LOPNA 23
23
1Paulus cuk iram ŋiresl kay sa ɗiger-lawta, nam disi ala: Ɓosiyonna, nan poy vok Lawna hiɗi sle'ta hay dikanu ta-ta hay fatta vaydita. 2mul ŋol ma-ɗifinna Ananiyas vul hagata mi sa ay goboy hiɗi namna kay nisi ma ci Paulus hay vunamu. 3May Paulus dum ala: Lawna ma wataŋu, naŋ gulmun ma koray haɓna! Naŋ musawa kay ka kitat kanu kuɗ gatta, naŋ hin gatta goyo, vul hagata kay watanu! 4Nisi sa ay lakay ɗawni di'e: Naŋ ŋul mul ŋol ma-ɗifinna vi Lawna su? 5Paulus di'e: Ɓosiyonna, nan may wi ala zawni mi mul ŋol ma-ɗifinnaɗi, kay ɗot di ala naŋ ma di va ma joo'o sa ma ŋolla vi sumuna vaŋɗi.#23:5 fi kayni hay Kg 22:27.
6Hay li ma Paulus wi ala gal tokŋa kayni si sa Sadusena, gal hena kayni si sa Farisena may ni, nam siwel goyo jar sa ɗiger-lawta ala: Ɓosiyonna, nan mi sa ma Farisena, goora vi sa ma Farisena, nan ka vok sumun tan kayni kuɗ cubta-sle'ta hiɗi dayta-kulota vi sa mitina. 7Hay li ma nam di kayni goy dina, ci-wayta fok kulo jar sa Sadusena hiɗi sa Farisena, vokŋa kaw ɓuraw gaa'a. 8Kay sa Sadusena di ala dayta-kulota tayɗi, sa sunda sayɗi, ŋus mayɗi kaw, may sa Farisena vi ala nam cani ka'a. 9Lawta suwa kulo ŋolo, sa wi-ɗota kep kep jar sa Farisena yaw kulo'o, tun caw ci wayt hiɗi ŋiraysi vat' di kaw ala: Nay may fi va ma joo ne' kaw hay san zawnɗi, la mi ŋusu lebo sunda-wuralawn kla laway hiɗi nam klasige! 10Ci-wayta ɦur kayn kulo voka' ŋol suwa. Komandaŋ li nari kay nisi ma jet Paulus goy klasige. Nam vul hagata mi vokŋa vi sojena kay jik gaa'a kay vum Paulus ay goy jarsi pa, maramay hay ziyda ta gulmun ta'ta. 11Hay henjeta ta ka'ta, Bum-Sumuna ma goboy tam Paulus dum ala: Soŋ tuwaŋu, kay ki naŋ li di-goyta kanu hay Yerusalem nala, naŋ ma li di-goyta hay Rom kaw.
Sa Yudiyana ŋra vunsi kay Paulus
12Hay li ma liyn foowa goyo, sa Yudiyana ŋra lawta kalamu, yi va kisi kaw ala nisi min tiɗi, ciɗi kaw, la nisi bay ci Paulus goy jew kayni. 13Nisi sa ŋra vunsi nalana nisi suw dok-fiɗi; 14Nisi kalay tam muliyan ŋulo sa-ɗifinna hiɗi sa maariyana kay disi ala: Numa yi vaawa kuma'a, la numa bay ci Paulus goyo, numa as tun fu vunmaɗi. 15Wulin kayni nigi ŋra lawta vigi hiɗi sa ɗiger-lawta, nigi ma di lawta tam komandaŋŋa kay nam ma maram vokgiya, ki nigi min ɗuwa' kayn ti lawta valam nala, may numa ma baramu, cum goyo jew a nam co goboyo.
