Ex 21
21
Ley yin eb chekbej
(Dt 15.12-18)
1Max yalon Jehová bay cham Moisés: A juntzan ley ti' chak' k'anabax xol eb et conob ti':
2Ta ay junok nak e yet conob che mana' yet chi oc e chekbejok, asan wakeb abil chi mulnaj nak e yetok, axa yet is suk abil xin, cax che bekon elok, cax yet-xa ba. C'amc'al tumin chi yak' nak yuj is bekbanil. 3Ta is tx'oklilc'al nak max apni oc yet max manlay tu', ac'ala' is tx'oklil chi toji. Ta ay yistzil nak ibil oc xin, ac'ala' chi yitok nak yistzil tu'. 4Tatol a nak max manon nak tu' max ak'on yistzil, yet nak aj na tu' chi yuncan ix ix tu' yetok eb unin, tx'oklil nak chi toji. 5Ta chi yal nak chekbej tu xin: C'am chi wochej chin bekchaj elok yujtol ay in camc'ulal yin in patrón, c'al yin wetbi c'al yin wuninal, ta ẍi nak, 6ta axca tu', chi ilaytok nak yuj is patrón tu' satak eb yajaw, cax chi jitzlay oc lecan nak bay marcoal is puertail despacho eb yajaw tu', cax chi ol-lay is txiquin nak yuj is patrón yetok ch'en lesna, cax chi occan yechel nak tol chi canxac'al nak yetok is patrón tu' yin junelnej.
7Ta ay junok mactxel chi txon is cutz'in yin chekbejal, c'am chi je' beklay el eb ix axca eb nak winak. 8Ta a is patrón ix tu' c'am chi cha c'ul chi oc yistzilok axca yayji trato, yujtol c'am chi ochelay ix yuj, chi je' chaon pax nak patronej tu' is tojol ix junelxa bay is mam ix. Ta c'am ch'en yuj mam ix tu xin, c'am chi je' txonon jun patronej tu' ix bay junok tx'ok conobal, yujtol toc'al max etax ix yuj is patrón. 9Ta a junok nak is c'ajol jun patrón tu' chi ion ix yistzilok, chi yut ix axca wal junok is cutz'in, 10palta ta a is patrón ix tu' chi ion yistzilok, cax chi yion pax junokxa ix, man yaynakilok chi yun ix babel tu', palta tol chi yak' is lobej ix, c'al is pichil ix, c'al masanil tzet yetal ay yalon yet ix yin yet yalantok. 11Ta c'am chi yikej yak'on oxeb tzet yetal ti', chi bekchaj el ix, cax c'amxa tzet chi tojlanej yuj is bekbanil.
Ley yiban mac comonc'al chi lipc'oj ocok
12A mac chi mak'on cam junok anima, yowalil chi ak'lay pax camok. 13Palta ta man yinok c'ul max tita max mak'on camok, ta is tiempoalxa cam jun anima tu', ayin ok wal ayex bay ok tok c'ubaj el ba jun mac max mak'wi cam anima tu'. 14Palta a mac tol chi cam wal naoni, cax chi mak'on cam yet animail, caxc'al mi a bay waltar chi toj c'ubaj el ba, chi ilay eltek, cax chi ak'lay camok.
15A mac chi mak' is mam ma is txutx, yowalil chi cami.
16Ta ay mac chi elk'anentok junok anima, ta mayal txontok, ma ayto ec' yetok xin, yet chi michchaji, yowalil chi cam jun elk'om tu'. 17A mac chi baj is mam ma is txutx, ak'layokab camok.
18Ta ay cawanok chi yak' owal, cax ta ay junok nak chi lajwi yuj junxa tu', cax ch'en chi yak'balnej, ma toc'al chi mak' yetok is k'ab, asan tol toc'al chi aj telan yuj yaben yail, palta c'am chi camxac'al, 19ta a yet yecal cabej chixa ec' nak chi lajwitok tu' yin te', a nak max mak'waj tu', chi tojlanej nak masanil tojol ambal, c'al tojol is c'u nak ya'ay tu', palta c'am chi alay oc camich yiban.
