Ex 15
15
Is bit cham Moisés
1Catatu xin, max bitnej cham Moisés jun is bit yetok masanil eb israel satak Jehová, max yaloni:
Chi jiaj can Jehová, yujtol caw wal watx' max yun yak'on ganar Cham owal; max mukaycantok no chej yul a' mar, c'al eb nak inej oc no'.
2A jun co bit ti' yet Jehová, yujtol a Cham co Colomal yayji ocok xan chi jiaj can. Ok jal watx' k'anej bay Cham co Diosal; Cham is Diosal eb jichmam c'apaxok, xan co moj wal jion aj can.
3Caw wal watx' Cham yin owal, Jehová ton is bi Cham.
4Max mukaycan aytok is carruaje cham reyal Egipto yetok eb is soldado bay yul a' yuj Jehová. C'al eb is yoficial cham rey tu' tol mimek yelapnok, max tojcan eb yich a' Cakyin Mar.
5Axca wal ch'en ch'en max yun tojcan yich a'; max mukaycan aytok eb.
6Mamin Jehová, caw wal ay yipalil a watx' k'ab, max mak'on coj eb ajc'ul oc jin.
7A yetok a miman ipejal max a mak' ayc'ay eb chi yochej chi yak' owal etok. A wal yet chi tit owal, axcaxac'al tz'atok an ch'im, cayxac'al tu' chi yun lajwican el eb oj.
8Yetok epalil max a xutok a cak'ek', cax max pojontok ba a' aej. Axca muro max yuncan a' bay junjun tz'eyil takin be tu', cochwal cawxac'al max yuncan a'.
9Max yalon eb ajc'ul: Ok on tzakloj yintak eb nak tu' masantac'al chi yal michchaj eb. Ok co pojon ec' tzetak yetal eb, ok jican ec' bay eb, yet watx' xiwilokab tzet ayon. Ok jion ajtek jespada yul is tz'umal, cax ok co c'ayon el eb, ẍi eb.
10A yet max a xuontok a cak'ek' yiban a' mar, cax max mukaycantok eb nak yuj a'; max tojcan eb nak yich a' axca ch'en plomo.
11Mamin Jehová, c'am junokxa dios chi je' lajban ba etok. Mimanbil ach, yujtol Asanxanej ach ocok. C'am junokxa mac chi je' yuj milagro, c'al tzet c'ayubtakxac'al axca tzet chonej.
12Max atok a k'ab yetok epalil, axa turlay aytok eb yuj tx'otx'.
13Yuj a miman camc'ulal xan ach chekbaj jun conob max a colcan el ti'. Yetok epalil cax cheontok bay tx'otx' tx'otx' tol etc'alta' yayji.
14A yet ok yaben juntzanxa nación jun ti' ok bilaj eb yuj xiwilal; ok xiwcan aj eb filisteo.
15A eb yajawil eb aj Edom, toxac'al ok c'aycan aj c'ul eb. Axa eb yajaw bay Moab, toxac'al ok lukloncan aj eb yuj xiwilal. Axa pax eb cananeo xin, toxac'al ok c'ubaj el ba eb.
16Mamin Jehová, xiwokabcan aj eb, cax sicbokokab can el eb. Axcaxac'al ch'en chi yuncan el eb yuj yipalil a k'ab, masantac'al ok ecantok eb a conob colbil el oj ti'.
17Mamin Jehová, ach chetok a conob etok bay witzlak tol et yayji ocok, jun a lugar tol ach max a sic'can elok bay chach ayji, jun a templo tol ach max a watx'nej.
18Ach Jehová, Rey ach yin tojbalk'inal, ẍi eb israel yin is bit.
Is bit María
19A yet max toj cham reyal Egipto yetok is carruaje, c'al juntzanxa eb inej oc no chej bay yul a' mar, max junanej ay ba a' yiban eb yuj Jehová; axa pax eb israel xin, caw wal watx' max yun yec'tok eb yul jun be takin nan xol a' aej. 20Yuj tu xin, a María is chekbej Dios, is yanab cham Aarón, max yiaj jun is pandereta, cax masanil eb ix yet israelal ibil aj is pandereta eb, max canalwi eb yetok. 21Max bitni ix María satak eb axca ti':
Bitnanek, iek can Jehová, ilab tol caw wal c'ayubtakxac'al max yun yak'on ganar Cham owal. Max mukaycantok no chej, c'al eb ay aj yiban no' bay yul a' mar, ẍi ix.
A c'a' aej
22Max lajwi tu xin, cax max yion el cham Moisés eb israel bay is ti a' Cakyin Mar, cax max toj eb bay takin tx'otx' yet Shur; yin oxeb c'ual max bey eb cax c'amc'al bay max ilchaj aej yuj eb. 23Lajwi tu' max apni oc eb bay chi yik Mara. Ay a' aej bay tu', palta maj je' yuq'uen eb a' yujtol caw wal c'a' a', yuj wal tu xin, xan Mara*fn* max yikcan jun lugar tu' yuj eb.
24Max oc ijan eb anima tu' yalon yobal k'anej yin cham Moisés, cax max k'anlen eb: ¿Tzet ok juc' tinani'? ẍi eb. 25Yuj tu xin, max k'anon Moisés is colwal Jehová, max tx'oxon Cham jun te te', cax max yaon aytok cham Moisés te' yul a', cax max watx'ji el a' yuj te'.
A bay tu' max yak' Jehová jun is ley bay, tol chi beybalnej eb c'al yiloni ta yikem eb. 26Max yalon Jehová: Ta che yikej tzet chi wal ayin Jehová in ti', cax che yunen bay tzet chi yal in chekbanil ti', c'al masanil in ley, catatu' man ok watek ilya' e yiban axca juntzan max waoc yiban eb aj Egipto, yujtol ayin Jehová in, chex wantej, ẍi Cham.
27Max lajwi tu xin cax max apni oc eb bay chi yik Elim, bay ay lajcaweb nuk' aej, c'al 70 an palma, a tu' max watx'nej aj eb is campamento bay is ti a' tu'.
ទើបបានជ្រើសរើសហើយ៖
Ex 15: ATBYK89
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Kanjobal (Q’anjob’al) © Sociedad Bíblica de Guatemala 1989