Isr. 12: jiv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2009 Avant Ministries in cooperation with Wycliffe Bible Translators, Inc. All rights reserved.