20Ta ay junok mac chi mak'on is chekbej winak ma ix yetok te', cax chi camxac'al yuj, yowalil chi lowcan camich yiban jun patronej tu'. 21Palta ta chito ec' jun chekbej tu' cab oxebokxa c'ual, cax chi cami, c'amxa chi alay oc camich yiban, yujtol yet yayji oc jun is chekbej tu'.
22Ta ay cawanok winak chi yak'lej owal, cax chi tzakaytok junok ix ix tol yobixxa xol owal tu' yuj eb, cax chi el unin tu' yin ix, palta c'amc'al jabok tzet chi yab yail ix, a nak chi oc is mul tu' chi tojlanej jantak chi k'an yichamil ix, yetok c'apaxok, atac'ala' tzet chi yun beyc'ulnen el eb cham juez. 23Palta ta ay tzet chi on ix xin, atac'ala' tzet chi on ix tu', caytu' chi utlay c'apax nak; ta chi cam ix, chi cam c'apax nak. 24Ta chi etaxtok is bak' sat ix ma ye ix, ma is k'ab ix, ma is yakan ix, 25ta chi tz'a ix, ma chi yasji ix, ma toc'al chi yaxbi is mimanil ix, ac'ala' axca wal chi utlay ix tu', caywal tu' chi utlay c'apax nak winak tu'.
26Ta ay junok mac chi mak'on poj bak' sat junok nak is chekbej, ma junok ix is chekbej, chi beklay el nak ma ix is q'uexelok jun is bak' sat max c'ayil tu'. 27Ta ay junok ye is chekbej tu' chi mak'lay eltek yuj is patrón tu', chi beklay el jun chekbej tu' is q'uexelok ye tu'.
Ley yiban junok camich tol man naanok cax chi oqui
28Ta ay junok no toro chi tekon cam junok anima, yowalil chi k'oklay cam no', cax c'am chi chilay is chibejal no', palta c'am tzet chi oc yiban is yajaw no' tu'. 29Palta ta yojtakxa is yajaw no' tu' tol owc'alta' no' yin anima, cax c'am pax chi pixbaj no', ta chi teklay cam junok anima yuj no', yowalil chi k'oklay cam no' cax chi cam c'apax is yajaw no' tu'. 30Ta chi chalay tojlanelay jun camich tu', chi tojlanej is yajaw no' tu', atac'ala' jantak chi k'an eb aj camnak tu', cax c'amxa chi cami. 31A ton wal juntzan ley ti' chi oc yopiso, ta ay junok c'ajolej ma cutz'inej chi teklay cam yuj no'. 32Ta a junok nak chekbej ma junok ix chekbej chi teklay cam yuj no', yowalil chi ak'lay 30 siclo plata bay is patrón jun chekbej tu', cax chi k'oklay cam no'.
33Ta ay junok mactxel c'am chi makchej ti' is c'ob yet uc'bala', ma chi jot junok olan cax c'am chi makchej pax is ti', cax chi toj junok no wacax, ma junok no burro yul, 34yowalil chi tojlanej nak ay yet jun olan tu' bay nak aj no' tu', cax chi can no' max cam tu' bay nak.
35Ta a junok no toro junok mactxel chi tekon cam is toro junokxa, yowalil chi txonlay el no' max tekwaj tu', cax chi pojon ay eb ch'en tojol no' tu' yin; ac'ala' chi pojon c'apax ay eb nan no' max teklay cam tu' yin. 36Ta yojtakxa nak ay yet no' max tekwaj tu' tol toc'alta' ow no', c'am chi taynej pax no', ta caytu', yowalil chi yak' nak junokxa no' iquis is q'uexelok no' max cam tu', cax chi can no camnak tu' bay.
ទើបបានជ្រើសរើសហើយ៖
Ex 21: ATBYK89
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Kanjobal (Q’anjob’al) © Sociedad Bíblica de Guatemala 1989