Ro 15
15
Alecochiya joga'me adaqaya jo'ne 'uo da'me laqalaic
1Qo'mi jo'ne joote 'uañaĝaic da'me qadepe'e, 'noota qom jaconaĝagueta daa'me lachoĝolaĝaco gaa'me jo'ne maliaĝa ja 'uañaĝaic da'me lepi'iyaĝa'j, nataq'aen ja jelaqaque ga'me mach'e qo'mi ja'amaqatenaq. 2Ena'uaque jiyamaĝataqatac ga'me qadaqaya nataq'aen je'etaĝam ga'me liyamaĝac joga'me, nataq'aen qaedi nichiquetajeguem q'aen da'me lepe'e'. 3Qa'a nach'e naq'aeta ñe'me Cristo ja yelotaque da'me ta'le mach'e niyamaĝadela't; ja naq'aeta, dite da'me tachiguilo naa'me nedii's jo'ne joote qoyediñe ca'li, eet'oi: “Ga'me jo'ne am qoyejouenec nataq'aen da'me am qo'enapega mach'e jayem uedalegue.” 4Qa'a ena'uaque gaa'me qoyediñe joca'li gaa'me noloqo'ote 'me joote yenoĝodegue, qoyedidiñe qaedi qo'mi yapaĝague'n, qaedi chiyaqayilo jogaa'me male qanañaĝaden nataq'aen da'me qo'mi qoloyaĝanate't qaedi 'uo da'me qadeuataqataĝanaĝac. 5'Noota qom ñe'me Dios 'me chiyaqayi da'me qo'mi t'añidañe nataq'aen qo'mi loyaĝanate't ami lecochiyalo onolqa'tape da'me ami ademiyaye ga'me adelnataĝaqui, nach'e naq'aeta ñe'me Cristo Jesús, 6qaedi ena'uaque ami adaloi'ta't, da'me onolec ga'me nejamaĝa a'nonaĝachigui ñe'me Dios mach'e let'a ñe'me Qadejaliaĝanec Jesucristo.
7Chane'eja 'noota qom onolqa'tape ami auacoñiyegueta gaa'me adaqayadi', nach'e naq'aeta ñe'me Cristo da'me ami yaconegueta qaedi qoyi'yoĝodetac ñe'me Dios. 8Qama'le ami ja'aqataĝanema ñe'me Cristo da'me naequena joca'li qaedi lecochiyalo joga'me judiopi qaedi yepaque'teguelo gaa'me jo'ne joote qo'yaĝatema dia'me qadet'al 'me jachiyojoĝogueta nataq'aen naq'aeta da'me yaloĝon queda'me Dios yepagaqate'tegue ga'me jo'ne yaqataĝañi 'laqatac. 9Nataq'aen naequena joca'li qaedi ga'me ja judiopi nach'e ena'am 'nonaĝachidegue joñe'me Dios, qa'a 'uo da'me lichoĝodenataĝanaĝac, naq'aeta da'me 'yaĝatetac naa'me nedii's jo'ne eet'oi:
“Qo'che' am 'ñonaĝachigui da'me jouetauelo gaa'me yodapecache jiyaĝadipi,
Nataq'aen jo'o'tape gaa'me nalaco 'me 'yaĝatetedac da'me adenaĝat.”
10Yitaĝa enaac ga'me 'naqatac laqaya:
“Ami made'tapolqa nale ovitauelo joga'me Dios lec'oqo'tepi, ami jo'ne ja ami 'te judiopi.”
11Qama'le yitaĝa enaac:
“¡A'nonaĝachiyegui ñe'me Jaliaĝanec, ena'uaque ami jo'ne ja judiopi,
Nataq'aen ena'uaque ami noyaqapi a'nonaĝachiyegui ñe'me Jaliaĝanec!”
12Isaías nach'e ena'am yediñe da'me dojo':
“Ga'me lolelaĝai 'me chiyoĝoguet di'me Jesé yitaĝa nolelijeguem qomle,
Nach'eñe ñijeguem qomle qaedi nejaliaĝatelo'te yema ga'me noyaqapi,
Qama'le nach'eñe joñe'me dajoteda'a jogaa'me.”
13'Noota qom ñe'me Dios 'me chiyaqayi da'me neuataqataĝanaĝac, ami nejaqachiguilo q'ae'n da'me ami made'tape, da'me 'nemaĝac ami uetauelo, ami jo'ne auep'iiya'a joñe'me. Nataq'aen ami yanema ga'me alidaq 'me najoĝonataĝanaĝac 'me chiyaqayi da'me 'lañaĝac ñe'me Lepaqal jo'ne ja 'nalegue.
14Ami yaqaya'olqa, mach'e jayem da'me ena'am ta'le ami jela'alo da'me yataqachiñe nejaqachiguilo da'me adichoĝodenataĝanaĝaqui nataq'aen da'me adayatenaĝanaĝaqui, choqoda'me auayachiñe da'me mach'e ami anapaĝagueñiyapega't. 15Temaqaedi ja'uo jenjo' yediijec queda'me uo'oe gaa'me ami ja'aĝatema qaedi ja auapalaĝache'talo, ja'uo da'me dojo' qa'a da'me lichoĝodenataĝanaĝac ñe'me Dios jayem yamaĝalegue. 16Da'me jo'onataĝaneuo'o ñe'me Cristo Jesús qaedi 'uo da'me liyamaĝa'j ena'uaque jogaa'me jo'ne ja judiopi. Ja'aĝatetac da'me onaĝaic 'naqataĝanaĝac 'me chiyaqayi ñe'me Dios, qaedi ga'me ja judiopi nach'egaua ñe'me Dios Lepaqal ja 'nalo'te q'ae'n qama'le jano't ñe'me Dios, ena'am ga'me najaqajec nale qoyigoue 'me jama ga'me laeta.
