2 Kur. 2
2
1Tuma asamtai atak kúntuts awajsa̱i̱jrum tusan nakitiakun “atumí tunaarí̱ íwiartsurmini̱ṉ jeashtatjai” tímiajai. 2Wi atumín kúntuts awajkuncha ¿yaki winia waramtikrusat? Aya atumek, wi nuik kúntuts awajsámjarmena nuke waramtikrusminiaitrume. 3Wi jeakun atumí tunaarí̱ íwiartsurmini̱ṉ kúntuts enentáimsa̱i̱j tusan nakitiakun nu papin áarmaj nútiksanak áarmajai. Warí, atumketrume winia waramtikrustin. 4Kame kúntuts enentáimtikrattsan áatrachmajrume antsu atumín ti aneajrumna nu nekaaku tusan kúntuts enentáimsan ti wáitiakun enentái̱rui̱sha jakamnia nekapeakun tí uteayatnak áatramjarme.
Yajauchin túrana nu tsaṉkuratin
5Túrasha kúntuts awajtúsmia nu aya wíniak kúntuts awajtúschamai. Antsu atumniasha ishichik kúntuts awajtámsayi. Patasa chichasa̱i̱j tusan “ishichik” tajai. 6Kame nu áishmaṉkan iruntra chicharkarum wáitkiasmarum nuke máakete. 7Antsu yamaikia tsaṉkuratniuitrume. Shiir enentáimtikratniuitrume. Nisha imiá kúntuts pujus nú arant ajasá̱i̱ṉ tusarum túratniuitrume. 8Túrakrum ni nekas anearmena nu paant iniaktustarum tusan seajrume. 9Kame “aajna nuna umirtukartimpiash” tímiajai. Kame nuna nekaataj tusan wakerakun nu papin nuik áatramjarme. 10Átum tsaṉkurearmena nú shuaran wisha núnisnak tsaṉkureajai. Tura tsaṉkuratin ákuiṉkia wi tsaṉkurajna nu ashí atumnian enentáimtusan Kristu íimmianum túrajai. 11Kame iwianchi uuntri̱ Satanás iin emestampratajtsa wakerana nusha nékaji. Tuma asamtai túrawa̱i̱n tusar tsaṉkuratniuitji.
Trúasnum Papru juákchamu
12Krístunu shiir chichaman Trúasnum etserkatajtsan jean tí peṉker takastinian wainkiamjai. 13Túrasha ii yachi̱ Titiun wáinkiachu asan shiir enentáimsatniun tujintkiamjai. Tura asamtai Trúasnumia̱ aentsun áujsan ikiukiaran Masetúnianam wémiajai.
Krístuja̱i̱ nupetkamniaitji
14Kristu Jesusja̱i̱ Yuska iincha nupetmamtikramak ewekátmasuitji. Tuma asamtai Nincha ti shiir yúmiṉsa pujajai. Tura kuku̱jⁱ kuṉkúakui ashí nékainia núnisaṉ ii etserkamuja̱i̱ Kristu shiir chichame̱n Yuska ashí aentsun nekamtikiainiawai. 15Kristu iin pujurtamu asamtai Yusja̱i̱ nekapsamka iikia kuṉkúaji. Ii kuṉkúajnia nuna uwemtikramu ainia nusha tura uwemtikrachma ainia nusha nekapramnia áiniawai. 16Meṉkakatniunam weena nuka ii kuṉkúajnia nuna jakamnia mejea nekapramji. Tura iwiaaku átinnium weena nuka iwiaaku átin kuṉkúa nekapramji. Maa, nu túratniuncha ¿yaki jeá?
17Kame untsurí aents kuítian achiktaj tusar Yusa Chichame̱n yapají̱nia núniskechuitji. Antsu Krístunu ajasu asar Yus akupkámu asar Yus íimmianum anaṉtsuk esettsar étsereaji.
ទើបបានជ្រើសរើសហើយ៖
2 Kur. 2: jiv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2009 Avant Ministries in cooperation with Wycliffe Bible Translators, Inc. All rights reserved.