2 Kur. 3
3
Yamaram chicham najanamu
1¿Nu tákurni̱ṉkia “ataksha niṉki waantu enentáimtumainiawai,” tu enentáimsarmek? ¿Chíkich túruinia núnisrik “Ju̱ áishmaṉ nekas Yus Chichaman etserin áiniawai” tusa papí aarma atumín iniaktustinkiaitiajⁱ? ¿Chíkich iniaktustin nú papí atumín seatniukaitiajⁱ? 2Atsá. Átumka ii papiri̱ya núniskechukaitrum. Ii enentái̱n nu papí áarmaiti. Tura nú papí áujsatniua núnisaṉ ashí aents atumí túramuri̱ wáinkiar ii etserkamaj nu, Papru nekas Yusa takatrí̱n takaawai tusa nekaamnia áiniawai. 3Iis, tátsujak. Krístunmaya̱ papí aarma núnisketrume. Ii etseriajⁱ nuyá̱ atumíin Yusa Wakaní̱ áaruiti. Tíntiaja̱i̱nchu antsu iwiaaku Yusa Wakaní̱ji̱a̱i̱ áarmaiti. Kayanmasha áarchamuiti antsu shuara enentái̱n, auka áarmaiti.
4Kame Krístunu asar Yus enentáimta asar nusha tíminiaitji, taji. 5Ju̱ nékaji, imia iik peṉké tujintkiaitji. Antsu ii túrajnia nu Yus ni kakarmari̱n súramkurin túraji.
6Yamaram chichaman Yus najanamia nuna iincha péṉker etserkatniun suramsaitji. Yaunchu aarma chichamnum ashí takamtsuk umirkachrikia tuke jakamniuyaji. Antsu yamaram chichamnum Yuska ni Wakaní̱ji̱a̱i̱ yamaram wekasatniun súramji. Yusa kakarmari̱ji̱a̱i̱ nu chicham étserji. 7Yaunchu chichamnaka kayanam aar Yus Muisaisan susamiayi. Susamia nui̱ Muisaisa yapí̱ ti wincha ajasmiayi.Jiin. 34:29-30 Túrunamtai Israer shuar ni yapi̱n íistinian tujintkiarmiayi. (Túrasha nu wincha mushatmaki̱ wémiayi.) Túrasha nu chichaman shuar umirkatniun tujintiakui nu chichamsha aya tuke jákatniunam shuaran ejemiayi. Túmayataṉ winchaja̱i̱ susamuyayi. 8Tura yamaram chichaman Yusa Wakaní̱ súramna nu, nuja̱i̱ naṉkaamas shíiraiti. 9Kame mesertinnium ejeana nú chicham winchaja̱i̱ susamuyayi. Tura nuja̱i̱ naṉkaamas Yusai̱ ejeana nú chichamka Yus íimmianum péṉkeraiti. 10Iistá yamaram ana nu imiá shiir asa yaunchu wincha amia núnaka mushatmamtikiui. 11Núkap arur pujuschamnia nu wincha áchamkia. Kame tuke átinia nuke nuja̱i̱ naṉkaamas shíiraiti.
12Nu nékakur ti paant étserji. 13Muisais túramia nútiksarik túratsji. Ii uuntri̱ Israer shuar ni yapi̱n wincha ajas meṉkaan wáinkiara̱i̱ṉ tusa tarachji̱a̱i̱ ni yapi̱n Muisaiska nukumákmiayi.Jiin. 34:33 14Tura nu arantcha Muisaisan anturkarmia nuna enentái̱sha nukukmauyayi. Nekaatniun tujintkiarmiayi. Tura yamaisha núnisaṉ yaunchu aarma chichaman áujsar antukar nekaatniun tujintiainiawai. Kristu enentáimtuschatin ni enentái̱n nukukma nu yapaji̱áchmaiti. Aya Krístuja̱i̱ nuka yapaji̱ámniaiti. 15Yamaisha Muisaisa áarmari̱n áujsar nékainiatsui, ni enentáimmiari̱ nukurkamu asa. 16Tura aentssha ni enentái̱ yapaji̱á Uuntna ajasmataikia ni enentáimmiari̱ya̱ nukurkamu ana nu jusamuiti. 17“Uunt” tájinia nu, Yusa Wakaniti. Uunt Yusa Wakaní̱ pujana nui̱ aṉkant ajastiniaiti. 18Nu asamtai iisha ii yapi̱ tarachji̱a̱i̱ nukukchamu asar íspikia núnisketji. Uunt Kristu péṉkeri̱ iniakmaji. Kristu péṉkeri̱ nú nukap takaki̱ wéakur Krístuja̱i̱ métek ajastasa pujaji. Yusa Wakaní̱ṉkia nuna túrawai.
ទើបបានជ្រើសរើសហើយ៖
2 Kur. 3: jiv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2009 Avant Ministries in cooperation with Wycliffe Bible Translators, Inc. All rights reserved.