17Chane'eja da'me jo'onataĝaneuo'o ñe'me Dios nach'eñe Cristo Jesús chiyaqayi da'me ji'yoĝodetac joñe'me, 18qa'a ja ch'e yichicalegue da'me gamachaqaega ja'aĝatetac, dite da'me Cristo jayem yanem 'me jayem ch'e na'ya q'aen, qaedi ga'me ja judiopi yaqanate't da'me yoqochideta ñe'me Dios. Jauo'oe daa'me 'yaqataqa choqodaa'me 'yonataqa 'me di'yo't da'me je'et da'me dojo'. 19Qoyen uaĝayet da'me 'lañaĝac ga'me 'nanaqapi, nataq'aen gaa'me di'yo't nañoqotaĝanaĝaco, nataq'aen da'me 'lañaĝac ñe'me Dios Lepaqal. Chane'eja jachiyoqochi'ña di'me Jerusalén nataq'aen ga'me qoyode'talo noyaqapi chayovida'a Iliria. Yataqachiñe yemet'a't da'me japaĝaguenataĝanec da'me onaĝaic 'laqataĝanaĝac ñe'me Cristo. 20Qalaĝaja nach'e eta't jepaquetapega da'me japaĝaguenataĝatapec da'me onaĝaic 'naqataĝanaĝac 'me 'yaĝatetac ga'me ua'a da'me maliaĝa ja qodomachiya da'me lenaĝat ñe'me Cristo, qaedi ja joqotelegue ga'me jiyaĝaua laqaya 'lonatac. 21Dite da'me ena'am ga'me joote qoyediñe jo'ne eet'oi:
“Jogaa'me jo'ne maliaĝa ja yacoteguet da'me nep'iquinataĝanaĝac,
nach'egaua male yauata,
Nataq'aen male yayate'n joga'me jo'ne maliaĝa ja domachita
da'me qo'yaĝatetac joñe'me.”
22Chane'eja dojo' 'yonatac nach'eda jayem nauequetañe nale jetaque ami jejapichiyalo. 23Qalaĝaja nayi da'me jomat da'me 'yonatac jena'me jenjo' aleua, queda'me qayoĝode' 'uoidi da'me jetaque ami jejapichiyalo, 24qomle jec'ata di'me España qama'le jepitaqatenac da'me ami jejapichiyalo. Qa'a jeetapega ami jauanalo qom jovida'aquena, qa'a uotaĝa jayem alecochiiya da'me jajoyi da'me daja' qaedi yataqata qo'mi made'tape, mate mane'e ja cop'a da'me ñauanaĝa't. 25Qalaĝaja nayi cha'li jec'ata di'me Jerusalén, qaedi jeda'alo janjo' necochaĝanaqate 'me qoyanema gaa'me qadaqaya'olqa 'me neda'ña di'me. 26Qa'a joga'me Macedonia laje'pi nataq'aen joga'me 'lachaqa't di'me Acaya onaĝaic da'me yauote da'me yemata'a't jaga'me lajaqaje' qaedi yamaĝalo jogaa'me qadaqaya'olqa jo'ne choĝodache 'me neda'ña di'me Jerusalén. 27Yataqachiñe eja onaĝaic da'me yauote dojo', mate mane'e eja 'uo da'me nep'iayaĝa'j jogaa'me, qa'a naq'aeta da'me yauote joga'me judiopi, da'me qoyapetedeuo da'me Dios lec'oĝochiyaĝac joga'me ja judiopi, qama'le chimaqachiñe da'me dachetaĝatec da'me leuoyaĝa'j qaedi lecochiyalo gaa'me p'etaqadayaqa jo'ne judiopi. 28Chane'eja qom maqachaĝa jomat da'me dojo' nataq'aen qom joote janema jana'me necochanaqate jogaa'me, qama'le jajo'tague di'me España uotaĝa ami jayoĝolo'te qaedi cada'ac ami jejapichiyalo. 29Nataq'aen jayaten da'me qom ami jejapichiyalo, ami jeda'alo da'me let'adaic lichoĝodenataĝanaĝac ñe'me Cristo.
30Qalaĝaja ami ñachoĝodenouelo, ami yaqaya'olqa, qaedi jayem alecochiiya, jayem aualoĝoñilegue ñe'me Dios, qa'a ami uetauelo da'me lañoqotaĝanaĝac ñe'me Qadejaliaĝanec Jesucristo nataq'aen da'me loqopich'i ñe'me Dios Lepaqal. 31Anachoĝodeñiyot joñe'me Dios qaedi jayem yaĝa'n jogaa'me ja p'iida'a ñe'me Dios 'me neda'ña di'me Judea, nataq'aen gaa'me qadaqaya'olqa 'me neda'ña di'me Jerusalén, yataqachiñe jalcote 'noota qom yacoteguet jana'me necochaĝanaqate jo'ne jeda'alo, 32qaedi qom naq'aeta da'me loequenataĝanaĝac, qama'le qom jovida'aquena 'uo da'me yamaic da'me ami jovitalo nataq'aen 'ñomategue da'me ami jejapichiyalo. 33'Noota qom ñe'me Dios jo'ne chiyoqo'ot da'me 'nemaĝac ami uetauelo. Jaja'a, nach'e naq'aeta da'me dojo'.
ទើបបានជ្រើសរើសហើយ៖
Ro 15: TSN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Nuevo Testament Toba del Oeste © 2010 Sociedad Bíblica Argentina