16Goora vi ɓasum Paulusta hum kay baarta visiya, nam kal hay ziyda ta gulmun ta'ta, kal kalafi kay di Paulus kay lawta kayni. 17Paulus yi sa kep jar sa ŋulo sa sojena kisi kis kisna, nam dum ala; Gaŋ caw goor zawni tam komandaŋŋa, kay nam min dum kay law mara'a. 18Ma ŋol ma sojen kalam kisna vum kuɗumu, tuɗum tam komandaŋŋa dum ala: Paulus ma daŋgayna yanu, jobanu kay nan ma tun caw goor ma joriyona zawni ay taŋu, kay nam ka hiɗi va'a kay daŋga. 19Komandaŋŋa vum ɓalamu, nisi kal goy visiya. Komandaŋŋa jobom ala va ma naŋ min dantina mi mige? 20Nam hot dita: Sa Yudiyana kaf vunsi juni kep kay ma jobaŋu a naŋ ma hinsi Paulus tuɗis vok sa ɗiger-lawta, ki nisi min ɗuw caw lawta ta kalamta goy ŋaa'a nala. 21May naŋ ma humsiɗi, kay sumun suw dok-fiɗi yi va kisi ala: La nisi bay ci Paulus goyo, nisi tiɗi, ciɗi kaw; nisi kot tuwsiyawa vatiya, ka baramu kaw, may hini zama' kayn ti varta vaŋu. 22Komandaŋ hin goor ma joriyona tuɗa, hay li ma nam gatam vunam ala lawta ta nam dumtita kayni nam da' goy mi saɗi.
23Bugolda nam yi sa ŋulo sa sojen kisi kis kisna ma' talamu disi ala: Digi tam sojena kis-ma' kay kot tuwsiya, sa jaŋ kulumayna dok-siɗiya, sa ɓe ɓarawta kis-ma' kaw kay tuɗ ta-ta hay Sesariya hay leer ma ɦidina vi henjeta. 24Nam disi lo kay nisi ma gan kulumayna vi Paulus, a nisi tuɗum tam guverner Feliks bay va geɗ talamu. 25Nam ɗo letreta ki kayn nala:
26Klawdiyus Lisiyas gi deɓ mi guverner ŋolla Feliks! 27San kayni sa Yudiyana vumu, nisi goboy a cum goyo, hay li ma nan co kisiya hiɗi sojena, nan butum goy hay ɓisiya, hay li ma nan hum ala nam ayn mi sa ma Romena. 28Nan gar a wi caw va ma nisi pi lawt kalamu, ta-ta tuɗum vok sa ɗiger-lawta kaw kalamna. 29Nan fi ala la nisi pi lawta kalamu, kayni kuɗ ci-wayta kay gatta visiya, may law ma nisi pum kalamna, ma as naram tam mitta lebo naram daŋgaya mayɗi. 30May hay li ma nan hum ala sa Yudiyana ŋra vunsi kalam kay baram hay hagata, nan gumis taŋ gosoyo, sa pi lawt kalamna kaw nan di tisi ala nisi ma di lawta visi ta kalamta goy vokaŋu. Lakay ŋaa'a!
31Sojena, kuɗ va ma diys tisiya, nisi vi Paulus, tuɗum hay henje na'ta ta-ta hay Antipatris. 32Hay grawta, nisi hin sa ɓey kay kulumayna tuɗ hiɗi namu, may segena hotay hay ziyda ta gulmun ta'ta. 33Hay li ma nisi co hay Sesariya, nisi vul letreta mi guvernera, nisi mar Paulus vokomu kaw. 34Hay li ma guverner jaŋ letret goyo, nam job ala Paulus ay hay naga tarige. Hay li ma nam hum ala Paulus mi sa ma hay Kilikiya, nam di'e: 35Nan ma humaŋ goy haraŋ ɗawni, hay li ma sa pi lawt kaŋŋa maawana. Nam vulsi hagata kay nisi ma ŋomom kalaf hay Pretoriyumna vi Herod.
ទើបបានជ្រើសរើសហើយ៖
LOPNA 23: Massana
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
BIBALDA TA PELDETTA © L'Alliance Biblique du Cameroun, 2001
