LOPNA 24
24
Paulus hay Sesariya vok guverner Feliks
1Buur vasl bugolda, Ananiyas mul ŋol ma-ɗifinna hiɗi sa maariyan sara kep kep, hiɗi Tertulus sa ma di slen goy haraŋa kaw, nisi co'o. Nisi yi kay Paulus vok guverner Feliks. 2Nisi yumay goy jiya, Tertulus tun caw pi lawt kalam hay dita ala: 3Guverner, sle'ta ta ŋolda numa fa' kayn kuɗaŋ naŋu, sle ma hay nagat tani kot goy ŋaa kayn kuɗ wida vaŋ ta vokka, Feliks ma ŋolla, slen kayni numa vum kaf, hay liyna vuma kaf kaw hiɗi gi-deɓta ta ŋolda. 4May, nan may makaŋ yaŋ ŋolɗi, nan siɗawaŋu kay naŋ humma hiɗi ŋalda vaŋu ir liyn neeɗa. 5Numa fi san zawni, ki bakmarana ma mar cirepta jar sa Yudiyana sa kay nagatna kaf nala, nam mi ma ŋolla vi vida vi sa Nazareena, 6nam gar a muɗ Tempella goy liwisi kaw, numa vumu, numa gar kay ka kitat kalamu kuɗ gatta vuma'a, 7May komandaŋ Lisiyas co'o, nam hulotom goy ɓuma hiɗi dono'o, 8nam di tam sa pi lawt kalamna kay ma kulo vokaŋu. Naŋ kay tuwaŋ kaw as jobomu, naŋ ma wi va ma li a numa pi lawt kalamna. 9Sa Yudiyana vunsi vi law na'ta, nisi di goy kaw ala lawt kayn hay liya'a.
10Hay li ma guverner ɗek Paulus kay nam di'e: Nam sli dita di'e: Nan wi'e naŋ mi sa ma ka kitana vi sa nagat tani ir busat ŋolo, nan as di sem lawta van goy vokaŋ bay giriŋi. 11Buura may coy doogo yam ma'ɗi -- naŋ as hum kayni goy haraŋi -- nan kalay kulo Yerusalem kay li girifta. 12Nisi may fan ci wayt hiɗi sa'a lebo fan li va ma ɦilay sumun kulo hay Tempellaɗi, hay sinagogaynaɗi, hay hoyok-ziynɗi kaw. 13Va ma nisi pi lawt kan kalam vaydina kaw, nisi as dum cawam goy gasiɗi. 14Nan di goy haraŋ vokaŋ ala: Nan ka sun Lawna vi sumiyanu, kuɗ hagata ta nisi ya' ala sekta;#24:14 Sekta kayni ti hatta ta calay goy hiɗi hatta ta tun jewta lebo ta gasita. nan viy kuɗ slen ma ɗoy hay gatta kafe, viy kuɗ sa jobta nala kaw, 15nan ka cub kuɗ sle'ta ɓam Lawna -- nisi kaf kaw ka cub kayn ki kayn nala -- kay dayta-kulota vi sa ɗigera hiɗi sa bay-ɗigera ma co'o. 16Kuɗ na'ta nan li dono'o kay poy hay tap-wida ta ŋaata vok Lawna, vok sumuna kaw.
17Bugol busata kalay ŋol kalay, nan ma'a kay li vulda tam sa hay jafna vanu, kay mar vulda kaw tam Lawna. 18Nisi fan hay Tempella hay li ma nan li poora lina, nisi may fi sumun zatay kuɗanɗi, fan fok ɦilayta kulotaɗi kaw. 19May sa Yudiyan sara kep kep hay Asiya co vokaŋu kay pi lawt kan kayn si nisiya, la lawta visi ka kanu. 20Lebo hinsi di goyo kay zlata-joota ta nisi fa' kanta, hay li ma nan col vok sa ɗiger-lawta. 21La kayni kuɗ dita ta nan col kulo jarsiya siwela' ala: kuɗ dayta-kulota vi sa mitina, nan ka vun kitata vaydi vok irgiya!
22Feliks ma wi slena kay hagata kayni goy haraŋi, nam gi lawt voko, disi kaw ala: Hay li ma Komandaŋ Lisiyas maawa, nan ma fek caw lawta vigiya. 23Bugolda nam vul hagata mi ma ŋol ma sojen kalam kisna kay ŋom Paulus, may hinim goy ir buti neeɗa, sa falamna sa min co ɗuwumna telsiɗi kaw.
24Li buur ca kayni, Feliks co hiɗi cata valam Dursila ta Yudiyata, na' gi suniya kay mar Paulus. Nam humum kay vida hay Kristu Yesu. 25May hay li ma Paulus ka ɓak kay ɗigerta, kay tel-tuwna, kay kitata ta min ma'a kaw, narta vi Feliks, nam di Paulus ala: Wulin kayni tuɗaŋ maŋu, hay li ma nan fi liynawa, nan ma yaŋ mara'a. 26Nam var kay Paulus ma vulum gurju'u, kuɗ na'ta kayni, nam gi sun ay kalam lo kalam lo, kay kus yoboyn hiɗi namu. 27Busat ma' vat goy ki kayn nala, Porsiyus Festus vurna baŋal Feliks. Kay Feliks min vi dik sa Yudiyana ni, nam hin Paulus juni hay daŋgayn waŋi.
ទើបបានជ្រើសរើសហើយ៖
LOPNA 24: Massana
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
BIBALDA TA PELDETTA © L'Alliance Biblique du Cameroun, 2001
